Read Kalanga Esita 5 Bible Online

Esita 5 - Kalanga bible

Esita 5

¹Mu zhuba le butatu Esita kaambala zwiambalo zwizwe zwe bumambokadzi ngono kanoma mukatikati kwe ng'umba mbeli kwe ng'umba hwulu ya mambo. Mambo wakabe ali gele mu tjigalo tjitje mu ng'umba hwulu ye bushe akalingisana ne nkoba.

²Wakati ebona Nfumakadzi Esita ali mile pakati kwe ng'umba kanshathisa kwazo ngono katambunudza swimbgwana iye ye bushe yaakabe akabhata yakathamiwa nge golide, ngono Esita kasedzela kaibhata ku nsholo.

³Ipapo mambo bakandwa beti, “Kwatini Nfumakadzi Esita? Unoshakani kene? Leba koga, ndowokupa kunolizana ne gwamu le bushe gwangu.”

⁴Esita wakashandula eti, “Tetshi wangu, apa kumushathisa, ndokumbila kuti muzhe ku mabhikwa na Hamani andinowomululwamisa nasi.”

⁵Ngono mambo bakabe beti, “Danani Hamani abuye tjinyolotjo kuti azhe tithame tjinoshakiwa ndi Esita.” Ndizo mambo na Hamani bakayenda ku mabhikwa kuna Esita.

⁶Ngono bakati batja ng'wa nkumbi we zhambi, mambo kabe eti kuna Esita, “Ini tjaunoshaka ndikuthamile itjo? Leba koga ndowokupa kunolizana ne gwamu le bushe gwangu.”

⁷Ngono Esita kashandula eti, “Tetshi wangu apa kumushathisa, ndomukumbila kuti mushingikadze tjandinowokumbila, ndokumbila kuti muzhe na Hamani ku nzano we mabhikwa andinowomululwamisila kakale mangwana, mu tjibaka itjetjo ndipo pandinomubudza tjandinoshaka.”

⁹Zhuba ilelo Hamani wakayenda etshambila pezhugwi akashatha kwazo, koga wakati ebona Modekayi ali pa nkoba wa mambo, asingamilike kene kunlakidza zila imwe koga ye kunteta kazhala bushongola kwazo,

¹⁰koga kazwibhata kasilebe tjimwe ngono kayenda ku nzi uwe kanodana bakwinya babe ne nkadzi uwe Zereshi.

¹¹Ngono Hamani katangisa kuzwikudza mbeli kwabo ngekwe fumwa iye nenge bakololo babe bose. Kababudza ngekwe zila dzose dzaakakudziwa ndi mambo ne nge mamo awe anopinda e makulukota wose ne bashingi bose ba mambo ne kuti bamwe bashingi banafanilo dze kunteta kungapani.

¹²Ngono Hamani kadwilila eti, “Bonani koga na Nfumakadzi Esita akuna mmwe waakoka kuti azhe na mambo ku nzano we mabhikwa kuzhe kwangu koga, ndizo takakokiwa imi na mambo ku zojiwa zwe mangwana.

¹³Nenguba kwakajalo ikoku kose akutondishathisa apa nditjabona Modekayi we Njuta atjipa nkoba we bugalo gwa mambo.”

¹⁴Ngono bakwinya babe ne nkadzi uwe Zereshi bakandwa bakati, “Iti kuthamwe thungamakole ye bulefu gunga bhata makumi mabili ana bubili, ngono mangwana mangwanana ukumbile mambo kuti Modekayi asungiligwe muili, kuti ndizo shule unoja mabhikwa na mambo wakashatha.” Ngono matama iyawa kashathisa Hamani ngono thungamakole ikabakwa.