Read Kalanga Esita 8 Bible Online

Esita 8 - Kalanga bible

Esita 8

¹Mu zhuba ilelo zwalo Mambo Ahasurusi kapa Nfumakadzi Esita zose zwakabe ili zwa Hamani tjita tje Bajuta. Mu tjibaka itjetjo Modekayi kazha mbeli kwa mambo ngobe Esita wakabe atjibudza mambo kuti iye Esita unozwalana tjini na Modekayi.

²Ngono mambo wakatola ring'i ina itempa tjitje yaakabe atola muna Hamani ngono kaipa Modekayi. Kudwapo Esita kabiga Modekayi ntjengeti we thundu dzakabe dzili dza Hamani.

³Ipapo kakale Esita kayenda kunolebeleka na mambo kakale, kaswika kanthingamila ekumbila mambo nge moyo uwe wose kuti mambo amise nkumbulo wa Hamani we Agagi wekuti Bajuta babulawe.

⁴Ngono mambo katambunudzila swimbgwana iye ye bushe yakathamwa nge golide kuna Esita,

⁵ngono Esita kamilika kati, “Tetshi wangu, ha kumushathisa kakale mubona kwakamululwamila kakale muna hanya nami, itini kube ne nkwalo unomisa hwalo dzakakwagwa ndi Hamani we N'agagi nkololo wa Hamedatha, dzaakakwala elaula kuti Bajuta bose bamu ntuthu wa mambo babulawe.

⁶Dumbu, dumbu ndingadzikitadza tjini wale ha bathu bakanyi kwangu ne makamu angu bawigwa nge tjingapa kene?”

⁷Ngono Mambo Ahasurusi kadwa Nfumakadzi Esita na Modekayi we Njuta kati, “Bonani, ndapa Esita thundu ya Hamani, iye wasungiligwa mu thungamakole ngekwe kubulaya Bajuta kukwe.

⁸Ndizo iwe ungakwala ngekwe Bajuta sekwa unoshaka, ube uloba itempa tjimu ring'i yangu, nkwalo wakabigwa itempa tjangu akuna ungautjinyulula.”

⁹Yezwi ndizwakashingikala mu zhuba le bumakumi mabili ana mazhuba matatu mu mwedzi we butatu unodang'wa Sivani: Modekayi wakadana bakwalili ba mambo kalaula kuti bakwalile Bajuta ne batungamili ne balauli ne makulukota e mituthu yose ili zana lina makumi mabili ana ili kutendeka (127), kutangisa mu Indiya kunoti ku Itopiya. Ntuthu mmwe ne mmwe ukwaligwa ne nkwalo nenge lulimi gwawo.

¹⁰Nkwalo wakabe uli mu zina la Mambo Ahasurusi kakale wakabigwa itempa tje ring'i yabo, hwalo dzakatumiligwa nge batumwa be mbizi dzakanaka dzakatogwa muna dze danga le bushe.

¹¹Hwalo idzedzi dzakabe dzipa Bajuta bakabe bali mu mizi yakasiyana siyana simba le kuti bazwigwile ne kukolomodza ne kubulaya babhayani bamwe ne bamwe mu mituthu yakasiyana siyana bangadwa beshaka kubagwisa, babulayilanye kose nenge bakadzi babo ne bana babo ne kubatapila thundu dzabo.

¹²Ndaulo iyeyi yakabe yakafanila shingikadziwa mu mituthu yose ya Mambo Ahasurusi mu zhuba le bugumi lina butatu le mwedzi we bugumi lina mibili unodang'wa mwedzi we Ada.

¹³Ntutshi we tjakabe tjakwagwa wakabe wakafanila kuti upaladziwe uli nlayo mu mituthu yose ne mu njudzi dzose, kuti ndizo Bajuta babe bakazwilulwamisila kubgwilizila zwita zwabo.

¹⁴Ndizo nge ndaulo ya mambo, batumwa bakatola mbizi dze bushe dzina lubilo ngono tjinyolotjonyolotjo ndaulo ikaandamisiwa mu nzi nkulu Susa.

¹⁵Kudwa ipapo Modekayi kamilika pana mambo akaambala hazu ye bushe ye mbala we gova ne butjena ne tjiala tjikulu tje golide ne ngubo yakathamiwa nge jila lakanaka le mbala nshaba wakabondelela. Bathu be nzi nkulu Susa bakabe bakashatha bepululudza.

¹⁶Ngobe Bajuta bakabe balizhele kushatha batjisununguka kakale bekudziwa pamwe ne pamwe.

¹⁷Ngono mu ntuthu mmwe ne mmwe ne mu nzi mmwe ne mmwe wayisiwa ndaulo ne nlayo ya Mambo Bajuta bakabe ne gudzo ne shatho ngono bakathama zhuba le nzano. Ipapo bathu be njudzi dzipoga bakazwidana Bajuta ngobe bakabe botjibatja.