Read Kalanga Kufuluka 1 Bible Online

Kufuluka 1 - Kalanga bible

Kufuluka 1

¹Awa ndiwo mazina e bakololo ba Jakubo bakayenda naye ku Egipiti, mmwe ne mmwe ne nsha uwe.

²Ndi Rubheni na Simiyoni na Levi na Juda,

³Isakari na Zebuluni na Bhenjamini,

⁴Dani na Nafutali, Gadi na Asha.

⁵Bose be lutshinga gwa Jakubo mbalo yabo yakabe ili makumi ali kutendeka (70). Josefa iye wakabe ali ku Egipiti kale.

⁶Ngono Josefa kafa ne bakololo ba tate babe bose ne tjizekugwana tjitje tjose.

⁷Koga Baiziraela bakabe bana mbeleko bewanda ngolibilidza. Bakawanda bakabe banjinji, bakasima, ngono bakazhala shango.

⁸Ngono kukabepo Mambo mu Egipiti usingazibe tjimwe ngekwa Josefa.

⁹Kadwa bathu babe kati, “Bonani, Baiziraela banjisa naiko bakasima kutipinda.

¹⁰Buyani tibalukile mano, banodwa bewanda bebe beti mu nsi ungabe ne ngwa bezwibhatshanya ne zwita zwedu begwa naswi bekotizha bebhuda mu shango iyeyi.”

¹¹Ndizo bakabe bebapa bashingisi kubadziyidza nge kubakombeledza kushinga mishingo inolema. Baiziraela bakabakila Faro mizi ye matula, Pitomu ne Ramese.

¹²Koga kudziyidziwa kwabo kwakati kukula, bakawanda kunyanyisa bakaandama kwakayita kuti Baegipiti batje Baiziraela.

¹³Ndizo Baegipiti bakashingisa Baiziraela kunolema kwakapindilila basingabahwile ngoni,

¹⁴bakathama butjilo gwabo gukabipa nge kubashingisa kunolema bevangisiwa daka ne kuthamisiwa zwitina nenge nshingo mmwe ne mmwe mu minda. Baegipiti bakabe basina ngoni mu mishingo yose inolema yabakabe bebashingisa.

¹⁵Mambo we Egipiti kadwa batshibamisi be Bahebheru, Shifura na Puva kati,

¹⁶“Muti mushinga nshingo wenyu mutshibamisa bakadzi be Bahebheru, bati besununguka, ha mwana ali mbisana mu mbulaye, koga ha ali mwanadi musimbulaye.”

¹⁷Koga batshibamisi ibaba bakabe betja Ndzimu, ngono bakasitongo thama tjabakadwiwa ndi Mambo we Egipiti, bakasibulaye balisana.

¹⁸Ndizo Mambo we Egipiti kadana batshibamisi kababhuzwa kati, “Ini makathama saikoku muletja balisana betjila?”

¹⁹Batshibamisi bakadwa Faro bakati, “Bakadzi be Bahebheru abatonga bakadzi be Egipiti, banotshibama nge bulelu batshibamisi basathu bakaswika pabali.”

²⁰Ndizo Ndzimu ukabhata batshibamisi zubuyanana, ne bathu bakawanda bakasima kwazo.

²¹Ngono se batshibamisi bakabe betja Ndzimu, ndizo Ndzimu ukabathamila zwakanaka ukabapa misha.

²²Ipapo Faro kadwa bathu babe kati, “Mbisana mmwe ne mmwe we Nhebheru wazwagwa munlashile mu gwizi gwe Naili, koga muletje mwanadi mmwe ne mmwe atjile.”