Read Kalanga Kufuluka 11 Bible Online

Kufuluka 11 - Kalanga bible

Kufuluka 11

¹Yahwe bakadwa Mushe bakati, “Nditjowozhisa shamu imwe muna Faro ne mu Egipiti, shule kwa ikoku unowomuletja mukayenda, ha emuletja muyenda, unowomutata tjoselele kuti mudwe ipapa.

²Ulebeleke mu zebe dze Baiziraela bose kuti mmwe ne mmwe akumbile zwithu zwakathamiwa nge siliva ne golide mu mbakidzani naye.”

³Yahwe bakayita kuti Baiziraela batetiwe ne Baegipiti. Pezhugwi kwa ikoku, nlume uwoyu Mushe, wakabe ali nkulu kwazo mu shango ye Egipiti, ne mu mesho e makombgwa a Faro nenge bathu bose.

⁴Ngono Mushe kadwa Mambo kati, “Yahwe bakati, ‘Kowoti kuthubukana kwe masiku kusedzela, ndowopalama Egipiti.

⁵Ngono bakololo bose be mbano dze Baegipiti dzowofa, kutangisa ne mbano ya Faro iye ugele mutjigalo tje bushe, kunoti ku mbano ye nlandakadzi iye umile paduni, nenge zwithuwo zose zwakazwagwa kutanga zowofa.

⁶Ngono kowobe ne tjililo tjikulu tjisakatongobepo naiko tjisingobepo ku tandula shango yose ye Egipiti, kakale.’ ”

⁷Koga na iyo mbgwa aitowobukula Baiziraela kene zwithuwo zwabo, ndiko imwi Faro ne bathu babo Baegipiti kwamunowoziba kuti Yahwe bana shalaulo pakati kwe Baegipiti ne Baiziraela.

⁸Mushe kaligila eti, “Makombgwa wose awo anowozha kundili bebe bendithigamila bendikumbila kuti nditole bathu bangu bose ndizwiyendigwe. Ngono shule kwa ikoku, ndowobhuda ayenda.” Ndizo Mushe kamilika pana Mambo ali zhele bushongola.

⁹Ndizo Yahwe bakadwa Mushe bakati, “Faro angakuteedze, kuyitila kuti, matjenamiso angu awande mu shango ye Egipiti.”

¹⁰Mushe na Aroni bakathama matjenamiso wose iyawa mbeli kwa Faro, ngono Yahwe bakakukutadza moyo wa Faro, ngono kasiletjedze bana be Iziraela bebhuda mu shango iye.