Read Kalanga Kufuluka 12 Bible Online

Kufuluka 12 - Kalanga bible

Kufuluka 12

¹Yahwe bakadwa Mushe na Aroni mu shango ye Egipiti bakati,

²“Woyu ndiwo mwedzi wenyu we kutanga mu mimwedzi, unowobe iwo mwedzi wenyu we kutanga mu gole.

³Budzani gubungano lose le Iziraela woku: Mu zhuba le bugumi le mwedzi iwoyu nlume mmwe ne mmwe atole pkhwizana ye tjibhayilo kene mbudzana inolizana misha yabotate babo, nsha mmwe ne mmwe utole pkhwizana kene mbudzana.

⁴Ha nsha uli ntukununu usingake ukapedza pkhwizana, ipapo nthu ne mbakidzani upejo naye, ngabakobane nge bunji gwe bathu basinobona tjilizanyo tje kuja kwe mmwe ne mmwe.

⁵Zwithuwo izwezwi zwibe zwisina bulema, ibe ili zwilume zwina gole ling'ompela. Mungatola pkhwizana kene mbudzana.

⁶Muilondolodze kuswikila zhuba le bugumi lina kunna le mwedzi iwoyu, ndilo zhuba linowoti gubungano lose le Iziraela likabulaya zwithuwo izwezwi madekwana zhuba langina.

⁷Ipapo banowotola malopa bakaazhodza mu makwasayile e mikoba ye ng'umba yabanobe bejila muili.

⁸Nyama yakafanila jiwa busiku igogo, yakagotjiwa, ne tjiwunga tjisina mbidzo ne zwithu zwinobaba.

⁹Musitongo ija nyama iyeyi isakabidwa kene yakabhikwa nge vula, koga mu ije yakagotjiwa, kose ne nsholo ne makumbo ayo ne zwimukati.

¹⁰Musitongo isiya mukabiga kuswikila tjimuka, yasala kuswikila tjimuka muipise.

¹¹Mowoja sahwoku: Mowobe makazwisunga nge mimwandabula[1], makaambala shangu dzenyu ne midozo yenyu makaibhata, muja ngolibilidza. Ndiko kupinda pezhugwi kwa Yahwe.”

¹²“Mu busiku igogo ndowopalama shango ye Egipiti ngono ndowobulaya mbano dzose mu shango ye Egipiti, dze bathu ne zwithuwo zose zwakazwagwa kutanga. Ndowoloba shamu midzimu yose ye Egipiti. Ndimi Yahwe.

¹³Malopa anowobe tjilakidzo mu ng'umba dzamulimudzili; ngono ndowoti ndibona malopa amupinda ndizo akuna shamu inowomuloba kumulobesa nsi wandinowobe ndiloba shango ye Egipiti.

¹⁴Zhuba ileli libe ikumbuludzo mu muli, mulilondolodze nge nzano unothamigwa Yahwe; kuyenda nge zwizekugwana zwenyu mowolitola lili ikumbuludzo nge kusingapele.”

¹⁵“Mu mazhuba ali kutendeka mowobe muja tjiwunga tjisina mbidzo; zhuba lawo le kutanga muduse mbidzo mu ng'umba dzenyu, ngoti ha kungabe ne mmwe wenyu unowoja tjakabidziwa kudwila mu zhuba le kutanga kuswikila zhuba le kutendeka unodusiwa mu Iziraela.

¹⁶Mu zhuba le kutanga mube ne nshangano wakayengemala ne mu zhuba le butendeka mube ne nshangano wakayengemala. Kusibe ne nshingo unowoshingwa mu mazhuba iyawo, kuzhe kwe kululwamisila bathu zojiwa zwinowojiwa nge mmwe ne mmwe.

¹⁷Mulondolodze Nzano we Tjiwunga tjisina Mbidzo, ngoti mu zhuba ileli ndakadusa njudzi dzenyu mu shango ye Egipiti. Ndizo wali mulondolodze zhuba ileli mu zwizekugwana zose tjili ikumbuludzo nge kusingapele.

¹⁸Mu mwedzi we kutanga, mu zhuba lawo le bugumi lina mazhuba ali manna mu madekwana alo muje tjiwunga tjisina mbidzo, mutjije kuswikila zhuba lawo le bumakumi mabili ana zhuba ling'ompela mu madekwana alo.

¹⁹Mu mazhuba ali kutendeka kusiwang'we mbidzo mu ng'umba dzenyu; ngoti ha kungabe ne unoja tjakabidziwa, ali ntaya kene Iziraela nthu iwoyo unowodusiwa mu gubungano le Iziraela.

²⁰Musitongo ja tjimwe tjina mbidzo, mu magalo enyu wose muje tjiwunga tjisina mbidzo.”

²¹Ipapo Mushe kadana batungamili be Iziraela bose kabadwa kati, “Nsha mmwe ne mmwe uzwishalulile pkhwizana uibhaye ili tjibhayilo tje kupinda pezhugwi.

²²Mutole ntshwailo we ntinyana unoyi hisopu mudubike mu malopa ali mu ndilo, muazhodze pezhugwi kwe dendele ne mu makwasayile mabili e dendele, ngakusitongobe ne mmwe wenyu unobhudila kuzhe kwe ng'umba iye kuswikila tjimuka mangwanana.

²³Yahwe banowopinda benobulaya Baegipiti; ngono banowoti bebona malopa pezhugwi kwe dendele ne mu makwasayile e dendele banowopinda pezhugwi kwe dendele ilelo, abatowoletja unobulaya kubulaya engina mu ng'umba iyeyo kumubulaya.

²⁴Mulondolodze nzano iwoyu uli ikumbuludzo tjenyu ne bana benyu nge kusingapele.

²⁵Ndizo mowoti muswika mu shango yamunowopiwa ndi Yahwe sekwa bakagadzabgwe, mulondolodze nzano iwoyu.

²⁶Ngono bana benyu banowoti bemubhuzwa beti, ‘Nzano iwoyu unodwani kene?’

²⁷Mowodabila muti, ‘Ikoku tjibhayilo tje kupinda pezhugwi kwa Yahwe, ngoti bakapinda pezhugwi kwe ng'umba dze bathu be Iziraela mu Egipiti pabakabe bebulaya Baegipiti koga bakasiya dzedu ng'umba.’ ” Ngono bathu bakakotamisa misholo yabo bakanamata.

²⁸Ipapo bathu be Iziraela bakayenda bakanoshinga sekwa kadwiwa Mushe na Aroni ndi Yahwe.

²⁹Pakati kwe busiku Yahwe bakabulaya mbano dzose mu shango ye Egipiti, kudwa mu mbano ya Faro iye Mambo kunoti mu mbano ye nsungwa wakabe ali mu ng'umba ye busungwa ne zwithuwo zose zwakazwagwa kutanga.

³⁰Faro kamuka busiku iye ne makombgwa awe wose ne Baegipiti bose. Kukabe ne tjililo tjikulu mu Egipiti ngoti kwakabe kusina ng'umba ne ing'ompela isina mbano yafa.

³¹Ndizo kadana Mushe na Aroni busiku kabadwa kati, “Milikani muyende mudwe pakati kwe bathu bangu, imwi mose ne bathu be Iziraela. Yendani munonamata Yahwe sekwa makaleba.

³²Tolani zwithuwo zwenyu sekwa makaleba muyende ngono mundikombolelebo.”

³³Baegipiti bakalibilidzila kudusa Baiziraela mu shango yabo ngoti bakazwidwa bakati, “Tafa tose.”

³⁴Ndizo Baiziraela bakatola fulawa yabo yakavangwa isathu ikabidziwa ili mu ndilo dzayo yakasungigwa mu matyila bakapika.

³⁵Bathu be Iziraela bakabe bathama sekwa bakabe badwiwa ndi Mushe, bakakumbila zwithu zwakathamiwa nge siliva ne golide mu Baegipiti ne zwiambalo.

³⁶Yahwe bakathama kuti bathu be Iziraela batetiwe mu mesho e Baegipiti, ndizo bakathama kuti bawane zwabakabe bakumbila.

³⁷Bathu be Iziraela bakatola gwendo kudwa ku Ramesesi kunoti ku Sukoti. Bakabe bali balume banoyenda nge makumbo bangabe zwiwulu zwili mazana ali matathatu 600 000, kuzhe kwe bakadzi ne bana.

³⁸Kwakabe kuna bathu banjinji bakashangashangana bakayenda nabo ne zwithuwo zwinjinji, ng'ombe ne pkhwizi ne mbudzi.

³⁹Ngono bakabhika zwiwunga nge fulawa yakabe isakabidziwa yabakabhuda nayo mu Egipiti ngoti bakadusiwa mu Egipiti ngolibilidza, kusina tjibaka ne mbuba basatubula kuzwilulwamisila iyo.

⁴⁰Bathu be Iziraela bakagala mu Egipiti makole ali mazana manna ana makole ali makumi matatu (430).

⁴¹Kukati ku bupelo gwe makole iyawa ali mazana manna ana makole ali makumi matatu, mu zhuba ilelo koga bathu ba Yahwe bakabhuda mu shango ye Egipiti.

⁴²Gwakabe guli busiku gwe kulindila gwa Yahwe kubadusa mu shango ye Egipiti. Ndizo ndilo zwalo zhuba linolondolodzegwa Yahwe nge bathu bose be Iziraela kuswikila kuzwizekugwana zwabo.

⁴³Yahwe bakadwa Mushe na Aroni bakati, “Ikoku ikumbuludzo tje Kupinda pezhugwi: Kusitongo ita ntaya unokuja.

⁴⁴Koga nlanda mmwe ne mmwe wakatengwa nge mari ungakuja ha manthumbila kutanga.

⁴⁵Kusitongobe ne nkumbi kene nlanda wakatapiwa unokuja.

⁴⁶Kujigwe mu ng'umba iyeyi yabhikigwa. Musitongo sengela imwe nyama kuzhe kwe ng'umba iyeyo inowobe yabhikigwa muili kakale musitongo ita ne fupa lamunovuna.

⁴⁷Gubungano lose le Iziraela likulondolodze.

⁴⁸Ngono ha kuna ntaya wamukumba eyemula kulondolodza Nzano Kupinda pezhugwi wa Yahwe, balume bose be nsha uwe ngabathumbigwe ndizo kudwa ipapo ungakulondolodza. Unowofanana koga ne Baiziraela. Koga kusitongobe ne nthu usakathumbigwa unokuja.

⁴⁹Kowobe ne nlayo nng'ompela koga pakati kwe nzwale ne ntaya wamukumba ali pakati kwenyu.

⁵⁰Ndizo bathu bose be Iziraela bakashinga kose kwakabe kwadwiwa Mushe na Aroni.

⁵¹Ngono mu zhuba ilelo Yahwe bakadusa bathu be Iziraela mu shango ye Egipiti nge njudzi dzabo.”