Read Kalanga Kufuluka 13 Bible Online

Kufuluka 13 - Kalanga bible

Kufuluka 13

¹Yahwe bakadwa Mushe bakati,

²“Undiyengemadzile bana bose be kutanga, tjimwe ne tjimwe tjinotanga zwagwa tjili tjilume mu Iziraela, tjili tje nthu kene tje ithuwo nde tjangu.”

³Ngono Mushe kadwa bathu kati, “Kumbulani zhuba ileli, la makadwa mu Egipiti, mudwa mu ng'umba ye busungwa. Ndilo zhuba lamakadusiwa nge simba le luboko gwa Yahwe mudusiwa mu busungwa. Kusitongobe ne tjiwunga tjakabidziwa tjinojiwa mu zhuba ileli.

⁴Mobhuda mu Egipiti mu zhuba ileli le mwedzi we kutanga, mwedzi we Abibi.

⁵Yahwe bakatuna kuna bobatategulu benyu kuti banowomupa shango ye Bakanana ne Bahiti ne Baamori ne Bahivi ne Bajabisi, ili shango inowunga nkaka ne butji gwe nyutji, ndizo makafanila londolodza nzano uwoyu mu mwedzi uwoyu.

⁶Muje tjiwunga tjisina mbidzo mazhuba ali kutendeka, mu zhuba le kutendeka kube nzano wa Yahwe.

⁷Mowoja tjiwunga tjisina mbidzo mazhuba ali kutendeka, musitongowanika muna tjiwunga tjina mbidzo, kusitongowanika muna mbidzo mu ntuthu uwo.

⁸Ngono muti nge zhuba le kutanga le nzano mubudze bakololo benyu muti, ‘Tothama ikoku ngobe Yahwe bakatithamila iko muzhuba latakadwa mu Egipiti.’

⁹Ngono kowobe tjilakidzo mu luboko gugo ne ikumbuludzo mu mesho awo kulondolodza nlayo wa Yahwe, nge nlomo wenyu ngobe Yahwe bakakudusa mu Egipiti nge simba le luboko gwabo.

¹⁰Mulondolodze ndaulo iyeyi nge tjibaka tjakalingisana gole ne gole.”

¹¹“Ngono kowoti Yahwe basinomukotosa mu shango ye Kanana, sekwa bakatuna kumuli ne kuna bobatategulu benyu, banomupa ndaulo iyeyi,

¹²unowoshalulila Yahwe zose zwilume zwazwagwa kutanga nge zwithuwo zwizo kube zwa Yahwe.

¹³Donki ndume imwe ne imwe ya zwagwa kutanga unowoidzutunula ne pkhwizana, ha isingadzutugwe ngayivungwe ntshibha. Mbano dzose dze bakololo babo naidzo dzidzutunugwe.

¹⁴Ngono ha misi idwilila, bakololo benyu bemubhuzwa kuti kuthu ikoku kodwani, mubadwe muti, ‘Yahwe bakatidusa mu Egipiti mu ng'umba ye busungwa nge simba le luboko gwabo.

¹⁵Kwakati Faro paakakukutadza moyo elamba tiyenda, Yahwe bakabulaya mbano dzose mu shango ye Egipiti, dzose dze bathu ne zwithuwo zwakazwagwa kutanga. Ndizo tidusila Yahwe tjibhayilo tjimwe ne tjimwe tje ithuwo tje tjilume tjazwagwa kutanga, koga mbano dzose dze bakololo bedu tidzidzutunula.

¹⁶Nzano iwoyo ibe ikumbuludzo kumuli se linga lakaambagwa mu luboko.[2] Kuli kumukumbuludza kuti Yahwe bakatidusa nge simba labo mu Egipiti.’ ”

¹⁷Kukati Faro eletjedza bathu beyenda, Ndzimu ukasibatungamile nge zila ye shango ye Palasitina, nenguba yakabe ili iyo ipejo, ngobe Ndzimu wakati, “Bathu bangadwa beti bebona ngwa bebe beshanduka bebgwilila ku Egipiti.”

¹⁸Koga Ndzimu ukabapoteledza nge zila ye tjilambanyika inoyendila ku Gungwa Shaba. Bathu be Iziraela bakayenda bebhuda mu shango ye Egipiti bakazwilulwamisila ngwa.

¹⁹Mushe katola mafupa a Josefa kayenda nawo, ngobe Josefa wakabe atunisa bathu be Iziraela eti, “Ndzimu unowomusunungula, ngono mube musenga mafupa angu muyende nawo.”

²⁰Bakayenda bedwa mu Sukoti bakanokotokela mu Etamu, pa phelelo dze tjilambanyika.

²¹Ngono Yahwe bakayenda bakabatungamila nge shongwe ye gole kubalakidza zila kuli masikati, busiku bakabatungamila nge bibi le moto kubathamila tjedza kuti ndizo batubule yenda siku ne sikati.

²²Shongwe ye gole masikati kene bibi le moto busiku zwakabe zwisingatsheduke mbeli kwe bathu.