Read Kalanga Kufuluka 15 Bible Online

Kufuluka 15 - Kalanga bible

Kufuluka 15

¹Ipapo Mushe ne Baiziraela bakambila Yahwe lumbo beti: “Ndowombila Yahwe ngoti bakunda kukulu kwazo, baposela mbizi ne ntathi wayo mu gungwa.

²Yahwe ndibo simba langu ne lumbo gwangu. Ndibo Ndzimu wangu, ndowobakudza, ba Ndzimu wa tate bangu ngono ndowobalumbidza.

³Yahwe in'gwi wakasima, Yahwe ndilo zina labo.

⁴“Koloyi dze ngwa dza Faro ne bathu babe bakadzilashila mu gungwa, makombgwa awe ana mamo akanyungila mu Gungwa Shaba.

⁵Mikubila yakabakwitidza, bakawila se bgwe liwila mu dziba lakangina.

⁶“Luboko gwenyu gwe luji Yahwe, gokudzigwa mu simba, luji gwenyu Yahwe, gopkhwanya gukapaladza tjita.

⁷Mokunda banyanyayidzi benyu nge bukulu gwe bushe gwenyu, bushongola gwenyu goja zwita zwenyu se moto upisa mashanga.

⁸Ha mufula nge zwimilo zwenyu vula inokubungana, vula dzinowunga dzoma dzikabe duthu, vula yakangina inowomelela mukatikati kwe gungwa.

⁹Tjita tjakazwidwa tjikati, ‘Ndowobalonda ababhata mu zila, ndowokoba zwandatapa, athama sekwa ndinoshaka, ndowolidza bukanu gwangu, abalobesa nge maboko angu.’

¹⁰Makafula meya yenyu, gungwa gukabakwitidza. Bakanyumbwila se ntodo mu vula inotjisa.

¹¹“Apa ndiupi kene unonga imwi Yahwe, pakati kwe midzimu? Ndiupi unofana imwi, mu bushe gwakayengemala, ungathama makaabadzo ne mishingo mikulu zwingapa?

¹²Makatambunudza luboko gwenyu gwe luji, pasi pakabamidza.

¹³Makatungamila nge ludo gwenyu gusingazunguzike bathu bamakadzutunula, makabapeleka nge simba lenyu ku bugalo gwenyu gwakayengemala.

¹⁴Njudzi dzakahwa ikoku dzikatetema, hana dzikaloba bagali be Filisitiya.

¹⁵Boshe be Edomu bapaluka moyo, batungamili be Moabu bakabhakhwa nge luzhazhamo, bagali bose be Kanana bakapela masimba.

¹⁶Bakawigwa ne hana ne lutjo, ngobona bukulu gwe luboko gwenyu, bakama se bgwe basingazunguzike kudzina bathu benyu imwi Yahwe bepinda, kudzina bathu bamakadzutunula bepinda.

¹⁷Mowobakotosa mukabadzikila mu dombo lenyu, pathu pamakathama bugalo gwenyu, imwi Yahwe, bugalo gwakayengemala, gwamakathama nge maboko enyu imwi Yahwe.

¹⁸Yahwe banowobusa nge kusingapele.”

¹⁹Kwakati mbizi dza Faro ne batathi badzo ne koloyi dzidze dze ngwa dzingina mu gungwa Yahwe bakabuzila vula pezhugwi kwabo, koga Baiziraela bakatjuluka gungwa beyenda pasi pakawoma mukatikati kwe gungwa.

²⁰Ipapo nlebesambelikadzi Miriyamu hazwadzi ya Aroni katola tjilidzo tje thamborini kalidza ngono bakadzi bose bakantobela belidza zwilidzo zwe thamborini bezana.

²¹Ngono Miriyamu kabambila eti: “Mbilani Yahwe ngoti bakunda kukulu kwazo, mbizi ne ntathi wayo kose balashila mu gungwa.”

²²Kudwa ipapo Mushe katungamila Baiziraela kuyenda mbeli kudwa pa Gungwa Shaba. Bakangina mu tjilambanyika bakayenda mu tjili mazhuba matatu basingawane vula.

²³Bakati beswika ku Mara bakasitubule kung'wa vula ye Mara ngoti yakabe ibaba. Ndizo pathu ipapo pakadang'wa kuyi Mara.

²⁴Bathu bakang'ong'ola kwazo kuna Mushe beti, “Towong'wani sangwenu kene?”

²⁵Mushe kalilila kuna Yahwe, ngono Yahwe bakanlakidza nti kavuna lutabi kagulashila mu vula, vula ikazipa.

²⁶Eleba matama awa akalebgwa ndi Yahwe eti, “Ha mungalondolodza tjakalebgwa ndi Yahwe Ndzimu wenyu, ngono mukashinga tjakalulwama mu mesho abo, mukalondolodza milayo yabo mulondolodza ndaulo dzabo, anditowomulonga njigwele idzedzi dzandakalonga Baegipiti, ngoti ndimi Yahwe mpodzi wenyu.”

²⁷Kudwa ipapo bakanoswika ku Elimu kwakabe kuna misenya ye vula ili gumi lina mibili (12) ne miti ye nlala ili makumi ali kutendeka (70), ngono bakathibelela ipapo pa vula.