Read Kalanga Kufuluka 16 Bible Online

Kufuluka 16 - Kalanga bible

Kufuluka 16

¹Gubungano lose le Iziraela likamilika kudwa mu Elimu likangina mu tjilambanyika tje Sini tji pakati kwe Elimu ne Sinai nge zhuba le bugumi lina mazhuba ali mashanu e mwedzi we bubili basinobhuda mu shango ye Egipiti.

²Gubungano lose le Iziraela likang'ong'ola kakale kuna Mushe na Aroni mu tjilambanyika.

³Likati ku bali, “Dzene Yahwe bakabe batibulayila mu shango ye Egipiti titjigele pa hali dze nyama tija zojiwa tiguta, ngoti imwi makatizhisa mu tjilambanyika itjetji kowobulaya itjaba tjose itjetji nge zhala.”

⁴Yahwe ipapo bakadwa Mushe bakati, “Bona, ndowomburudzila tjiwunga kumuli tjidwa kudzimu, ngono bathu bayende banonunga tjakabalizana nge zhuba, kuti ndibone kene banowolondolodza nlayo wangu kene aa.

⁵Nge zhuba le butathatu banunge kwakalizana mazhuba mabili babige.”

⁶Ndizo Mushe na Aroni bakadwa Baiziraela bose bakati, “Mu madekwana mowoziba kuti ndi Yahwe bakamudusa mu shango ye Egipiti.

⁷Mu mangwanana mowobona gudzo la Yahwe ngoti bahwa ng'ong'olo yenyu nge kwabo. Iswi tini kene bamungashwa mung'ong'olela?”

⁸Mushe kabadwa kati, “Ha Yahwe bemupa nyama kuti muje madekwana, mangwanana banowomupa tjiwunga kuti muje mugute, ngoti Yahwe bahwa ng'ong'olo dzenyu dzamakabang'ong'olela. Iswi tini kene? Ng'ong'olo dzenyu adzizolingisana naswi koga dzakalingisana na Yahwe.”

⁹Mushe kadwa Aroni kati, “Idwa gubungano lose le Iziraela uti, ‘Izhani pana Yahwe, ngoti bahwa ng'ong'olo dzenyu.’ ”

¹⁰Ngono kukati Aroni atjalebeleka ne gubungano lose le Iziraela, bakalinga ku tjilambanyika ngono bakabona tjedza tja Yahwe tjiboneka mu gole.

¹¹Yahwe bakadwa Mushe bakati,

¹²“Ndahwa kung'ong'ola kwe Baiziraela, ubadwe uti, ‘Madekwana mowoja nyama, koga mu mangwanana mowogutshiwa nge tjiwunga, ipapo mowoziba kuti ndimi Yahwe Ndzimu wenyu.’ ”

¹³Mu madekwana hwalishanga dzikazha dzikazhala mu buthibelelo; koga mu mangwanana khawa ikawa kose mu buthibelelo.

¹⁴Kukati khawa yapela, kukaboneka kuna kuthu kunonga zwiyengana zwe makaa e vula kwakaandama pasi mu tjilambanyika.

¹⁵Baiziraela bakati bekubona bakabhuzwana bakati, “Ini ikoku?” Bakabe basingazibe kuti ini. Ngono Mushe kabadwa kati, “Nditjo tjiwunga tjamapiwa ndi Yahwe kuti muje.

¹⁶Yahwe bakati: Mmwe ne mmwe wenyu anunge kwakanlizana kuja; nthu anunge buleke kuyendidzane ne mbalo ye be nsha uwe.”

¹⁷Ngono Baiziraela bakathama beijalo; bamwe bakanunga kunji bamwe kushomanana kuyenda nge bunji gwabo.

¹⁸Koga bakati bekuyela nge lithara dzili mbili, bakawana wanunga kuli kunji asina tjajiwa tjikasala, wanunga kushomanana kwanlizana ngoti mmwe ne mmwe anunga kwakanlizana kuja.

¹⁹Mushe kabadwa kati, “Kusibe ne unowokubiga kuswikila tjimuka.”

²⁰Koga bakasihwilile Mushe; kukathama kuti Mushe abazhalile bushongola. Ibabo bakasiya bakabiga kuswikila tjimuka, ngono kukabe ne hwonye kukanuhwa.

²¹Bakabe bekukubunganya mangwanana mamwe ne mamwe, mmwe ne mmwe ekubunganya kwakanlizana kuja, koga kwakabe kuti zhuba alopisa kukanyawuka.

²²Mu zhuba le butathatu bakanunga zwilizanyo zwili zwibili, lithara mbili kabili. Ngono batungamili bose be gubungano bakazha kuna Mushe bakambudza.

²³Mushe iye kati ku bali, “Itjetji nditjo tjakalebgwa ndi Yahwe beti: ‘Mangwana i zhuba le nsi, zhuba lakayengemala le nsi la Yahwe, bhikani tjamungabhika, ngono kunowobe kwasala mukubigile mangwana.’ ”

²⁴Ndizo bakakubiga kuswikila mangwana sekwa bakadwiwa ndi Mushe, ngono kukasitongo bola ne hwonye dzikasibepo mu kuli.

²⁵Mushe kabadwa kati, “Mukuje nasi, nasi i zhuba le nsi we Sabata ya Yahwe, nasi amungakuwane ku shango.

²⁶Mungabe mukununga mu mazhuba ali matathatu, koga mu zhuba le kutendeka, zhuba le nsi, akutowobepo.”

²⁷Mu zhuba le kutendeka bamwe bakabhuda beti banononunga, koga bakawana kusina.

²⁸Yahwe bakabhuzwa Mushe bakati, “Kowotola tjibaka tjingapani mulamba kulondolodza ndayo dzangu ne milayo yangu kene?

²⁹Bona! Yahwe bakamupa nsi we Sabata, ndizo mu zhuba le butathatu banomupa tjiwunga tjakalizana mazhuba mabili; mmwe ne mmwe wenyu agale mu magalo awe, kusiyite unobhuda mu magalo awe nge zhuba le kutendeka.”

³⁰Ndizo bathu bakanyaluluka mu zhuba le kutendeka.

³¹Baiziraela bakakupa zina beti mana; kwakabe kulingika se mbewu ye ntinyana unoyi koriyanda, kuli kutjena ku labilika se tjiwunga tjabhikwa nge butji.

³²Mushe kabadwa kati, “Itjetji nditjo tjakalebgwa ndi Yahwe beti: ‘Mutole lithara yako muibige kuti zwizekugwana zose zwizhe zwibone tjiwunga tjandakamutjidza nditjo mu tjilambanyika pandakamudusa mu shango ye Egipiti.’ ”

³³Ndizo Mushe kadwa Aroni kati, “Tola lukamba ulonge mana ye tjilizanyo tje bulekana muili ube uibiga mbeli kwa Yahwe ibigigwe zwizekugwana zwenyu zose.”

³⁴Aroni kalibiga mbeli kwe Bhokisi le Tjidumano se kwakadwiwa Mushe ndi Yahwe kuti libigiwe.

³⁵Ngono Baiziraela bakatjila beja mana makole ali makumi manna kudzina beswika mu shango inogalika, bakaja mana kudzina beswika ku n'gathu we shango ye Kanana.

³⁶(Tjiyelo tjakabe tjiyegwa natjo tjakabe tjilizana lithara mbili.)