Read Kalanga Kufuluka 17 Bible Online

Kufuluka 17 - Kalanga bible

Kufuluka 17

¹Gubungano lose le Iziraela likadwilidza gwendo kudwa mu tjilambanyika tje Sini liyenda linyaluluka kuyendidzana nge nlayo wa Yahwe, ngono likanokotokela mu Refidimu; koga kwakabe kusina vula inong'wiwa ne bathu.

²Ndizo bathu bakatilika nlandu muna Mushe, ngono bakandwa bakati, “Utipe vula ting'we.” Mushe iye kabashandula eti, “Ini munditilika nlandu? Ini mulika Yahwe?”

³Koga bathu bakabhakhwa nge nyota bakang'ong'ola muna Mushe bakati kunli, “Wakatidusilani mu Egipiti, kowotibulaya nge nyota iswi ne bana bedu ne zwithuwo zwedu kene?”

⁴Ipapo Mushe kalilila kuna Yahwe kati, “Ndingashingani nge bathu ibaba? Bapejo nge kundikikithidza nge mabgwe.”

⁵Ngono Yahwe bakadwa Mushe bakati, “Pindila mbeli kwe bathu, utole bamwe be bakulu be Iziraela; utole ludozo gugo gwawakalobesa gwizi gwe Naili uyende.

⁶Bona! Ndowoma mbeli kuko apaje pezhugwi kwe shongwe ku Horebu, ube uloba shongwe iyeyo, ngono vula inowobhuda muili kuti bathu bang'we.” Ngono Mushe kathama saikoko mu mesho e bakulu be Iziraela.

⁷Ngono kapatumila zina eti Masa na Meriba, ngobe bana be Iziraela bakan'wana nlandu, kakale bakalika Yahwe beti, “Apa Yahwe banaswi kene?”

⁸Ndizo Baamaleki bakazha bakagwa ne Baiziraela ku Refidimu.

⁹Mushe kadwa Joshuwa kati, “Shalula bamwe bedu uyende unogwa na Amaleki; mangwana imi ndowoyenda anoma pezhugwi kwe dombo ndakabhata ludozo gwe Ndzimu nge luboko gwangu.”

¹⁰Ndizo Joshuwa kathama sekwa adwiwa ndi Mushe kagwa ne Baamaleki. Mushe na Aroni na Huri bakatathila pezhugwi kwe dombo.

¹¹Mushe wakabe eti ha akamilidza maboko awe, Baiziraela bekunda, koga ha eliga maboko awe Baamaleki bekunda.

¹²Maboko a Mushe kapelela anyala, ndizo bakatola bgwe bakabiga panli ngono kaligala Aroni kabhata luboko gumwe gwa Mushe, Huri kabhata gumwe ngono maboko awe kadzikama kudzina zhuba lingina.

¹³Ndizo Joshuwa kakunda Amaleki ne bathu babe kabatemelela nge bukanu.

¹⁴Ngono Yahwe bakadwa Mushe bakati, “Kwala ikoku mu lukwalo kube ikumbuludzo ukubalile Joshuwa ngoti ndowothama kuti Amaleki asitongo kumbugwa pasi kwe ntutshi we shango.”

¹⁵Mushe kabaka tjibeso tjinopisigwa zwibhayilo katjidana zina kati, “Yahwe ndibo nkundi.”

¹⁶Edwa kuti, “maboko akabe amilidzigwa ku tjigalo tje bushe tja Yahwe! Yahwe banowogwa na Amaleki kudwa mu tjizekugwana kuyenda ku tjizekugwana.”