Read Kalanga Kufuluka 19 Bible Online

Kufuluka 19 - Kalanga bible

Kufuluka 19

¹Mu mwedzi ugala we butatu Baiziraela babhuda mu shango ye Egipiti, muna ilelo zhuba bakaswika mu tjilambanyika tje Sinai.

²Bakati bamilika mu Refidimu bakaswika mu tjilambanyika tje Sinai bakakotokela mu tjili. Bakakotokela kulingisana ne dombo.

³Mushe katathila pezhugwi ku Ndzimu, ngono Yahwe bakan'dana bali mu dombo bakati, “Etji nditjo tjaunowoleba ku ng'umba ya Jakubo, ubudze bathu be Iziraela uti:

⁴Makabona tjandakathama mu Baegipiti, mukabona sekwa ndakamusumbika nge mapapilo e dzu amuzhisa kundili.

⁵Ndizo ngwenu wali, ha mungandihwa mukalondolodza tjidumano tjangu, mowobe bangu pakati kwe njudzi dzose ngoti shango yose nge yangu.

⁶Mowobe kundili muli bushe gwe bupirisiti muli ludzi gwakayengemala. Awa ndiwo matama aunowobudza bana be Iziraela.”

⁷Ndizo Mushe kazha kadana bakulu be Baiziraela kababudza matama wose iyawa aakadwiwa ndi Yahwe.

⁸Bathu bose bakadabila kang'ompela beti, “Kose kwalebgwa ndi Yahwe towokushinga.” Ndizo Mushe kanobika matama e bathu kuna Yahwe.

⁹Yahwe bakadwa Mushe bakati, “Bona, ndozha ku kuli ndili mu gole laka tizwi, kuti nditi ndilebeleka nawe bathu behwa, kuti ndizo bakugalebgwe kuyendila mbeli.” Ipapo Mushe kabudza Yahwe matama e bathu.

¹⁰Yahwe bakadwa Mushe bakati, “Yenda ku bathu ubatjenapadze nasi na mangwana, ubadwe basuke zwiambalo zwabo.

¹¹Ngono muzwilulwamisile zhuba le butatu, ngono nge zhuba le butatu Yahwe banowodelukila pezhugwi kwe Dombo le Sinai mu mesho e bathu bose.

¹²Ubigile bathu migathu kupoteleka, ubadwe uti, ‘Yelani njele musitongo tathila pezhugwi kwe dombo kene kuli kukutha migathu yalo; iye ungakutha dombo ileli unowobulawa.

¹³Akuna luboko gunowonkutha, koga unowokikithidziwa nge mabgwe kene kabhayiwa nge nsebe, ikoku kowoshingikalila bathu kose ne phuka.’ Koga ha lunyanga gulilila pezhugwi, ndiko bathu kwabanowotathila pezhugwi kwe dombo.”

¹⁴Ndizo Mushe kadeluka dombo kayenda ku bathu kabatjenapadza, ibo bakasuka zwiambalo zwabo.

¹⁵Mushe kadwa bathu kati, “Mube makalulwama nge zhuba le butatu, musitongo shanganyila ngubo ne nkadzi.”

¹⁶Nge zhuba le butatu kukabe ne matutu ne kupenya kwe vula ne gole lakatizwi pezhugwi kwe dombo ne lunyanga gukalilila pezhugwi, ngekwa ikoku bathu bose bamu mishasha bakatetema.

¹⁷Ipapo Mushe kadusa bathu mu mishasha kunoshangana ne Ndzimu, bakayenda bakanoma pa hwunde ye dombo.

¹⁸Dombo le Sinai likakwitidziwa nge busi lose, ngobe Yahwe badelukila pezhugwi kwalo bali mu moto. Busi gwalo gukamilikila pezhugwi se gwe bibi, dombo lose likatengenyeka kwazo.

¹⁹Ngono kukati kulila kwe lunyanga kukulidzika, Mushe kalebeleka ngono Ndzimu bakanshandula nge kudadamula.

²⁰Yahwe bakadelukila pezhugwi kwe Dombo le Sinai, ku tjilungwani tje dombo; ngono Yahwe bakadanila Mushe pezhugwi kwe dombo, ndizo Mushe katathila pezhugwi.

²¹Yahwe bakadwa Mushe bakati, “Delukila pasi unodwa bathu kuti basitongo tjuluka migathu kuwondibona, bunjinji gwabo gungadwa guloba.

²²Bapirisiti banozha pejo na Yahwe na ibobo bazwitjenapadze Yahwe basitongodwa bebaloba shamu.”

²³Mushe kabe eti kuna Yahwe, “Bathu abangatathe Dombo le Sinai ngoti imwi nge kwenyu matidwa mukati, ‘Bigani migathu kupoteleka dombo muliyengemadze.’ ”

²⁴Yahwe bakandwa bakati, “Deluka unobuya na Aroni; koga udwe bapirisiti ne bathu bose basitongotjuluka migathu bezha kuna Yahwe, Yahwe bangadwa bebaloba shamu.”

²⁵Ndizo Mushe kadeluka mu dombo kanobudza bathu tjalebgwa ndi Yahwe.