Read Kalanga Kufuluka 2 Bible Online

Kufuluka 2 - Kalanga bible

Kufuluka 2

¹Ipapo nlume mmwe mu nsha wa Levi kalobola nkadzi we Nlevi

²Nkadzi iwoyo kazwisenga kawana mwana we tjilisana. Kati ebona kuti mwana wakanaka kansumbika mimwedzi ili mitatu.

³Wakati asingatjatubule kunsumbika kanlukila itundu tje lutokwe katjidzulula nge ikontiri. Kabe elonga mwana mukati kwatjo ebe etjibiga pakati kwe shanga dze gwizi mu phili yago.

⁴Hazwadzi ye mwana iwoyo yakabe inlinda ili thambgwana kubona tjinganshingikalila.

⁵Nkololokadzi wa Faro kazha kuwongula mu gwizi, ngono balandakadzi babe bakabe beyenda mu phili dzago. Iye kabona itundu pakati kwe shanga dze gwizi ngono katuma nlandakadzi uwe kunotjitola.

⁶Kati etjifumula kawana mwana mutjili. Mwana wakabe elila ngono iye kanhwila ngoni kabe eti, “Iwoyu wakafanila ali mmwe we bana be Bahebheru.”

⁷Hazwadzi iye ipapo ikabe iti ku nkololokadzi wa Faro, “Ndiyende kene ndinokushakila nledzi mu bakadzi be Bajuta kukulelela iye?”

⁸Nkololokadzi wa Faro kabe eti, “Ee, yenda.” Ndizo mwanadi iwoyo kayenda kanodana mayi be mwana.

⁹Nkololokadzi wa Faro kabe ebadwa eti, “Tola mwana iwoyu undilelele iye, ndowokupa mbhayilo uwo.” Ndizo nkadzi iwoyo katola mwana kanlela.

¹⁰Mwana kati akula, kantola kan'yisa ku nkololokadzi wa Faro ngono iye kantola kanthama nkololo uwe. Kantumila eti Mushe ngoti wakati, “Ndakan'dusa mu vula.”

¹¹ Mu limwe zhuba Mushe atjikula, kabhuda kayenda ku bathu bakanyi kukwe ngono kabona nshingo unolema wabanokombeledzwa. Kabona N'egipiti eloba Nhebheru, mmwe we bakanyi kukwe.

¹²Mushe kalinga yeno na yeno, kati asina waanobona kabulaya N'egipiti kansumbika mu nsetje.

¹³Kati tjimuka etendeleka kakale, kabona Bahebheru babili begwa ngono kabhuzwa wakabe ali nlandu kati, “Unolobelani Nhebheru sawe kene?”

¹⁴Iye kadabila eti, “Ndiani wakakubiga kube nlauli ne nsumikilisi wedu? Unoshaka kundibulaya se kwawakabulaya N'egipiti kene?” Ipapo Mushe kazhigwa ngotja ngono kakumbula eti, “Tjandakashinga tjakafanila tjozibgwa.”

¹⁵Faro kati ehwa ngekwako, kada kubulaya Mushe. Koga Mushe katizha Faro kayenda ku shango ye Midiyani. Kaswika pakabe pana tshime kabe egala pahwunde ne tshime.

¹⁶Mpirisiti we Midiyani wakabe ana bakololokadzi bali kutendeka. Bakazha bakazhadza vula mu migoro kung'wisa pkhwizi ne mbudzi dza tate babo.

¹⁷Bamwe balisi bakazha bakabatata. Mushe kamilika kabagwila kang'wisa pkhwizi ne mbudzi dzabo

¹⁸Bakati bebgwilila kuna tate babo Ruwele, bakabhuzwa beti, “Nasi mabuya tjinyolotjo zwingapa kwatini?”

¹⁹Ibo bakabe beti, “Tagwigwa nge N'egipiti mu balisi, wabuya kating'wisila pkhwizi ne mbudzi dzedu.

²⁰Iye kabhuzwa bakololokadzi babe kati, ‘Ungayi ngono? Mansiyilani kene? Mun'dane awoja zojiwa naswi.’ ”

²¹Mushe kadumana ne kugala ne nlume iwoyo, ngono nlume iwoyo kampa nkololokadzi uwe Ziphora kunlobola.

²²Ziphora kawana mwana we tjilisana, ngono Mushe kantumila zina eti Geshomu, ngoti wakati, “Ndi nzhi mu shango isi ya kanyi kwedu.”

²³Shule kwe tjibaka tjilefu, Mambo we Egipiti kafa. Baiziraela bakabe batjatshinda nge bulanda gwabo belila. Bakalilila Ndzimu ngekwe bulanda gwabo beti ubabhatshe.

²⁴Ndzimu ukahwa kutshinda kwabo ngono Ndzimu ukakumbula tjidumano tjawo na Abhurahama na Isaki na Jakubo.

²⁵Ndzimu ukalinga Baiziraela ukabayitila hanya.