Read Kalanga Kufuluka 20 Bible Online

Kufuluka 20 - Kalanga bible

Kufuluka 20

¹Ngono Ndzimu ukaleba matama wose iyawa ukati,

²“Ndimi Yahwe Ndzimu uwo, iye wakamudusa mu shango ye Egipiti, kudwa mu ng'umba ye bulanda.

³“Usitongobe ne mimwe midzimu ipoga kuzhe kwangu.

⁴“Usitongo zwithamigwa midzimu yakabezhiwa, kene tjili ifano tje tjimwe tje zhuzhugwi, kene tjimwe tjimu shango pasi, kene tjimwe tjimu vula kusi kwe shango.

⁵Usitongo ikotamila kene kuli kuinamata ngoti imi Yahwe Ndzimu uwo ndi Ndzimu una fupa, ndolobela bana shamu milandu ya botate babo kunoti mu tjizekugwana tje butatu ne tje bunna tja ibabo banondibenga.

⁶Koga ndolakidza ludo gusingazunguzike kuna bali zwiwulu banondida banolondolodza milayo yangu.

⁷“Usitongo danila zina la Yahwe Ndzimu uwo suli ngobe Yahwe abatowonshaya nlandu iye unodanila zina labo suli.

⁸“Kumbula zhuba le Sabata kuliyengemadza.

⁹Mu mazhuba ali matathatu ushinge nshingo uwo wose,

¹⁰koga zhuba le butendeka izhuba le kunyaluluka la Yahwe Ndzimu uwo; mu lili usitongo shinga nshingo kene uli upi, iwe kene nkololo uwo kene nkololokadzi uwo kene nlanda uwo kene nlandakadzi uwo kene ng'ombe dzidzo kene mwezi umu nzi uwo.

¹¹Ngoti mu mazhuba ali matathatu Yahwe bakabumba kudzimu ne shango ne gungwa ne zwithu zose zwimu zwili ngono bakanyaluluka mu zhuba le butendeka, ndizo Yahwe bakakombolela zhuba le Sabata kakale bakaliyengemadza.

¹²“Teta tate babo na mmeyabo kuti ndizo mazhuba awo abe manji mu shango yaunopiwa ndi Yahwe Ndzimu uwo.

¹³“Usitongo bulaya.

¹⁴“Usitongo thama bupombgwe.

¹⁵“Usitongo kwiba.

¹⁶“Usitongo pa butendeki gwe manyepkhwa ngekwe mbakidzani uwo.

¹⁷“Usitongo yemula ng'umba ye mbakidzani uwo. Usitongo yemula nkadzi we mbakidzani uwo kene nlandalume uwe kene nlandakadzi uwe kene ng'ombe iye kene donki iye kene tjimwe tje mbakidzani uwo.”

¹⁸Kwakati bathu bebona matutu ne kudadamula kwe vula ne kupenya kwayo ne kulila kwe lunyanga, ne dombo lithungayila busi bakatja bakatetema, ngono bakamila kutjena.

¹⁹Bakadwa Mushe bakati, “Lebeleka naswi iwe, ngono towohwilila, koga Ndzimu usitongolebeleka naswi, tingadwa tifa.”

²⁰Ngono Mushe kashandula bathu eti, “Musitje ngobe Ndzimu wazha kuwomulika kuti ndizo tjiwa kwawo kube mu muli, kuti ndizo musithame tjibi.”

²¹Bathu bakamila kutjena, Mushe iye kabe esedzela pejo ku zhalima lakati zwititi Ndzimu pawakabe ulipo.

²²Yahwe bakadwa Mushe bakati, “Udwe Baiziraela uti, ‘Mazwibonegwa kuti ndalebeleka namwi kudwa kudzimu.

²³Musitongo thama midzimu ye siliva kuibapisa nami, nenguba ili ye golide.

²⁴Undithamile tjibeso tjinopisigwa zwibhayilo nge vu ngono undipile zwibhayilo zwinopisiwa ne zwibhayilo zwe mbakisano zwili zwe pkhwizi dzidzo ne ng'ombe dzidzo mu magalo mamwe ne mamwe kwandinothama zina langu kuti likumbugwe. Ndowozha ku kuli akukombolela.

²⁵Koga ha undithamila tjibeso tjinopisigwa zwibhayilo nge mabgwe, usitongo tjibaka nge mabgwe akabezhiwa, ngoti aumilidzila mbezhwana iyo pezhugwi kwalo walitemapadza.

²⁶Usitongotathila pezhugwi kwe tjibeso tjangu tjinopisigwa zwibhayilo nge zwitubhu kuti mbujo iyo isibe patjena pezhugwi kwatjo.’ ”