Read Kalanga Kufuluka 22 Bible Online

Kufuluka 22 - Kalanga bible

Kufuluka 22

¹“Nthu ha angakwiba ng'ombe kene pkhwizi ebe eibulaya kene eitengesa, ngaalipe ng'ombe yaakwiba nge ng'ombe dzili shanu, alipe pkhwizi yaakwiba nge pkhwizi dzili nna.

²Ha mbava ingabhakhwa ikwiba ngono ibe ilobgwa kwainofa, mbulayi aana nlandu we kutebula malopa,

³koga ha kungashingikala zhuba labhuda, mbulayi una nlandu we kutebula malopa.” Ngaalipe tjaakwiba, ngono ha asina tjaanatjo ngaatengesiwe etengesegwa bubava gugwe.

⁴“Tjakwibiwa ha tjingawang'wa mu mbava tjitjatjila, ingabe ili ng'ombe kene donki kene pkhwizi ngaalipe kabili themba yatjo.”

⁵“Nthu ha angafudza zwithuwo zwizwe mu minda kene ebe ezwiletja zwinoja minda ye mmwe nthu wakafanila alipe nge zwadwa mu minda iye kene mu nnda uwe we zhambi zwashalugwa zwinopinda zwimwe zose.

⁶“Shango ha ingatshwa, moto ukapisa mathunde akavung'wa kene atjimile mu minda kene nnda ungatshwa wose, iwoyo wapisa shango ngaalipe tjinyikilo nge buzhalo.

⁷“Ha nthu angapa mbakidzani uwe mari awe kene thundu iye kuti ambigile, ngono kube kukwibiwa, mbava ibe ibhakhwa ngailipe kabili themba ye tjayakwiba.

⁸Ha mbava isabhakhwa, mweni we ng'umba unowozha pejo ne nsumikilisi kulakidza kuti ungabe asalonga luboko gugwe katola thundu ye mbakidzani uwe.

⁹“Mu kubangilana, kungabe kwe ng'ombe kene donki kene pkhwizi kene tjiambalo kene tjimwe ne tjimwe koga tjingabe tjamila, tjibangigwang'wa, ndebo ye bubili igogu gwakafanila kuizhisa mbeli kwe Ndzimu, ngono iye unowowang'wa ali nlandu nge Ndzimu alipe mbakidzani uwe themba kabili.

¹⁰“Ha nthu angasayidza ikamu tjitje donki kene ng'ombe kene pkhwizi kene ithuwo tjimwe koga kuti antjengetele itjo, tjibe tjifa kene tjikubala kene tjibe tjitapiwa kusina unobona,

¹¹ndebo ngaipedziwe ngotuna mbeli kwa Yahwe kulakidza kuti wasayidziwa aazolonga luboko kazwitolela thundu ye ikamu tjitje ndizo, mweni ngaamutjile ikoko, ngaasitongolipa mweni watjo tjinyikilo.

¹²Koga ha kwakwibiwa munli ngaalipe mweni wayo.

¹³Ha yakabulawa nge zwibandana ngaaizhise ibong'we kube ne butendeki, ha aatowomisa tjakabulawa nge zwibandana.

¹⁴“Ha nthu angaadzima ithuwo mu mmwe tjibe tjikubala kene tjifa tjisi mu maboko e mweni watjo watjiadzima ngaatjilipe.

¹⁵Ha mweni watjo akabe alipo, tjisilipiwe, ha tjakabe tjaadzimiwa nge mari themba yatjakaadzimiwa ndiyo ngaailipe.

¹⁶“Nlume ha angatjebela mwanadi usakabigilidziwa ebe ewalilana naye, unowondusila malobolo ngono ebe enthama nkadzi uwe.

¹⁷Koga ha tate be mwanadi bangalamba kunlobodza nlume iwoyu, unowodusa mari anolizana ne malobolo e bumwanadi.

¹⁸“Usitongo letja nloyi katjila.

¹⁹“Kene ali ani ungalala ne ithuwo ngaabulawe.

²⁰“Kene ali ani unodusila mmwe ndzimu upoga zwibhayilo kuzhe kwa Yahwe koga ngaalobesiwe.

²¹“Usitongo thamila ntaya tjimwe tjakabipa kene kuli kuntshambilidza ngoti imwi makabe muli bataya mu Egipiti.

²²Usitongo dziyidza tjilikadzi kene siyang'wa.

²³Ha ungabadziyidza ngono ibo bebe belilila kundili, nge malebeswa ndowohwa tjililo tjabo;

²⁴ngono ndowozhala bushongola ndibe ndimubulaya nge thumo, bakadzi benyu banowobe tjilikadzi ne bana benyu bakasibe na botate.

²⁵“Ha ungaadzima mmwe we bathu bangu ali nshayi mari, usitongo zwithama n'adzimi unoshaka mmwiso, usitongo shaka mmwiso munli.

²⁶Ha ungatola tjiambalo tje ikamu tjitjo utjibhatila kuti akulipe ukompa itjo, kuti zhuba lisathu langina umpe itjo

²⁷ngoti nditjo koga tjaanofuka, nditjo ifuko tjitje, ungalala akafukani kene? Ha angalilila kundili ndowohwa ngoti ndina ngoni.

²⁸“Usitongo gongobola Ndzimu, kene kuli kutuka mbusi we bakanyi kwenyu.

²⁹“Musitongo nonoka kudusa zwipo ha mavuna ne mashaba nkumbi wenyu. “Mbano dzenyu dze tjilisana mundipe idzo.

³⁰Mowothama saikoko nge ng'ombe ne pkhwizi dzenyu, zose zwilume zwigale na bomayi bazo mazhuba ali kutendeka, muna le buzhanakadzi muzwizhise kundili.

³¹“Mowobe bathu bakayengemala kundili, ndizo amutowoja nyama ye tjabulawa nge zwibandana mu shango, muiposele ku mbgwa.”