Read Kalanga Kufuluka 23 Bible Online

Kufuluka 23 - Kalanga bible

Kufuluka 23

¹Usitongo pa mbiko ye manyepkhwa. Usitongo zwizwadzanya ne nthu mbiimbi kube ntendeki we manyepkhwa.

²Usitongo salana shule nge mbunga kunoshinga mbipo, kene kuli kumila manyepkhwa mu lubazhe uyenda nge mbunga kulashisa kutambunuka.

³Usitongo lelekela ntome butendeki gwe nshayi mu lubazhe.

⁴“Ha ubona ng'ombe kene donki ye tjita tjitjo yalashika, uibgwilize kutjili.

⁵Ha ubona donki ye unokubenga yawa nge mitolo, usitongoyisiya yakajalo, umbhatshe kuimusa.

⁶“Usitongo pambusa ndulamo yakalingisana ne nshayi uwo mu ndebo.

⁷Ube kutjena nge ndebo ye manyepkhwa, usitongo bulaya nthu usina nlandu kene nlulwami, ngoti imi andingaletje nthu mbiimbi.

⁸Usitongo amutjila tjizwimba nlomo ngoti tjopofupadza banobona, tjikapambusa bamu zila yakalulwama.

⁹“Usitongo tshambilidza ntaya, ngoti unoziba kuti kube ntaya kodwani ngoti wakabe uli ntaya mu Egipiti.

¹⁰“Ulime nnda uwo makole ali matathatu uvuna zwidzwalo zwawo.

¹¹Koga mu gole le butendeka uuletje unyaluluke ulaluke usaling'wa kuyita kuti bashayi pakati kwe bakanyi kwenyu baje muuli, kwabasiya phuka dze shango dzije. Mowothamabo minda dzenyu dze mizhambi muijalo kose ne ye ntoba.

¹²“Mu mazhuba ali matathatu ushinge nshingo uwo, koga mu zhuba le butendeka unyatutuke, kuyita kuti ng'ombe iyo ne donki iyo zwinyatutuke ne kuti simba le nkololo we nlandakadzi uwo nele ntaya ugele nawe libuye.

¹³“Uyele njele zwithu zose zwandaleba ku kuli, musitongo buya mukadana mazina e midzimu mimwe kene kuli kuhwika tjimwe nge kwayo tjibhuda mu milomo yenyu.

¹⁴“Katatu mu gole mundithamile nzano.

¹⁵Mulondolodze Nzano we Tjiwunga tjisina Mbidzo sekwa ndakamudwa, muje tjiwunga tjisina mbidzo mazhuba ali kutendeka nge tjibaka tjakalingisana mu mwedzi we Abibi ngoti makabhuda mu Egipiti ndiwo. Kusibe ne nthu unozha mbeli kwangu akalembedza maboko.

¹⁶“Muthame nzano we kuvuna zwitshwa zwe tjamakalima. “Muthame nzano we kuvuna ku bupelo gwe gole ha mokubunganya zwamakalima mu minda.

¹⁷Katatu mu gole balume bose mu muli bazhe pana Yahwe Ndzimu.

¹⁸“Usitongo pilanya malopa e tjibhayilo tjangu ne tjimwe tjingabe tjakalongwa mbidzo. Kakale usitongo biga mafuta e tjabhayigwa nzano wangu kuswikila tjimuka.

¹⁹“Zwe zhizha zwe kutanga mu zwitshwa zwe nnda uwo, uzwizhise ku ng'umba ya Yahwe Ndzimu uwo. “Usitongo bhika mbudzana nge nkaka wa mayi bayo.

²⁰“Bonani, ndotuma ntumwa we kudzimu mbeli kwenyu kumutjengeta mu gwendo ne kumuyisa ku bugalo gwandakalulwamisa.

²¹Mun'yele njele, munhwilile, musitongo mpandukila ngobe aangamuzwiibhatigwe matjinyo enyu ngoti zina langu limu nli.

²²Koga ha mu teedza hwi lile nge njele mushinga kose kwandinoleba, ipapo ndowobe tjita tje zwita zwenyu abe nnyanyayidzi ku banyanyayidzi benyu.

²³Ntumwa wangu unowoyenda mbeli kwenyu, unowomuyisa ku Baamori ne Bahiti ne Baperizi ne Bakanana ne Bahivi ne Bajebusi, imi ndowobalobesa.

²⁴Musitongo namata midzimu yabo kene kuli kuyishingila kene kutobela zwiyito zwabo, muyikolomodze kakale mupkhwanye mabgwe abo akayengemala abe zwikwetjekwetje.

²⁵Munamate Yahwe Ndzimu wenyu ngono ndowokombolela zojiwa zwenyu ne vula yenyu, ndowodusila kutjena njigwele dzipakati kwenyu.

²⁶Akuna nkadzi unowosheta kene usingowowana mbeleko mu shango yenyu. Ndowothama kuti utjile butjilo guzhele.

²⁷“Ndowozhisa kutjisa kwangu mbeli kuko, ndowohwumanya bathu bose bamunowoshangana nabo, abuya athama zwita zwenyu kuti zwimutizhe.

²⁸Ndowotumila phuzephuze mbeli kuko dzinowotata Bahivi ne Bakanana ne Bahiti mbeli kuko.

²⁹Anditowobatata mbeli kuko mu gole ling'ompela kuyita kuti shango isitongo dwa ibe tjilambanyika zwibandana zwe shango zwidwa zwiwanda zwimukulila.

³⁰Ndowobadusa kutukununu ne kutukununu pamuli kudzina muwanda muthuwa shango.

³¹Ndowotjeka n'gathu we shango yenyu kudwa pa Gungwa Shaba kunoti ku gungwa le Bafilisitiya ne kudwa mu tjilambanyika kunoti ku gwizi gwe Yufuratesi. Ndowolonga bagali be shango iyeyi mu maboko enyu ngono mowobatata pamuli.

³²Usitongo thama tjidumano nabo kene ne midzimu yabo.

³³Basitongo gala mu shango yenyu, ngobe bangadwa bethama kuti munditjinyile, ngoti ha munganamata midzimu yabo, lowobe labe bhuzhu kumuli.”