Read Kalanga Kufuluka 25 Bible Online

Kufuluka 25 - Kalanga bible

Kufuluka 25

¹Yahwe bakadwa Mushe bakati,

²“Idwa Baiziraela bandidusile tjipo. Undiamutjilile tjipo mu mmwe ne mmwe unondidusila tjipo nge moyo ntjena.

³Zwipo zwaunowoamutjila mu bali ndi yezwi: Golide ne siliva ne phangula,

⁴ne jila le mbala we gova ne le mbala nshaba ne bushaba gwakabondelela ne jila lakathang'wa nge bukuse gwe mbudzi,

⁵ne makukuta e nyundo akatakiwa bushaba ne e mbudzi ne mapango akasima e n'wunga,

⁶ne mafuta e mavone ne mafuta e motsha anozhodziwa ne motsha unonuhwisa zwinozipa,

⁷ne mabgwe anoyi onikisi ne mabgwe anonamatidziwa mu efodi ne e khiba ye ifuba.

⁸Ngabandibakile bugalo gwakayengemala kuti ndigale pakati kwabo.

⁹Uithame iyendidzane ne mbumbiko ye bugalo gwe Ndzimu gwandinowokulakidza naizo zose zwija zwayo, uzwithame saikoko.

¹⁰“Muthame bhokisi le makwasayile e n'wunga le bulefu gungapa thambo mbili, bupabi guli thambo ing'ompela ina gaswa.

¹¹Mulidzulule nge golide mukati na kuzhe, muthame mpeto nge golide kulipoteleka.

¹²Mulithamile milipo ili minna ye golide uilonge mu zwibhali zwalo zwi nna, milipo mibili ibe mu lubadu gumwe, mibili ibe mu gumwe.

¹³Muthame mapango e n'wunga muadzulule nge golide.

¹⁴Mapango iyawa muashomeke mu milipo imu hwunde dze bhokisi mulisenge ndiwo.

¹⁵Mapango iyawa agale mu milipo iyeyo asitongo dusiwa.

¹⁶Mu bhokisi ilelo ulonge tjidumano tjandinowokupa.

¹⁷“Ube uthama tjigalo tje ngoni tje golide mbuyanana, bulefu gwatjo gube thambo dzili mbili, bupabi igo gube thambo ing'ompela.

¹⁸Uthame kherubhu dze golide dzili mbili, udzithule ube udzimisa ku midzibo mibili ye tjigalo tje ngoni.

¹⁹Uthame kherubhu ku ndzibo we tjigalo tje ngoni, imwe ithame ku mmwe ndzibo, udzibhatshanye ne tjigalo tje ngoni dzibe ku midzibo yatjo.

²⁰Dzikherubhu idzedzi dzitambunudzile mapapilo pezhugwi kwe tjigalo tje ngoni dzitjisitile nge mapapilo adzo, njiso dzadzo dzilingisane dzakalinga ku tjigalo tje ngoni.

²¹Ubige tjigalo tje ngoni pezhugwi kwe bhokisi ngono mu bhokisi ulonge tjidumano[3] tjandinowokupa.

²²Ipapo ndipo pandinowoshangana nawe. Ndowolebeleka nawe ndili pezhugwi kwe tjigalo tje ngoni pakati kwe dzikherubhu mbili dzi pezhugwi kwe Bhokisi le Tjidumano, ndowolebeleka nawe zose zwandinowokupa uli nlayo ku Baiziraela.

²³“Uthame tafuli nge makwasayile e n'wunga, bulefu gwayo gube thambo mbili, bupabi gube thambo ing'ompela, bulefu kuyenda pezhugwi gube thambo ina gaswa.

²⁴Uidzulule nge golide ube uthama mpeto we golide kuipoteleka.

²⁵Uyithamile ikombeledzo tje bupabi gungapa gwe tjiazha ne mpeto we golide kupoteleka ikombeledzo.

²⁶Uithamile milipo minna ye golide mu midzibo yayo minna kulingisana ne makumbo ayo manna.

²⁷Milipo iyeyi ibe pejo ne ikombeledzo kubhata mapango anoshingisiwa kusenga tafuli iyeyi.

²⁸Uthame mapango e n'wunga uadzulule nge golide abe iwo aunosengesa tafuli.

²⁹Uithamile ndilo ne ndigwana dzinopisila motsha ne mapepe ne ndilo hwulu dzinoshingisiwa mu tjipo tje tjing'o, zose uzwithame nge golide.

³⁰Ubige tjiwunga tje Ndzimu pa tafuli mbeli kwangu misi yose.

³¹“Uthame tjigadziko tje mavone nge golide mbuyanana. Bhato ne mmbili watjo zwithamiwe nge golide yakathugwa, thabi dzatjo ne zwilongwana zwatjo ne maluba akatjinakisa zwibe zwakabhatana natjo.

³²Kube ne thabi dzili tathatu mu tjigadziko itjetji tje mavone, thabi thatu dzibe mu lubizho gumwe, dzimwe thatu dzibe mu gumwe.

³³Lutabi gumwe ne gumwe gube ne zwilongwana zwili zwitatu zwinofanana ne luba linoyi alimondi, tjimwe ne tjimwe tjibe ne lutabi gwatjo. Thabi dzose dzili tathatu dzinodwa mu mmbili we tjigadziko tje mavone dzibe ne zwilongwana zwakajalo.

³⁴Mu tjigadziko tje mavone nge kwatjo kube ne zwilongwana zwili zwinna zwakathamiwa se maluba e alimondi zwina thabi dzazo ne maluba azo.

³⁵Kube ne zwilongwana kusi kwe thabi dzimwe ne dzimwe mbili dze thabi dzili tathatu dzinodwa mu tjigadziko tje mavone.

³⁶Zwilongwana ne thabi dzazo zwibe zwakabhatana kuli tjithu tjing'ompela, kose kuli kuthu kung'ompela kwakathamiwa nge golide mbuyanana yakathugwa.

³⁷Utjithamile mavone ali kutendeka. Mavone iyawa abigwe nge zila inowoti kavoneka tjibata tjimbeli kwawo.

³⁸Zwinoshingisiwa kubhatidza mavone ne ndigwana dzazo zwithamiwe nge golide mbuyanana.

³⁹Tjigadziko itjetjo ne zwishingisiwa zwatjo zose zwithamiwe nge golide ye tjilizanyo tjingapa talenta.

⁴⁰Ndizo ubone kuti unozwithama kuyendidzana nge ndongoloso yawalakidziwa pezhugwi kwe dombo.