Read Kalanga Kufuluka 26 Bible Online

Kufuluka 26 - Kalanga bible

Kufuluka 26

¹“Uthame bugalo gwe Ndzimu ne zwisitilo zwili gumi zwakalukwa zwina mmbala we gova ne wakashanganyila bushaba ne gova ne bushaba gwakabondelela zwakanakisiwa nge zwifano zwe dzikherubhu.

²Zwisitilo izwezwi zwibe zwilizana nge bulefu nenge bupabi. Bulefu gwazo gube thambo dzili gumi lina mbili (12), bupabi gube thambo dzili mbili.

³Ubhatshanye zwisitilo zwili zwi shanu, zwimwe zwi shanu uzwibhatshanyebo.

⁴Uthame zwishwe nge jila le mmbala we gova ku ndzibo utjakuzhe kwe isitilo pana mpeto, uthame kunofanana mu tjishwe tje bubili pana mpeto.

⁵Uthame zwishwe zwili makumi ali mashanu (50) mu ndzibo we zwisitilo zwi shanu zwakabhatana ne mu ndzibo we zwimwe zwili makumi mashanu (50) zwakabhatana. Zwishwe izwezwi zwilingisane.

⁶Uthame zwihweko zwili makumi mashanu (50) nge golide ubhatshanye zwisitilo izwezo ndizo kuyita kuti bugalo gwe Ndzimu gube tjithu tjing'ompela.

⁷“Uthame zwimwe zwisitilo nge mawuri e mbudzi zwinowobe buthulilo gwe bugalo gwe Ndzimu, uthame zwili gumi lina kung'ompela (11).

⁸Bulefu gwe tjisitilo tjing'ompela gube thambo dzili gumi lina dzili shanu (15), bupabi gube thambo mbili. Tjisitilo tje bugumi lina kung'ompela tjilizane ne zwimwe nge bulefu nenge bupabi.

⁹Ubhatshanye zwisitilo zwili zwishanu, ube ubhatshanya zwimwe zwitathatu, tje butathatu utjipete kabili pa nkoba we nshasha.

¹⁰Uthame zwishwe zwili makumi mashanu (50) mu ndzibo we tjisitilo tjikubupelo gwe mbha we kutanga, zwibhatshanyiwe ne ndzibo we zwimwe zwili makumi mashanu mbha we bubili (50).

¹¹“Ube uthama zwihweko zwili makumi mashanu (50) nge phangula uzwishomeke mu zwishwe ubhatshanye nshasha ube tjithu tjing'ompela.

¹²Ntome kwasala kwe zwisitilo zwe nshasha, gaswa le isitilo lasala lilembeleke shule kwe nshasha we Ndzimu.

¹³Makaswa mabili e thambo e bulefu gwe isitilo asale akalembeleka mu lubadu wogu na woguja gwe bugalo gwe Ndzimu agufukidze.

¹⁴Uthulile nshasha nge makukuta e nyundo akasukiwa katakiwa bushaba gwakabondelela ne tjisitilo tjakuzhe tje makukuta e mbudzi.

¹⁵“Uthame mbakililo ye bugalo gwe Ndzimu nge makwasayile e n'wunga alimile akatambunuka.

¹⁶Bulefu gwe gwasayile ling'ompela gube thambo dzili gumi lina dzili shanu (15), bupabi kube thambo inagaswa.

¹⁷Gwasayile limwe ne limwe le mbako ngalibe ne zwibhali zwili zwibili kuti lishangane ne mamwe. Dzose mbakililo dze bugalo gwe Ndzimu udzithame saikoku.

¹⁸Uthame makwasayile e bugalo gwe Ndzimu, uathame ali makumi mabili (20) ku lubizho gwe burwa,

¹⁹kusi kwe makwasayile iyawa uthame zwigadziko nge siliva zwili makumi manna (40), zwigadziko zwibili zwibe kusi kwe gwasayile limwe ne limwe kuyendidzana ne zwibhali zwayo zwibili.

²⁰Ku lubizho guku bunandzwa gwe nshasha we Ndzimu uthame makwasayile e bugalo gwe Ndzimu ali makumi mabili (20)

²¹ne zwigadziko zwawo zwe siliva zwili makumi manna (40), zwigadziko zwibili zwili kusi kwe gwasayile limwe ne limwe.

²²Shule kwe bugalo gwe Ndzimu ku golombedzo uthame makwasayile ali matathatu,

²³tjashule ube uthama makwasayile ali mabili mu midzibo ye bugalo gwe Ndzimu,

²⁴abape tja pasi koga abhatane pezhugwi mu tjilungwane tjing'ompela, wose athamwe saikoku, athame midzibo mibili.

²⁵Kube ne mbakililo dzili zhanakadzi ne zwigadziko zwadzo zwe siliva zwili gumi lina zwili zwitathatu (16) zwigadziko zwibili zwili kusi kwe mbakililo ing'ompela, zwibili zwili kusi kwe imwe.

²⁶“Uthame mbalilo dze n'wunga dzili shanu mu lubadu gumwe gwe mbakililo dze bugalo gwe Ndzimu,

²⁷ube uthama dzimwe dzili shanu mu gumwe lubadu gwe mbakililo dze bugalo gwe Ndzimu ne dzimwe mbalilo shanu ku golombedzo shule kwe bugalo gwe Ndzimu.

²⁸Lubalilo gunothubula na pakati gutangise panodwila nshasha we Ndzimu kunoti paunopelela.

²⁹Udzulule mbakililo nge golide ube uthama zwibhali uzwidzulule nge zwinobhata mbalilo idzedzi ube udzidzulula nge golide.

³⁰Bugalo gwe Ndzimu igogu ugubake kuyendidzana nge ndongoloso yawakalakidziwa pezhugwi kwe dombo.

³¹“Uthame isitilo nge jila buya lakalukwa nge misungwana ye mbala we gova ne ye bushaba gwakabondelela ne jila buya lakakoshiwa likalukwa nge bunyambi, linakisiwe nge zwifano zwe dzikherubhu.

³²Ube ulilembeledza mu zwihweko zwe mapango manna e n'wunga akadzulugwa nge golide amile mu zwigadziko zwe siliva.

³³Ulembeledze tjisitilo mu zwibhali ube uzhisa bhokisi le butendeki tje mukati, isitilo tjibe tjithubukanya bugalo gwakayengemala ne gwakayengemala kupindisa.

³⁴Ubige tjigalo tje ngoni pezhugwi kwe bhokisi le butendeki mu Bugalo gwakayengemala kupindisa.

³⁵Ubige tafuli kuzhe kwe tjisitilo ku bunandzwa ngwe bugalo gwe Ndzimu, tjigadziko tje mavone utjibige ku burwa tjilingisane ne tafuli.

³⁶“Uthamile nkoba we nshasha tjisitilo tje jila buya lakalukwa nge misungo ye mmbala we gova ne ye mmbala nshaba kwakabondelela ne jila buya lakakoshiwa likalukwa nge nnali.

³⁷Tjisitilo itjetji utjithamile mapango ali mashanu e n'wunga uadzulule nge golide uathamile zwihweko zwe golide ne zwigadziko zwishanu zwe phangula.