Read Kalanga Kufuluka 27 Bible Online

Kufuluka 27 - Kalanga bible

Kufuluka 27

¹“Ubake tjibeso tjinopisigwa zwibhayilo nge mapango e n'wunga bulefu gwatjo gube thambo mbili ne bupabi gwatjo gube thambo mbili, bulefu ne bupabi gwatjo zwilizane, bulefu kuyenda pezhugwi gube thambo mbili dzina gaswa.

²Utjithame tjibe ne nyanga dzakabhatana natjo mu midzibo yatjo minna, ube utjidzulula nge phangula.

³Utjithamile hali dzinowola nlota ne maharawo ne zwikutili ne mbambo dzinobhaya nyama ne makambana e moto, zose uzwithame nge phangula.

⁴Utjithamile sefo ye phangula ina milipo minna mu midzibo yatjo minna.

⁵Uilonge kusi kwe midzibo ye tjibeso tjinopisigwa zwibhayilo ideluke inoma pakati kwe bulefu gwe tjibeso tjinopisigwa zwibhayilo.

⁶Utjithame ne mapangwana e n'wunga, uadzulule nge phangula

⁷Mapangwana iyawa ashomekwe mu milipo, kuti abe mu wunde mbili dze tjibeso tjinopisigwa zwibhayilo patjinobe tjosengwa.

⁸Utjithame tjibe ne mukati, utjithame nge makwasayile tjibe sekwa wakalakidziwa mu dombo.”

⁹“Ubake bhakasa le bugalo gwe Ndzimu. Bulefu gwe lubizho gwe burwa gube thambo dzili makumi manna ana nna (44) gwakathamiwa nge matyila akalembeleka akathamiwa nge jila buya lakalukiwa.

¹⁰Phanda idzedzi dzisimisiwe nge mapangwana ali makumi mabili (20) ana zwigadziko zwili makumi mabili (20) zwe phangula koga zwihweko zwe mapangwana ne zwisimiso zwawo zwibe zwe siliva.

¹¹Lubizho gwe ku bunandzwa naigobo gube ne isitilo bulefu gwatjo guli makumi manna (40) e thambo, guna matyila akalembeleka, guna phanda dzili makumi mabili (20) mu zwigadziko zwili makumi mabili (20) zwe phangula zwina zwihweko ne zwisimiso zwe siliva.

¹²Bupabi gwe bhakasa gwe ku golombedzo gube ne zwisitilo zwe bupabi guli thambo dzili makumi mashanu (50) guna matyila akalembeleka akasimisiwa nge phanda dzili gumi ne zwigadziko zwili gumi (10).

¹³Bupabi ku lubizho gwe ku bhezhuba mbeli kwe bhakasa gube makumi mabili ana mbili (22) e thambo.

¹⁴Zwisitilo zwakalembeleka ntome kwe nkoba zwikwebe bulefu gungapa thambo dzili tathatu dzina gaswa zwibe ne phanda dzili thatu dzina zwigadziko zwitatu.

¹⁵Mu lubizho gumwe zwisitilo zwakalembeleka zwibe thambo dzili tathatu dzina gaswa dzina phanda thatu ne zwigadziko zwitatu.

¹⁶Nkoba we bhakasa uuthamile isitilo tje bulefu gungapa thambo dzili zhanalume tjina mbala we gova ne wakashanganyila bushaba ne gova ne bushaba gwakabondelela tje jila buya lakalukiwa likanakisiwa nge thali. Tjithamigwe phanda nna dzina zwigadziko zwinna.

¹⁷Phanda dzose dze bhakasa dzipharegwe nge siliva, zwibhali zwadzo zwibe zwili zwe siliva, zwigadziko zwadzo zwibe zwe phangula.

¹⁸Bulefu gwe bhakasa gube thambo dzili makumi manna ana kunna (44), bupabi gube thambo dzili makumi mabili ana kubili (22), bulefu kuyenda pezhugwi gube thambo dzili mbili dzina gaswa ne zwisitilo zwe matyila mabuya akathamiwa nge jila lakalukwa, zwigadziko zwibe zwe phangula.

¹⁹Zwija zose zwe bugalo gwe Ndzimu zwinoshingisiwa mu mishingo yakasiyana ne mbambo dzose dzawo ne dze bhakasa zwithamiwe nge phangula.

²⁰“Udwe Baiziraela uti bakuzhisile mafuta e thoba dzakakhwiwa mbuyanana kushingisiwa mu luvone, kuti luvone gugadziwe ipapa guthuta tjibaka tjose.

²¹Aroni ne bakololo babe banowogutjengeta mbeli kwa Yahwe kudwa madekwana kunoti mangwanana guthuta mu nshasha we bushanganilo kuzhe kwe tjisitilo mbeli kwe tjidumano. Unowobe nlayo Baiziraela wabanowolondolodza nge kusingapele kuyenda nge zwizekugwana zwabo.”