Read Kalanga Kufuluka 28 Bible Online

Kufuluka 28 - Kalanga bible

Kufuluka 28

¹Yahwe bakadwa Mushe bakati, “Sedzedza Aroni nkulu uwo ne bakololo babe kukuli kudwa mu Baiziraela kuti bandishingile bali bapirisiti. Aroni ne bakololo babe bo Nadabu na Abihu na Eliyaza na Ithamari.

²Uthamile Aroni nkulu uwo zwiambalo zwakayengemala zwinompa gudzo ne bubuya.

³Ulebeleke na bose bana luzibo gwe kuthuma, ibo bandakapa bunyambi muna zwinonga izwezwi bathumile Aroni zwiambalo ayengemadzigwe nshingo wangu we bupirisiti.

⁴Zwiambalo zwabakafanila kuthama ndiyezwi: Khiba ne efodi ne jasi ne hazu yakalukiwa ne tjiala ne mwandabula. Bathumile Aroni nkulu uwo ne bakololo babe zwiambalo zwakayengemala zwekubigwa bupirisiti kuti bandishingile bali bapirisiti.

⁵“Bashingise matyila e mibala ye golide ne gova ne bushaba gwakashangana ne gova ne bushaba gwakabondelela ne jila buya lakakoshiwa.

⁶“Efodi baithame nge jila lina mbala we golide ne gova ne nshaba wakashangana ne gova ne we bushaba gwakabondelela ne jila buya lakalukiwa, kuthamiwe nge bunyambi.

⁷Ithamigwe mabhante mabili e mathudzi athumigwe mu midzibo yayo mibili kuti ibhatshanyiwe.

⁸Ithamigwe mwandabula nge bunyambi ubhatshanyiwe nayo, uthamiwe nge matyila anofanana ne e efodi ana mbala we golide ne we gova ne nshaba wakashangana ne we gova ne bushaba gwakabondelela ne jila buya lakalukiwa.

⁹Utole mabgwe mabili anodang'wa kuyi onikisi ukobolele mazina e bakololo ba Iziraela muali.

¹⁰Ukobolele mazina abo ali matathatu mu bgwe ling'ompela, mamwe ali matathatu mu limwe, ualongolose nge kuzwagwa kwabo.

¹¹Ukobolele mazina e bakololo ba Iziraela mu mabgwe mabili se nkoboleli we mabgwana ethama. Uakombeledze nge matangana e golide.

¹²Uanamatidze mu mabhante e efodi e mathudzi, abe mabgwe e ikumbuludzo ku bakololo ba Iziraela. Aroni asenge mazina abo mu mathudzi awe mbeli kwa Yahwe tjili ikumbuludzo.

¹³Uthame matangana e golide,

¹⁴ne misungwana mibili ye golide yakakoshiwa ube ubhatshanya misungwana iyeyi mu matangana e golide.

¹⁵“Uthame tjiambalo tje pa ifuba tje kusumikilisa, tjithamiwe nge bunyambi se kwakathamiwa efodi, tjithamiwe nge jila lina mbala we golide ne we gova ne nshaba wakashangana ne gova ne bushaba gwakabondelela, utjithame nge jila buya lakalukiwa.

¹⁶Tjibe tjipetiwa kabili, bulefu gwatjo gulizane ne bupabi gwatjo, bulefu gulizana kupanyalala kwe zwinyala ne bupabi gulizane kupanyalala kwe zwinyala.

¹⁷Uthame mizila ili minna ye mabgwe mutjili yakatjinjika. Kube ne nzila we mabgwe anoyi sadiwusi ne mabgwe anoyi topazi ne anoyi khabunkile, uli we kutanga,

¹⁸we bubili ube we mabgwe anoyi emeralidi ne anoyi safire ne teemani,

¹⁹we butatu ube we mabgwe anoyi jakinti ne anoyi agate ne anoyi amethiyisiti,

²⁰we bunna ube we mabgwe anoyi beriyili ne anoyi onikisi ne anoyi jasipa. Mabgwe iyawa abhatshanyiwe nge misungwana ye golide.

²¹Kube ne mabgwe ali gumi lina mabili (12) ana mazina e bakololo ba Iziraela ngotebedzana kwawo, ange mabgwana anotshambisa lutjwayo gwakakobolegwa muali, limwe ne limwe lina zina lakakobolegwa mu lili ali milile njudzi dzili gumi lina mbili.

²²Uthamile tjiambalo tje pa ifuba mitjili inonga misungo nge golide buya.

²³Uthamile tjiambalo tje pa ifuba zwihweko zwe golide zwibili. Zwihweko zwibili uzwilonge mu midzibo mibili ye tjiambalo tje pa ifuba.

²⁴Ube ulonga mitjili mibili ye golide mu milipo iyeyi mibili ye tjiambalo tje pa ifuba.

²⁵Usungilile theswi idzedzi mbili dze mitjili mu zwihweko zwibili udzibhatshanye ne efodi tja mbeli mu mathudzi.

²⁶Uthame milipo mibili ye golide uilonge ku midzibo mibili ye tjiambalo tje pa ifuba mu ndzibo utjemukati kwatjo ku bapa ne efodi.

²⁷Uthame milipo mibili ye golide uilonge tja mbeli mu mabhante atja pasi e efodi paanoshangana ne efodi yakalukwa nge bunyambi.

²⁸Milipo ye tjiambalo tje pa ifuba isunganyiwe neye milipo ye efodi nge jila le mbala we gova, libhatane ne efodi yakalukwa nge bunyambi, tjiambalo itjetji tje ifuba tjibhatane ne efodi kuti tjiambalo tje ifuba tjisilembeleke.

²⁹Ndizo ha Aroni engina mu bugalo gwakayengemala, unowobe akaambala tjiambalo itjetji tje ifuba tje kusumikilisa tjakakwagwa mazina e njudzi dze Iziraela, tjili ikumbuludzo pana Yahwe misi yose.

³⁰Mu tjiambalo tje pa ifuba tje kusumikilisa ulonge Urimu ne Thumimu, zwibe pa moyo wa Aroni ha eyenda pana Yahwe, ndiko Aroni unowobe akasenga kusumikilisiwa kwe Baiziraela pa moyo uwe pana Yahwe misi yose.

³¹“Tjiambalo tja kusi tje efodi utjithame nge jila le mbala we gova lose.

³²Tjibe ne nlomo panongina nsholo, mpeto we nlomo iwoyu udzibiwe ngolukwa kuti tjisitongo paluka.

³³Pasi kwatjo ku mpeto upasi utjinakise nge zwifano zwe mitjelo ye pomegiranate ye mibala ye gova ne bushaba gwakashanganyila ne gova ne bushaba gwakabondelela, uthumile tilokwana dze golide kupoteleka pakati kwe mitjelo ye pomegiranate.

³⁴Uthumile tilokwana ye golide mu mpeto we tjiambalo ube uthumila pomegiranate, ube uthumila tilokwana uthumila pomegiranate, uthame saikoko kupoteleka mpeto wose we tjiambalo.

³⁵Aroni atjiambale ha ali mu nshingo. Nsindo we tilokwana unowohwika ha engina mu bugalo gwakayengemala pana Yahwe ne ebhuda kuyita kuti asife.

³⁶“Uthame tjileitana tje golide ube ubezhela mutjili matama awa sekwa kabezhegwa mu rin'gi ye lutjwayo, ‘Kwakayengemala kuna Yahwe.’

³⁷Utjisungilile mu hwutshe nge nsungwana we mbala we gova mbeli kwe hwutshe.

³⁸Igale pa phazha ya Aroni. Aroni unowosenga nlandu mmwe ne mmwe ungashingikala mu zwibhayilo zwakayengemala zwinotjwayigwa Yahwe nge Baiziraela se zwipo zwakayengemala. Igale ili pa phazha iye koga kuti zwipo zwabo zwiamutjilike pana Yahwe.

³⁹“Uthame hazu yakalukiwa ye zwikotji nge jila buya ube uthama hwutshe nge jila buya ne mwandabula wakalukwa nge nnali.

⁴⁰“Bakololo ba Aroni ubathumile hazu ne mimwandabula ne hwutshe kuti babe ne ntutshi ne gudzo.

⁴¹Zwiambalo izwezwi uzwiambadze Aroni ne bakololo babe, ubayengemadze ubazhodze kundishingila bali bapirisiti.

⁴²Ubathumile zwiambalo zwa kusi zwibafukidze kusi zwidwile pa thunji zwinopelela pa zwidzwa.

⁴³Aroni ne bakololo babe bazwiambale ha bengina mu nshasha we bushanganilo kene bezha pejo ne tjibeso tjinopisigwa zwibhayilo mu bugalo gwakayengemala, kuti basitongo dwa bezwiwana babe nlandu bedwa befa. Iwoyu ube nlayo usingapele kuna Aroni ne zwizekugwana zwizwe.”