Read Kalanga Kufuluka 3 Bible Online

Kufuluka 3 - Kalanga bible

Kufuluka 3

¹Mushe wakabe elisa pkhwizi ne mbudzi dze nkalabgwa uwe Jeturo, mpirisiti we Midiya. Limwe zhuba kanofudzila pkhwizi ne mbudzi dzidze ku ndzibo we tjilambanyika, kanoswika ku Horebu, Dombo le Ndzimu.

²Kati ali ikoko ntumwa wa Yahwe kazwilakidza kunli ali mu nthuto we moto mu denjana. Kalinga ngono kabona denjana lithuta koga lisingatshwe.

³Ipapo Mushe kazwidwa kati, “Ima ndiyendepo ndibone jenamiso ileli gulu, ndibone kuti ini denjana lisingatshwe.”

⁴Yahwe bakati bebona kuti Mushe wasedzela kubona, Ndzimu ukan'dana uli mu denje uti, “Mushe, Mushe!” Iye kadabila eti, “Ndipano.”

⁵Ndzimu ukabe uti, “Usitjasedzele pejo. Ambula shangu mu makumbo awo, ngoti paumile, pathu pakayengemala.”

⁶Ukadwilila uti, “Ndimi Ndzimu wa bobatategulu babo, Ndzimu wa Abhurahama, na Isaki na Jakubo.” Ipapo Mushe kazwimba buso gugwe ngoti wakabe etja kulinga Ndzimu.

⁷Yahwe bakabe beti, “Ndabona kudziyila kwe bathu bangu bamu Egipiti, ndakahwa tjililo tjabo mu kudziyidziwa kwabo nge bashingisi babo. Malebeswa, ndoziba tshiyilo yabo,

⁸ndizo ndadeluka kuwobasunungula mu Baegipiti, ne kubadusa mu shango iyeyije ndibayisa ku shango mbuya yakatalabuka, shango inowunga nkaka ne butji, ku shango ye Bakanana ne Bahiti ne Baamori, Baperizi ne Bahivi ne Bajebusi.

⁹Tjililo tje Baiziraela tjaswika kundili, nami ndakabona Baegipiti sekwa banobadziyidza.

¹⁰Ndizo wali buya ndikutume kuna Faro unodusa bathu bangu Baiziraela mu Egipiti.”

¹¹Koga Mushe kabe eti ku Ndzimu, “Apa imi ndiani kene ungayenda kuna Faro kunodusa Baiziraela mu Egipiti?”

¹²Ndzimu ukabe uti, “Imi ndowobe ndinawe. Tjilakidzo ku kuli tjekuti ndakakutuma tjowobe etji, unowoti wadusa ibaba bathu mu Egipiti unowondinamata mu dombo ileli.”

¹³Mushe kabe eti ku Ndzimu, “Ha ndingati ndiswika ku bathu be Iziraela ndibadwa nditi, ‘Ndzimu wa botate benyu wandituma kumuli,’ ngono ibo bebe bendibhuzwa beti, ‘Zina lawo ndiani?’ Imi ndowobadwa nditini?”

¹⁴Ndzimu ukabe uti kuna Mushe, “NDI IYE WANDILI IYE.” Ngono ukadwilila ukati, “Bathu be Iziraela ubabudze etji, ‘Ndatumwa ndi IYE kumuli.’ ”

¹⁵Ndzimu ukadwa Mushe kakale ukati, “Ubudze Baiziraela uti, ‘Yahwe Ndzimu wa bobatategulu benyu, Ndzimu wa Abhurahama, Ndzimu wa Isaki, Ndzimu wa Jakubo wandituma kumuli.’ Ileli ndilo zina langu nge kusingapele, ndizo ndowozibgwa ndilo mu zwizekugwana zose.

¹⁶Yenda unokubunganya batungamili be Iziraela ubadwe uti, ‘Yahwe, Ndzimu wa botate benyu, Ndzimu wa Abhurahama, Ndzimu wa Isaki, Ndzimu wa Jakubo wakazha kundili ukandidwa ukati, “Ndakamulinga ngono abona zose zwamakathamigwa mu Egipiti.

¹⁷Ndizo ndogadzabgwe kuti ndowomudusa mu kudziyidza kwe Egipiti ndimuyisa ku shango ye Bakanana ne Bahiti ne Baamori ne Baperizi ne Bahivi ne Bajebusi, shango inowunga nkaka ne butji gwe nyutji.” ’

¹⁸“Ngono banowokuhwa, ndizo iwe ne batungamili be Iziraela mowoyenda kuna Mambo we Egipiti mube mundwa muti, ‘Yahwe Ndzimu we Bahebheru bakazwishanganya naswi, ndizo ngwenu tomukumbila, mutiletje tiyende gwendo gwe mazhuba matatu mu tjilambanyika kuti tinodusila Yahwe Ndzimu wedu tjibhayilo.’

¹⁹Ndoziba kuti Mambo we Egipiti aatowomuletja mukayenda kuzhe kwe kuti akombeledzwe nge simba.

²⁰Ndizo ndowoshingisa simba langu aloba Egipiti nge mbatsha dzose dzandinowothama muili, shule kwaipapo unowomuletja mukayenda.

²¹“Ndowothama kuti Baegipiti babe ne lubu mu bathu ibaba, ndizo mowoti mubhuda amutowobhuda makalembedza maboko.

²²Nkadzi mmwe ne mmwe unowokumbila maseka e siliva ne golide ne zwiambalo mu mbakidzani naye ne muna ugele mu ng'umba iye, muzwiambadze bakololo ne bakololokadzi benyu. Ndiko kutapila Baegipiti kwamunowoyita.”