Read Kalanga Kufuluka 31 Bible Online

Kufuluka 31 - Kalanga bible

Kufuluka 31

¹Yahwe bakadwa Mushe bakati,

²“Bona ndakashalula Bhezaleli nkololo wa Uri, Uri ali nkololo wa Huri we ludzi gwa Juda,

³ngono ndakanzhadza nge meya yangu, ndakampa bunyambi ne butjenjedu ne zibo ye mishingo ye maboko yakasiyana siyana.

⁴Ndakampa butjenjedu gwe kushingisa golide ne siliva ne phangula,

⁵nekuti abezhe mabgwe anobe ana tjaanoshingisiwa ne kuti abezhe makuni athame mishingo yose nge bunyambi gwa anago.

⁶Ndakashalula iye na Oholiyabu nkololo wa Ahisamaki we ludzi gwa Dani, ndakapa ne bamwe balume luzibo kuti bathame kose ikoku kwandakakudwa.

⁷Bathame nshasha we bushanganilo ne bhokisi le butendeki ne tjigalo tje ngoni tji pezhugwi kwalo ne zwimwe zose zwinoshakika mu nshasha,

⁸tafuli ne zwinoshingisiwa paili ne tjigadziko tje mavone ne zwinoshingisiwa patjili ne tjibeso tje motsha

⁹ne tjibeso tjinopisigwa zwibhayilo ne zwinoshingisiwa patjili zose ne bhavu ne magadziko alo

¹⁰ne zwiambalo zwakathumwa zwakanaka, zwiambalo zwakayengemala zwa Aroni mpirisiti ne zwiambalo zwe bakololo babe zwe nshingo wabo bali bapirisiti

¹¹ne mafuta anozhodziwa ne motsha unonuhwa zwakanaka we magalo akayengemala. Bathame tjimwe ne tjimwe kuyendidzana ne tjandakubudza.”

¹²Yahwe bakadwa Mushe bakati,

¹³Idwa Baiziraela uti, “Imwi mulondolodze mazhuba angu e Sabata ngoti ikoku tjilakidzo pakati kwangu namwi, kuyenda nge zwizekugwana zwenyu, kuti muzibe kuti imi Yahwe ndomuyengemadza.

¹⁴Mulondolodze Sabata ngoti i zhuba lakamuyengemalila. Mmwe ne mmwe unolitemapadza abulawe, iye unoshinga mu lili ngaadusiwe pakati kwe bakanyi kwabo.

¹⁵Nshingo ngaushingwe mu mazhuba ali matathatu, koga le butendeka i zhuba le kunyaluluka kwakapelela, lakayengemala kuna Yahwe. Ani kene ani zwe, unowoshinga nge zhuba le Sabata abulawe.

¹⁶Ndizo wali Baiziraela balondolodze zhuba le Sabata, balitole lili tjidumano tjisingapele kuyenda nge zwizekugwana zwabo.

¹⁷Tjilakidzo tjisingapele pakati kwangu ne Baiziraela kuti mu mazhuba ali matathatu Yahwe bakathama kudzimu ne shango ngono mu zhuba le butendeka bakamisa nshingo bakanyaluluka.”

¹⁸Kukati Yahwe bapedza kulebeleka na Mushe pezhugwi kwe Dombo le Sinai bakampa zwileiti zwibili zwe mabgwe akakwagwa nlayo nge tjinyala tje Ndzimu.