Read Kalanga Kufuluka 32 Bible Online

Kufuluka 32 - Kalanga bible

Kufuluka 32

¹Kwakati bathu bebona kuti Mushe wanonoka kudeluka mu dombo, bakakubungana pana Aroni bakati kunli, “Milika utithamile midzimu inowotitungamila, ngoti Mushe iye wakati dusa mu shango ye Egipiti atitjaziba kuti kwashingikalani kunli.”

²Aroni kabe ebadwa eti, “Dusani mang'ina e golide amu zebe dze bakadzi benyu ne dze bakololo benyu ne bakololokadzi benyu muazhise kundili.”

³Ndizo bathu bose bakatola mang'ina e golide wose akabe ali mu zebe dzabo bakayisa kuna Aroni.

⁴Ngono iye kaamutjila golide mu maboko abo kaibumba kathama nkong'wana, ndizo Baiziraela bakabe beti, “Eyi ndiyo midzimu iyo iwe Iziraela yakakudusa mu shango ye Egipiti.”

⁵Kukati Aroni ebona ikoku, kabaka tjibeso tjinopisigwa zwibhayilo pa ifano itjetjo tje nkong'wana ebe epa zibiso eti, “Mangwana kowobe ne nzano wa Yahwe.”

⁶Tjimuka bathu bakabinduka bakadusa zwibhayilo zwinopisiwa ne zwe mbakisano, ngono bakagala pasi bakaja bakang'wa bakamilika bakazana.

⁷Yahwe bakadwa Mushe bakati, “Deluka ngoti bathu babo bawakadusa mu shango ye Egipiti bathama zwakabipa,

⁸batjimbidza kupambuka mu zila yandakabapa, bazwithamigwa ifano tje nkong'wana ngono batjithigamila bakatjidusila zwibhayilo, bebe beti, ‘Eyi ndiyo midzimu iyo iwe Iziraela yakakudusa mu shango ye Egipiti.’ ”

⁹Yahwe bakadwa Mushe bakati, “Ndatjibona bathu ibaba, bathu bana misholo yakawoma.

¹⁰Ngwenu tjindiletja kuti bushongola gwangu gubathutile se moto ndibalobese, koga ndowothama ludzi lukulu kudwa mu kuli.”

¹¹Koga Mushe kakumbila Yahwe Ndzimu uwe kati, “Ini bushongola gwenyu gungalobesa bathu benyu bamakadusa mu shango ye Egipiti nge simba gulu nenge tjiazha tjakasima sa ikoku kene?

¹²Baegipiti kana banowodwa beti, ‘Yahwe bakabadusa mu Egipiti nge nkumbulo mbi kuti benobabulayila mu matombo ne kubalobesa mu shango.’ Buzani moyo wenyu, bushongola gwenyu ngagupele musishingile bathu benyu mbipo iyeyi.

¹³Kumbulani Abhurahama na Isaki na Iziraela balanda benyu bamakatuna ku bali muti, ‘Ndowowatsha bana benyu bakabe banji se nyenyedzi dze zhuzhugwi, shango yose iyeyi yandakamugadzabgwe ndowoyipa bana benyu, banowoyi thuwa nge kusingapele.’ ”

¹⁴Ndizo Yahwe bakazwidziba mu mbipo yabakabe bakumbula kuishingila bathu babo.

¹⁵Mushe kabe eshanduka edeluka dombo akabhata zwileiti zwe tjidumano, zwakakwagwa mukati na kuzhe zose.

¹⁶Zwileiti izwezo zwakabe zwathamiwa ne Ndzimu ne nkwalo uli nkwalo we Ndzimu wakakobolegwa mu zwileiti.

¹⁷Joshuwa kati ehwa zhoba ye bathu bemimila, kadwa Mushe kati, “Kuna zhoba ye ngwa mu bukotokelo.”

¹⁸Mushe kanshandula eti, “Zhoba yandinohwa ate uli mpululu we kukunda kene guwo le kukundiwa, koga ndohwa zhoba ye bathu banomba.”

¹⁹Kukati Mushe abe pejo ne makotokelo pa hwunde ye dombo, kabona nkong'wana ne bathu bezana, kazhala bushongola kwazo. Ipapo kaposa zwileiti zwaakabe akabhata zwikapkhwanyika.

²⁰Katola nkong'wana wabakabe bathama kaupisa kaukwiya kalonga nlota wawo mu vula kathama kuti Baiziraela bang'we vula iyeyo.

²¹Ngono Mushe kabhuzwa Aroni kati, “Ibaba bathu bakuthamani tjayita kuti ubalonge mu tjibi tjingapangapa?”

²²Aroni kabe eti, “Musigwadze moyo kungapo tetshi wangu, moziba kuti bathu ibaba banokuligwa nge mbipo kungapani.

²³Bakandidwa bakati, ‘Mutithamile midzimu inowotitungamila, Mushe iye wakatidusa mu shango ye Egipiti atitoziba kuti kwatini nge kukwe.’

²⁴Ngono imi abe ndibadwa nditi, ‘Iye una golide ngaaiduse’ ndizo bakabe bendipa iyo, ngono abe ndiilashila mu moto kube kubhuda nkong'wana iwoyu.”

²⁵Ngono Mushe kati ebona kuti bathu bapanduka ngoti Aroni abaletja bakapanduka kakale bazwilengudza mu zwita zwabo,

²⁶ipapo Mushe kama pa nkoba we bukotokelo kati, “Iye umile na Yahwe ngaazhe kundili.” Ngono bakololo ba Levi bose bakakubungana panli.

²⁷Ngono kabadwa kati, “Yahwe Ndzimu we Iziraela bakati, ‘Mmwe ne mmwe ngaadedele bukanu gugwe ayende ebuya buya mu bukotokelo kudwa ku nkoba kuyenda ku mmwe, abulaye nkololo wa tate babe, abulaye nkwinya uwe abulaye ne mbakidzani uwe.’ ”

²⁸Bakololo ba Levi bakashinga sekwa badwiwa ndi Mushe, mu zhuba ilelo kukafa bathu bali zwiwulu zwili zwitatu (3 000).

²⁹Ipapo Mushe kati, “Nasi mazwitshwayila kushingila Yahwe mmwe ne mmwe wenyu nge kubulaya nkololo uwe ne mwana wa tate babe kuti Yahwe bamukombolele mu zhuba lino.”

³⁰Tjimuka Mushe kadwa bathu kati, “Makathama tjibi tjikulu kulu kwazo. Ngono ngwenu ndowoyenda kuna Yahwe, pamwe ndingamuthamila gadzano ngekwe tjibi tjenyu.”

³¹Ndizo Mushe kabgwilila kuna Yahwe kabe eti ku bali, “Bathu ibaba bakathama tjibi tjakabangalala. Bakazwithamigwa midzimu nge golide bakabuya bakayithigamila.

³²Mubazwiibhatigwe zwibi zwabo, koga amusingabazwiibhatigwe, ndomukumbila bukushani zina langu mu lukwalo gwenyu gwa makakwala.”

³³Koga Yahwe bakadwa Mushe bakati, “Iye wanditjinyila ndiye wandinobukusha mu lukwalo gwangu.

³⁴Yenda ngwenu wali utungamilile bathu ibaba kwandakakubudza, ntumwa wangu we kudzimu unowokutungamila. Koga mu zhuba landinowoloba, ndowobalobela jinyo labo.”

³⁵Yahwe bakabaloba bathu ibaba ngoti bakathama nkong'wana beuthamigwa ndi Aroni.