Read Kalanga Kufuluka 33 Bible Online

Kufuluka 33 - Kalanga bible

Kufuluka 33

¹Yahwe bakadwa Mushe bakati, “Milika iwe ne bathu bawakadusa mu shango ye Egipiti muyende ku shango yandakatuna kuna Abhurahama na Isaki na Jakubo nditi, ‘Ndowoipa bana babo.’

²Ndowotuma ntumwa we kudzimu kakutungamila ngono ndowotata Bakanana ne Baamori ne Bahiti ne Baperizi ne Bahivi ne Bajebusi.

³Yendani ku shango inowunga nkaka ne butji koga anditowoyenda namwi kuyita kuti ndisitongo mulobesa ngoti mu bathu bana misholo yakawoma.”

⁴Kukati bathu behwa matama iyawa anogwadza, bakalila, kukasiyite waambala zwinonakisa.

⁵Ngoti Yahwe bakabe badwa Mushe bakati, “Idwa Baiziraela uti, ‘Imwi mu bathu basingahwe, ha ndingayenda namwi kene kuli kwe tjibakana, ndingamulobesa. Ndizo ambulani zwinonakisa zwenyu kuti ndizo ndibone kuti ndingatini namwi.’ ”

⁶Ndizo Baiziraela bakaambula zwinonakisa zwabo kudwa pa Dombo le Horebu.

⁷Mushe wakabe akawolobela tola nshasha ewubaka kuzhe kwe bukotokelo, kule ne bukotokelo, ebe ewudana eti nshasha we bushanganilo. Ngono mmwe ne mmwe wakabe eshaka Yahwe wakabe ebhuda eyenda ku nshasha we bushanganilo kuzhe kwe bukotokelo.

⁸Tjibaka tjimwe ne tjimwe Mushe tjaakabe eyenda ku nshasha, bathu bose bakabe bemilika, nlume mmwe ne mmwe ema pa nkoba we nshasha uwe ebe enlinga kuswikila engina mu nshasha.

⁹Kwakabe kuti Mushe engina mu nshasha gole libe lideluka lima pa nkoba we nshasha, Yahwe bebe belebeleka na Mushe.

¹⁰Bathu bakabe beti ha bebona gole lili mile pa nkoba we nshasha bakamilika bakanamata, mmwe ne mmwe ali pa nkoba we nshasha uwe.

¹¹Yahwe bakabe belebeleka na Mushe bakalingana saikoko se nthu angabe elebeleka ne nzwalani uwe. Mushe wakabe eti eshanduka ebgwilila ku bukotokelo, nlanda uwe, nzhuzha Joshuwa nkololo wa Nuni, esala asingabhude mu nshasha.

¹²Mushe kadwa Yahwe kati, “Bonani, makandidwa mukati, ‘Tungamila bathu ibaba’, koga amuzondizibisa wamunondituma naye. Koga makati, ‘Ndokuziba nge zina, naiko unodika kundili.’

¹³Ndizo ngwenu, ndomukumbila ha ndidika kumuli, mundilakidze zila dzenyu kuita kuti ndimuzibe ndiamutjilike kumuli. Mukumbule kakale kuti bathu ibaba nge benyu.”

¹⁴Yahwe bakashandula beti, “Ndowoyenda nawe, ngono ndowokupa kunyaluluka.”

¹⁵Mushe kabe eti ku bali, “Ha musingawoyenda nami, musitimilidze kudwa ipapano.

¹⁶Kowozibgwa tjini kuti mondida kene, imi ne bathu benyu? Apa akungazibgwe amayenda naswi kene, kuyita kuti kube ne kuthubukana pakati kwedu ne bathu bamwe bose bamu shango?”

¹⁷Yahwe bakabe bedwa Mushe beti, “Itjetji tjawaleba ndowotjishinga ngoti ndakuda ndokuziba nge zina.”

¹⁸Mushe kabe eti, “Ndomukumbila, mundilakidze tjedza tjenyu ndomukumbila.”

¹⁹Yahwe bakabe beti, “Ndowothama kuti bubuya gwangu gose gupinde mbeli kuko, ngono ndowoleba zina langu ‘Yahwe’ paulipo. Ndowohwila ngoni wandinowohwila ngoni, adwila moyo wandinowodwila moyo.

²⁰Koga aungabone buso gwangu ngoti nthu aangandibone katjila.”

²¹Yahwe bakabe beti, “Bona kuna pathu pamwe pejo nami paunowomapo pezhugwi kwe shongwe.

²²Kowoti tjedza tjangu tjipinda, ndowokulonga mu phaswa dze shongwe ndibe ndikuzwimba nge tjiazha tjangu kuswikila ndapinda.

²³Ipapo ndowodusa tjiazha tjangu ndizo iwe unowobona shule kwangu, koga buso gwangu autogubona.”