Read Kalanga Kufuluka 34 Bible Online

Kufuluka 34 - Kalanga bible

Kufuluka 34

¹Yahwe bakadwa Mushe bakati, “Bezha zwileiti zwe mabgwe zwinonga izwezwije zwe kutanga, ngono ndowokwala mu zwili matama akabe ali mu mabgwe ekutanga awakapkhwanya.

²Tjimuka ube wakazwilulwamisa utathile pezhugwi kwe Dombo le Sinai uzhe kundili pezhugwi kwe dombo.

³Kusiyite nthu unotatha nawe, naiko kusitongo boneka nthu mu dombo lose, kusibe ne zwithuwo zwinofula pasi kwe dombo.”

⁴Ndizo Mushe kabezha zwileiti zwibili zwe mabgwe zwinonga zwe kutanga, kamilika tjimuka mangwanana katatha Dombo le Sinai se kwaakadwiwa ndi Yahwe. Kayenda ne zwileiti zwibili.

⁵Yahwe bakadeluka bali mu gole bakama naye ipapo ngono bakaleba zina la Yahwe.

⁶Yahwe bakapinda panli belebeleka beti, “Ndi Yahwe, Ndi Yahwe, Ndzimu una ngoni ne kuhwila zogwadza, bana ludo gusingazunguzike ne kugalikamoyo.

⁷Banolondolodzela ludo gwabo zwiwulu ne zwiwulu zwe bathu, banozwiibhatigwa matjinyo e mwaza ne bupanduki ne tjibi, koga kene kwatini abatosiya una jinyo basanloba, banolobela bana matjinyo a botate babo, kudwa mu tjizekugwana kuyenda mu tjimwe kunoti muna tje bunna.”

⁸Mushe kalibilidza kathigama kanamata.

⁹Kabe eti, “Ha mandida imi, She, ndomukumbila, yendani naswi, nenguba tili bathu bakawoma misholo, mutizwiibhatigwe matjinyo edu e mwaza ne zwibi zwedu, mutitole tibe thaka yenyu.”

¹⁰Yahwe bakabe beti kuna Mushe, “Bonani, ndothama tjidumano. Ndowothama matjenamiso mu mesho e bathu bose, matjenamiso asakatongo shingwa mu shango yose kene mu gumwe ludzi. Bathu bose bauli pakati kwabo banowobona nshingo wa Yahwe, ngoti nge tjakabangalala tjandinowoshinga ndiwe.

¹¹Yela njele tjandinokudwa mu zhuba lino. Bonani, ndowotata Baamori ne Bakanana ne Bahiti ne Baperizi ne Bahivi ne Bajebusi.

¹²Muyele njele kuti musitongo thama tjidumano ne bagali be shango yamunoyenda ku ili kudwa kube dati pakati kwenyu.

¹³Mukolomodze zwibeso zwabo zwe zwibhayilo muvune phanda dzabo mukolomodze matala a bo Ashera midzimu yabo.

¹⁴“Musitongo thigamila mmwe ndzimu ngoti Yahwe ibo bana zina linoyi Fupa, Ndzimu una fupa.

¹⁵Musitongo thama tjidumano ne bagali be shango iyeyi, bedwa beti ha bethama bufukula gwabo nge midzimu yabo beyibhayila zwibhayilo bebe bemukoka mudwa muja zwibhayilo zwabo.

¹⁶Mube mulobodza bakololokadzi babo bakololo benyu, bakololokadzi babo bethama bufukula ne midzimu yabo bebe bethama bakololo benyu kuti bathame bufukula ne midzimu yabo.

¹⁷“Musitongo zwithamigwa midzimu yamabumba.

¹⁸“Mulondolodze Nzano we Tjiwunga tjisina Mbidzo. Muje tjiwunga tjisina mbidzo mazhuba ali kutendeka se kwandakamudwa, mutjije nge tjibaka tjakabigwa mu mwedzi wa Abibi, ngoti makabhuda mu shango ye Egipiti mu mwedzi wa Abibi.

¹⁹Mbano dzose nge dzangu, mbano dze ng'ombe dzenyu dzose, tjimwe ne tjimwe tjazwagwa kutanga tje zwithuwo, ng'ombe ne tjadwa mu ngubi.

²⁰Mbano dze donki mudzidzutunule nge pkhwizana kene muavune ntshibha ha musaadzutunula. Bakololo benyu bose banobe bali mbano mubadzutunule. “Kusibe ne mmwe wenyu unozha pandili asakabhata tjimwe.

²¹“Mushinge mu mazhuba ali matathatu, koga muna le butendeka munyaluluke, nenguba kukabe kuli mu tjibaka tje ndimo kene tje kuvuna.

²²“Mulondolodze Nzano we zwavung'wa mu minda, kuvung'wa kwe koroni ne kuvungwa kwe bupelo gwe gole.

²³“Balume bose mu muli bazhe pana Yahwe Ndzimu we Iziraela katatu nge gole.

²⁴Ndowotata njudzi mbeli kwenyu atalabudza migathu yenyu, akuna unowoyemula shango yenyu ha muyenda kuzwilakidza pana Yahwe Ndzimu wenyu katatu mu gole.

²⁵“Musitongo pisa malopa e tjibhayilo tjangu ne mbidzo, ne tjibhayilo tje Nzano we Kupinda pezhugwi kakale tjisibe maladzwa.

²⁶“Zwitshwa zwe mitjelo yenyu yabidwa kutanga mu zwizhise ku ng'umba ya Yahwe Ndzimu wenyu. “Usitongo bhika mbudzana nge nkaka wa mayi bayo.”

²⁷Yahwe bakadwa Mushe bakati, “Kwala matama iyawa; ngoti ndathama tjidumano nawe ne Baiziraela kuyenda nge matama iyawa.”

²⁸Mushe wakabe ikoko na Yahwe mazhuba ali makumi manna ne masiku ali makumi manna (40) asingaje tjiwunga kene kuli kung'wa vula. Ndizo kakwala mu zwileiti zwe mabgwe matama e tjidumano, milayo ili gumi.

²⁹Mushe wakati edeluka mu Dombo le Sinai ne zwileiti zwibili zwe mabgwe zwina nlayo, kabe asingazibe kuti ganda le buso gugwe lakabe lipenya ngoti akabe abe elebeleka ne Ndzimu.

³⁰Aroni ne Baiziraela bakati bebona buso gwa Mushe gupenya bakatja kusedzela pa nli.

³¹Koga Mushe kabadana ngono Aroni ne batungamili bose be gubungano bakabgwilila kunli, ngono Mushe kalebeleka nabo.

³²Kukati shule Baiziraela bose bakasedzela panli, ngono kabalaya muna zose Yahwe zwabakaleba naye mu Dombo le Sinai.

³³Kukati Mushe apedza lebeleka nabo kaambadza buso gugwe nge isitilo.

³⁴Koga kwakabe kuti Mushe eyenda kunolebeleka na Yahwe edusa isitilo kudzina ebhuda ipapo, ngono wakabe eti abuya ebudza Baiziraela tjaadwiwa,

³⁵Baiziraela ibo belinga buso gwa Mushe bakabona kuti gopenya, ngono Mushe ekombala isitilo mu buso gugwe kakale kuswikila engina kunolebeleka na Yahwe.