Read Kalanga Kufuluka 35 Bible Online

Kufuluka 35 - Kalanga bible

Kufuluka 35

¹Mushe kakubunganya gubungano lose le Iziraela kalidwa kati, “Zwamadwiwa ndi Yahwe kuti muzwishinge yezwi,

²mushinge mishingo yenyu mu mazhuba ali matathatu, koga mu zhuba le butendeka mube ne kunyaluluka kwakayengemala kwa Yahwe, iye unowoshinga nshingo kene uli upi mu lili ngaabulawe.

³Musitongo besa moto mu magalo enyu wose mu zhuba le sabata.”

⁴Mushe kadwa gubungano le Baiziraela kati, “Etji nditjo tjakalebgwa ndi Yahwe:

⁵‘Mudusile Yahwe tjipo, mmwe ne mmwe aduse se kwada moyo uwe, azhisile Yahwe tjipo tje golide kene siliva kene phangula,

⁶mupe ne matyila e mmbala we gova ne ana mmbala nshaba ne ana bushaba gwakabondelela ne matyila mabuya akalukwa ne bukuse gwe mbudzi;

⁷ne makukuta e nyundo akatakiwa bushaba ne makukuta e mbudzi; ne mapangwana e n'wunga’

⁸ne mafuta e thoba anoshinga mu mavone ne zwipayisi zwinothama mafuta anozhodziwa ne anothama mimotsha kunuhwa zwinozipa.

⁹Muzhise ne mabgwe anoyi onikisi ne mabgwe anonamatidziwa mu efodi ne mu tjiambalo tje pa ifuba.

¹⁰“Nyambi dzose mu muli ngadzithame kose kwakalebgwa ndi Yahwe: Bugalo gwe Ndzimu,

¹¹ne nshasha wago ne buthulilo gwago ne zwihweko zwago ne mbakililo dzago ne mbalilo dzago ne phanda dzago ne zwigadziko zwago.

¹²Bathame Bhokisi le Tjidumano ne mapangwana anolisenga ne tjigalo tje ngoni ne isitilo,

¹³ne tafuli ne mapangwana anoisenga ne zwija zwinoshingisiwa paili ne tjiwunga tjapiwa Ndzimu,

¹⁴bathame tjigadziko tje mavone ne zwija zwinoshingisiwa pa tjili ne mavone atjo ne mafuta e mavone.

¹⁵Bathame tjibeso tje motsha ne mapangwana anotjisenga ne mafuta anozhodziwa ne motsha unonuhwa zwinozipa ne isitilo tje nkoba bugalo gwe Ndzimu,

¹⁶ne tjibeso tjinopisigwa zwibhayilo ne sefo yatjo ye phangula ne mapangwana anotjisenga ne zwija zwatjo zose ne bhavu ne tjigadziko tjalo.

¹⁷Bathame matyila anolembeledziwa anobaka bhakasa ne phanda ne magadziko ayo ne isitilo tje nkoba we bhakasa,

¹⁸ne mbambo dze bugalo gwe Ndzimu ne mbambo dze bhakasa ne misungo yadzo.

¹⁹Bathame zwiambalo zwakathamiwa nge bunyambi zwinoshingisiwa kushingwa mu bugalo gwakayengemala, zwili zwiambalo zwakayengemala zwa Aroni mpirisiti ne zwe bakololo babe ha beshinga bali bapirisiti.”

²⁰Ipapo gubungano lose le Baiziraela likapalala lidwa pana Mushe.

²¹Ngono bakabuya bezhisa zwipo zwabo, mmwe ne mmwe ezhisa sekwa adisiwa nge moyo uwe, bakazhisa zwipo kuna Yahwe kuti zwishingisiwe kubaka nshasha we bushanganilo nenge mu mishingo yawo yose nenge kuthama zwiambalo zwakayengemala.

²²Ndizo bakazha balume ne bakadzi, bose bakabe bana ludo, bakadusa nge moyo ntjena zwabanazo; zwikopelo ne mang'ina ne rin'gi ne maseka, kose kwakathamiwa nge golide, mmwe ne mmwe epa Yahwe tjipo tje golide.

²³Ngono mmwe ne mmwe wakabe ana jila le mbala we gova kene nshaba kene bushaba gwakabondelela kene jila buyanana kene bukuse gwe mbudzi kene makukuta e nyundo akasukiwa katakiwa bushaba kene makukuta e mbudzi wakazhisa.

²⁴Mmwe ne mmwe wakabe ana siliva kene phangula kazhisa tjili tjipo kuna Yahwe, ne wakabe ana mapangwana e n'wunga akabe angashinga kazhisa.

²⁵Bakadzi bose bakabe betubula kuluka bakazhisa zwabakaluka zwe mibala ye gova ne mibala mishaba ne mishaba yakabondelela ne matyila mabuya akalukwa.

²⁶Bakadzi bose bakabe ne ludo bali nyambi dze kuluka bakaluka bukuse gwe mbudzi.

²⁷Batungamili ibo bakazhisa mabgwe anoyi onikisi ne mabgwana anonamatidziwa mu efodi ne mu tjiambalo tje pa ifuba

²⁸ne zwipayisi ne mafuta anolongwa mu mavone ne mimotsha inothama mafuta anozhodziwa ne motsha unonuhwa zwinozipa.

²⁹Bose balume ne bakadzi, Baiziraela bakati mimoyo yabo ikabazunguza kuzhisa tjimwe ne tjimwe tjina nshingo kuna Yahwe sekwa bakadwa Mushe bakazhisa tjipo tje moyo ntjena kuna Yahwe.

³⁰Mushe kadwa Baiziraela kati, “Bonani, Yahwe bakashalula Bhezaleli nkololo wa Uri, Uri nkololo wa Huri we ludzi gwa Juda

³¹bakanzhadza nge Meya ye Ndzimu ne bunyambi ne butjenjedu ne zibo ye mishingo yose ye maboko

³²kuluka mano elongolosa nge bunyambi se kungashingisiwa golide ne siliva ne phangula,

³³ne kubezha mabgwe ne kubezha makwasayile kushingisiwa nge bunyambi.

³⁴Yahwe bakampa tjipo tje kudiya, bakapabo na Oholiyabu nkololo wa Ahisamaki we ludzi gwa Dani.

³⁵Bakabapa bunyambi kuthama nshingo mmwe ne mmwe unoshingwa nge maboko, kunyemba ne kuluka zwe mibala ye gova ne mishaba ne mishaba kwakabondelela ne matyila mabuya akalukiwa.