Read Kalanga Kufuluka 36 Bible Online

Kufuluka 36 - Kalanga bible

Kufuluka 36

¹“Bhezaleli na Oholiyabu ne mmwe ne mmwe wakabe ana luzibo wakati kapiwa bunyambi ndi Yahwe ne butjenjedu kuziba kushinga mmwe we mishingo mu kubakwa kwe bugalo gwakayengemala ngaashinge kunoyendidzana nge tjakalebgwa ndi Yahwe.”

²Ipapo Mushe kadana Bhezaleli na Oholiyabu ne mmwe ne mmwe una luzibo wakapiwa bunyambi ndi Yahwe, mmwe ne mmwe wakabe ne moyo we ludo kuzha kuwoshinga nshingo.

³Mushe kabapa zwipo zose zwe moyo ntjena zwakadusiwa nge Baiziraela zwidusigwa kubaka Bugalo gwakayengemala. Mangwanana mamwe ne mamwe bathu bakabe batjazhisa zwipo.

⁴Kukathama kuti bashingi bose banoshinga mishingo yakasiyana mu kubaka Bugalo gwakayengemala bazhe kuna Mushe,

⁵ban'dwe bati, “Bathu banozhisa zwipo zwinjisa pana zwakalizana kushinga mu nshingo watakadwiwa ndi Yahwe.”

⁶Ndizo Mushe kadusa hwi likayenda ku bukotokelo gose liti, “Ngakusitjabe ne nlume kene nkadzi utjazhisa zwipo zwe Bugalo gwakayengemala.” Ndizo bathu bakasitjazhise zwipo,

⁷ngoti zwabakabe babe nazo zwakabe zolizana nshingo zwibuya zwipinda.

⁸Bashingi bose bana luzibo bakabaka bugalo gwe Ndzimu nge zwisitilo zwili gumi, zwakathamiwa nge jila buya lakalukiwa le mibala ye gova ne ye bushaba gwakabondelela kube kunyambiwa nge zwifano zwe dzikherubhu.

⁹Zwisitilo izwezwi zose zwilizana, tjimwe ne tjimwe tjili thambo dzili gumi lina mbili (12) bulefu gwatjo, bupabi tjili thambo dzili mbili.

¹⁰Bebe bebhatshanya zwisitilo zwishanu nge kwazo bebuya bebhatshanya zwimwe zwishanu nge kwazo.

¹¹Bakathama zwishwe zwe mbala we gova mu midzibo ye zwisitilo zwiku n'dzibo we zwishanu zwe kutanga, ngono bakathama beijalo ne mu zwishanu zwe bubili.

¹²Bakathama zwishwe zwili makumi mashanu (50) mu n'dzibo we isitilo bebe bethama zwili makumi mashanu (50) mu n'dzibo we zwe bubili. Zwishwe izwezo zwakabe zwakalingisana.

¹³Bebe bethama zwihweko zwili makumi ali mashanu (50) zwe golide bebe bebhatshanya zwisitilo izwezo nge zwihweko, ndizo bugalo gwe Ndzimu gube tjithu tjing'ompela.

¹⁴Bakathama zwisitilo nge bukuse gwe mbudzi zwe nshasha kuthama denga le bugalo gwe Ndzimu, zwili gumi lina tjing'ompela.

¹⁵Bulefu gwe zwisitilo izwezwi gulizana, tjimwe ne tjimwe tjili thambo dzili gumi lina dzili thatu (13).

¹⁶Bakabhatshanya zwisitilo zwi shanu tje kwazo, bebe bebhatshanya zwi tathatu tje kwazo.

¹⁷Bebe bethama zwishwe zwili makumi mashanu (50) mu n'dzibo we isitilo tji kun'dzibo, bebuya bethama zwimwe zwili makumi mashanu (50) mu n'dzibo we zwimwe.

¹⁸Bakathama zwihweko zwili makumi mashanu (50) nge phangula kubhatshanya denga le nshasha kuti libe tjithu tjing'ompela.

¹⁹Bakathama dandilo le nshasha nge makukuta e nyundo akasukwa akatakiwa bushaba nenge e mbudzi.

²⁰Kudwapo bakabe bethama mbakililo dze bugalo gwe Ndzimu nge makwasayile e n'wunga.

²¹Gwasayile limwe ne limwe lili thambo dzili nna bulefu, bupabi gwalo guli zwiazha zwili makumi ali matathatu ana zwili tathatu (66).

²²Gwasayile limwe ne limwe lakabe lina zwibhali zwibili kulibhatshanya nge tjigadziko. Makwasayile wose e bugalo gwe Ndzimu akabe akathamiwa saikoko.

²³Bakathama mbakililo dze bugalo gwe Ndzimu dzili makumi mabili (20) dze ku n'dzibo we burwa;

²⁴bebe bethama magadziko ali makumi manna (40) nge siliva anogadzikwa mbakililo, magadziko mabili ali e mbakililo ing'ompela engina zwibhali dzayo, mamwe magadziko mabili ali e imwe mbakililo engina zwibhali zwayo.

²⁵Ku n'dzibo we bubili u ku bunandzwa gwe bugalo gwe Ndzimu bakathama mbakililo dzili makumi mabili (20)

²⁶dzina magadziko adzo ali makumi manna (40) akathamiwa nge siliva, magadziko mabili ali e mbakililo ing'ompela, mabili ali e imwe.

²⁷Ku shule kwe bugalo gwe Ndzimu ku golombedzo bakathama mbakililo dzili tathatu.

²⁸Bakathama mbakililo mbili mu midzibo ye bugalo gwe Ndzimu tja shule.

²⁹Mbakililo dzimu midzibo dzakabe dzakabhatshanyiwa kudwa pasi kuyenda pezhugwi. Idzedzi mbili dzina midzibo dzakabe dzakathamiwa saikoku.

³⁰Ndizo wali kwakabe kuna mbakililo dzili zhanakadzi dzina magadziko adzo ali gumi lina ali matathatu (16), gwasayile limwe ne limwe lina magadziko mabili.

³¹Bakathama mbalilo dze n'wunga dzili shanu mu lubizho gumwe gwe bugalo gwe Ndzimu,

³²lubizho gumwe naigobo bakaguthamila mbalilo dzili shanu, na shule kwe bugalo gwe Ndzimu ku golombedzo bakakuthamila mbalilo dzili shanu.

³³Lubalilo gu pakati bakaguthama gudwa pa nkoba gupoteleka gunopelela pa nkoba ku lubizho gumwe.

³⁴Bakadzulula mbakililo nge golide bakadzithamila milipo ye golide inobhata mbalilo, mbalilo naidzobo bakadzidzulula nge golide.

³⁵Bakathama isitilo nge jila le mbala we gova ne nshaba ne bushaba gwakabondelela ne jila buya lakakoshiwa likanakisiwa nge zwifano zwe dzikherubhu.

³⁶Bakatjithamila mapangwana e n'wunga ali manna bakaadzulula nge golide bakaathamila zwigadziko zwili zwinna zwe siliva.

³⁷Nkoba we nshasha bakauthamila isitilo tjina mbala we gova ne nshaba ne bushaba gwakabondela ne jila buya lakakoshiwa likalukwa nge bunyambi.

³⁸Isitilo itjetji bakatjithamila mapangwana ali mashanu ana zwihweko zwinobhata mu milipo ye isitilo kose kwakadzulugwa nge golide, magadziko awo akathamiwa nge phangula.