Read Kalanga Kufuluka 37 Bible Online

Kufuluka 37 - Kalanga bible

Kufuluka 37

¹Bhezaleli wakathama Bhokisi le Tjidumano nge makwasayile e nti unoyi n'wunga, bulefu gwalo guli thambo mbili dzina gaswa, bupabi guli thambo ina gaswa kudwa pasi kuyenda pezhugwi guli thambo ina gaswa.

²Kalidzulula nge golide mbuyanana mukati na kuzhe, kalithamila tjirepuli tje golide kulipoteleka.

³Kalithamila milipo minna ye golide mu midzibo yalo minna ne milipo mibili mu lubadu gumwe gwalo ne milipo mibili kakale mu gumwe lubadu.

⁴Kabuya kalithamila mapango e nti unoyi n'wunga, kaadzulula ne golide

⁵kabe elonga mapango mu milipo imu midzibo yose ye Bhokisi le Tjidumano kulisenga.

⁶Kathama tjigalo tje ngoni nge golide yakatjenapadziwa, tje bulefu gwe thambo mbili dzina gaswa, ne bupabi gwe thambo ina gaswa.

⁷Kathama dzikherubhu mbili dze golide yakathugwa, kadzithamila mu midzibo mibili ye tjigalo tje ngoni.

⁸Kherubhu ing'ompela ili ku phelelo dze tjigalo, ing'ompela ili ku phelelo imwe ye tjigalo, dzikherubhu idzedzi dzakabe dzili ku ndzibo we tjigalo tje ngoni, kuti ndizo idzo ne tjifumiko dzibe dzakabhatana.

⁹Dzikherubhu dzakazhula mapapilo dzakafukidza tjigalo tje ngoni nge mapapilo adzo, njiso dzadzo dzakalingisana, kuyendila ku tjigalo tje ngoni kwakabe kuli njiso tje dzikherubhu.

¹⁰Kakale kathama tafuli nge makwasayile e nti unoyi n'wunga, ye bulefu gwe thambo mbili, bupabi gwayo guli thambo ing'ompela, bulefu kudwa pasi kuyenda pezhugwi guli thambo ina gaswa.

¹¹Kaidzulula nge golide yakatjenapadziwa, kathama tjirepuli nge golide kuipoteleka.

¹²Kathama gwasayile le bupabi gwe tjiazha kuipoteleka, kabe ethama tjirepuli tje golide tjakapoteleka gwasayile.

¹³Kathama milipo ili minna ye golide, kanamatidza milipo ku midzibo minna ku makumbo ayo manna.

¹⁴Pejo ne gwasayile kwakabe kuna milipo inobhata mapango anosenga tafuli.

¹⁵Kathama mapango nge nti unoyi n'wunga anosenga tafuli, kaadzulula nge golide.

¹⁶Kakale kathama zwija zwe golide yakatjenapadziwa zwakabe zwibigwa pezhugwi kwe tafuli, ndilo ne ndigwana dzinopisila motsha, ne ndilo hwulu ne mapepe e tjipo tje tjing'o.

¹⁷Kathama tjigadziko tje mavone nge golide mbuyanana, bhato ne hwumbu ye tjigadziko tje mavone zwakabe zwakathugwa, zwilongwana zwatjo ne thabi dzatjo ne maluba atjo zwakabe zwili tjithu tjing'ompela.

¹⁸Kwakabe kuna thabi dzili tathatu dzibhudila ku mbizho dzatjo, thabi thatu dze tjigadziko tje mavone dzibhudila ku lubizho gumwe gwatjo, dzimwe thatu dzibhudila ku lubizho gumwe gwatjo.

¹⁹Zwilongwana zwitatu zwakabe zwakathamiwa mu ifano tje maluba zwili mu lutabi gung'ompela, zwina zwilongwana ne luba ne hajana dzili thatu dzakathamwa mu ifano tje luba dzili mu lutabi gung'ompela, dzina zwilongwana ne luba, kwakajalo mu thabi dzose thatu dzinobhuda mu tjigadziko tje mavone.

²⁰Ngono mu tjigadziko tje mavone kwakabe kuna zwilongwana zwili zwinna zwakathamiwa mu ifano tje maluba, zwilongwana zwazo ne maluba azo.

²¹Kukabe kuna zwilongwana kusi kwe thabi mbili zwili tjithu tjing'ompela natjo, dzisikigwa mutjili, ne zwilongwana kusi kwe thabi dzili mbili zwili tjithu tjing'ompela natjo, kwakabe kwakajalo mu thabi dzili thatu dzinobhuda mutjili.

²²Zwilongwana zwazo, ne thabi dzazo zwili tjithu tjing'ompela natjo, dzisikiwa mutjili, bugose gwatjo gwakabe guli tjithu tjing'ompela, ili golide yakathugwa mbuyanana.

²³Kathama mavone atjo ali kutendeka, ne zwinobhatidza mavone zwatjo ne ndigwana dzatjo nge golide yakatjenapadziwa.

²⁴Katjithama ne zwija zwatjo zose nge bunyambi ethama nge golide mbuyanana.

²⁵Kathama tjibeso tjinopisigwa motsha nge gwasayile le nti unoyi n'wunga, bulefu gwatjo guli thambo ing'ompela, bupabi gwatjo guli thambo ing'ompela, tjilizalizana koga, bulefu gwatjo kudwa pasi kuyenda pezhugwi guli thambo mbili, nyanga dzatjo natjo kuli tjithu tjing'ompela.

²⁶Katjidzulula nge golide mbuyanana, pezhugwi kwatjo, ne mbizho dzatjo kutjipoteleka, ne nyanga dzatjo, kabe ethama tjirepuli kutjipoteleka.

²⁷Kathama milipo ye golide kainamatidza kusi kwe tjirepuli tjatjo, mu mbizho dzatjo kulingisana, ili inobhata mapango kutjisenga.

²⁸Kathama mapango nge gwasayile le nti unoyi n'wunga, kaadzulula nge golide.

²⁹Kakale kathama mafuta anozhodziwa akayengemala ne motsha unonuhwa zwinozipa, kazwithama se nthu unotubula thama zwinonuhwilila.