Read Kalanga Kufuluka 4 Bible Online

Kufuluka 4 - Kalanga bible

Kufuluka 4

¹Ipapo Mushe kashandula eti, “Koga bonani, abangandidume kene kuli kundihwilila, ngoti banowoti, ‘Yahwe abazozwilakidza ku kuli.’ ”

²Yahwe bakati kunli, “Ikoku kumu luboko gugo ini?” Mushe kabe eti, “ludozo.”

³Ndzimu ukabe uti, “Ugulashile pasi.” Ndizo kagulashila pasi ngono gukabe nyoka, ngono Mushe kaitizha.

⁴Koga Yahwe bakati kuna Mushe, “Tambunudza luboko gugo uibhate nge mwise.” Ndizo katambunudza luboko gugwe kaibhata, ngono ikabe ludozo mu luboko gugwe.

⁵Yahwe bakabe beti, “Uthame ikoku kuti Baiziraela badume kuti Yahwe Ndzimu wa botate babo, Ndzimu wa Abhurahama, Ndzimu wa Isaki, Ndzimu wa Jakubo wakazwilakidza ku kuli.”

⁶Yahwe bakapapha bakati kunli, “Longa luboko gugo mu jasi lilo pa ifuba.” Ngono kalonga luboko gugwe mu jasi pa ifuba, koga kati egudusa, bonani, luboko gugwe gukazha guna mapele, guli butjena se kapuku.

⁷Ipapo Ndzimu ukabe uti, “Bgwiliza luboko gugo mu jasi pa ifuba.” Ndizo kabgwiliza luboko gugwe mu jasi pa ifuba ngono kati egudusa, gukabe gwasukika gufanana ne mmbili uwe wose.

⁸Ndzimu ukati, “Ha basingadume kene kuli kuyela njele tjilakidzo tje kutanga, banowoduma tje bubili.

⁹Ha basingadume zwilakidzo izwezwi zwibili kene basayela njele hwi lilo, utjele vula mu gwizi gwe Naili ube uitebulila pasi ngono vula iyeyo inobe malopa.”

¹⁰Koga Mushe kabe eti kuna Yahwe, “She wangu, kudwa tjose ntolo anditotubula kulebeleka, andite ndili nyambi ye leba.”

¹¹Ipapo Yahwe bakabe beti kunli, “Ndiani wakathama nlomo we nthu? Ndiani unonthama kabe mbebebe kene bhububuzebe? Ndiani unonthama kabona kene kabe bhofu? Apa ate ndili imi Yahwe kene?

¹²Ndizo ngwenu wali yenda, ngono ndowobe ndinawe ndowokudiya tjaunowoleba.”

¹³Koga Mushe kabe eti, “She wangu, ndomukumbila tumani mmwe upoga.”

¹⁴Ipapo Yahwe bakazhala bushongola ngono bakabe beti, “Apa Aroni we Nlevi nkulu uwo aapo kene? Ndoziba kuti unolebeleka zubuyanana. Bona waswika kuwokushanganidza ngono unowoti ekubona kashatha kwazo.

¹⁵Ngono unowolebeleka naye ukambudza matama iyawa ngono ndowobe namwi amudiya tjamunowoshinga.

¹⁶Unowobe nlebelekeli uwo ku bathu, kabe nlomo uwo ngono iwe unowonga Ndzimu kunli.

¹⁷Utole ludozo igogu, ndigo gwaunowolakidza makaabadzo ndigo.”

¹⁸Mushe kabgwilila kuna Jeturo nkalabgwa uwe, ngono kandwa kati, “Imani ndibgwilile kuna bakanyi kwedu ku Egipiti kunobona kene batjamuka.” Jeturo kabe eti, “Yenda nge mbakiso.”

¹⁹Mushe kati atji mu shango ye Midiya Yahwe bakati kunli, “Bgwilila ku Egipiti, ngoti balume bakabe beshaka kukubulaya bakafa.”

²⁰Ndizo Mushe katola nkadzi uwe ne bakololo babe kabatathisa donki kabgwilila ku shango ye Egipiti, ngono mu luboko gugwe akabhata ludozo gwe Ndzimu.

²¹Yahwe bakabe beti kuna Mushe, “Uti uswika ku Egipiti ubone kuti unothama makaabadzo wose andakupa simba kuathama mbeli kwa Faro, koga ndowokukutadza moyo uwe ndizo aatowoletja bathu ibaba bakayenda.

²²Ngono unowodwa Faro ukati, ‘Yahwe bakati Iziraela nkololo wangu we mbano,’

²³ndizo ndakudwa ati, Letja nkololo wangu ayende kuti anondishingila. Ha ulamba kuti ayende, bona ndowobulaya nkololo uwo we mbano.”

²⁴Kukati pamwe pabakalala Yahwe bakashangana na Mushe ngono bakashaka kumbulaya.

²⁵Ipapo Ziphora katola bgwe linopitsha kathumbila mwana uwe ngono kakutha bulume gwa Mushe nge ganda laakabe athubula mu kuthumbila ikoku ngono kabe eti, “U nlume wangu we lopa.”

²⁶Ndizo Yahwe bakanletja. Ziphora akabe eti, “U nlume we lopa,” eleba ngekwe kuthumbigwa.

²⁷Yahwe bakadwa Aroni bakati, “Yenda ku tjilambanyika kunoshanganidza Mushe.” Aroni kayenda kashangana naye pa Dombo le Ndzimu kabe embutjila.

²⁸Mushe ndizo kabudza Aroni matama wose aakatumwa ndi Yahwe, kambudza makaabadzo aakapiwa kuathama.

²⁹Ndizo Mushe na Aroni bakayenda bakanokubunganya bakulu be Baiziraela.

³⁰Aroni kaleba matama wose akalebgwa ndi Yahwe kuna Mushe kabuya kalakidza zwilakidzo mu mesho e bathu.

³¹Ngono bathu bakaduma, bakati behwa kuti Yahwe bakabe babakumba ngono bakabona kudziyila kwabo bakakotamisa misholo bakabanamata.