Read Kalanga Kufuluka 5 Bible Online

Kufuluka 5 - Kalanga bible

Kufuluka 5

¹Kukati shule Mushe na Aroni bakayenda kuna Faro bakandwa bakati, “Yahwe Ndzimu we Baiziraela bakati, ‘Letja bathu bangu bayende banondithamila nzano ku tjilambanyika.’ ”

²Koga Faro kabe eti, “Yahwe ndiani wandingateedza aletja Iziraela kayenda? Anditoziba Yahwe, naiko andingaletje Iziraela kayenda.”

³Ipapo bakabe beti, “Ndzimu we Bahebheru wakashangana naswi, ndizo tokumbila, utiletje tiyende gwendo gwe mazhuba matatu mu tjilambanyika tinopa Yahwe Ndzimu wedu tjibhayilo kuti basitongodwa betiloba nge bugwele kene ne thumo.”

⁴Koga Mambo we Egipiti kabe eti ku bali, “Iwe Mushe na Aroni, ini musiyisa bathu nshingo wabo? Bgwililani ku nshingo wenyu.”

⁵Faro kabe eti, “Bonani, bathu ibaba babe banjisa mu shango ngono imwi mothama kuti banyaluluke mu nshingo wabo.”

⁶Zhuba ilelo Faro kadwa bayendisi be nshingo ne bashingisi be Baiziraela kati,

⁷“Musitongobe mutjapa bathu ibaba mashanga kuthamisa zwitina sekwa magala muthama, mubaletje banozwishakigwa mashanga.

⁸Koga bathame zwitina zwinolizana ne zwabagala bethama, musitongo buya mukazwitapudza. Bathu ibaba isimbe ndizo wali belila beti, ‘Mutiletje tiyende tinopisila Ndzimu wedu tjibhayilo.’

⁹Lemeselani balume ibaba nshingo, bashinge basiteedze manyepkhwa.”

¹⁰Ndizo bayendisi be nshingo ne bashingisi be bathu bakayenda ku bathu bakabadwa bakati, “Faro wati aatjowomupa mashanga.

¹¹Yendani munozwishakigwa mashanga kwamungaawana, koga tjilizanyo tje nshingo atjitowotapudzika.”

¹²Ndizo bathu bakaandama nge shango yose ye Egipiti bekubunganya malala e mashanga kuashingisa.

¹³Bayendisi be nshingo bakakulumbidza beti, “Nshingo wenyu muuligile sekwa magala mushinga muna mashanga.”

¹⁴Ngono bashingisi be Baiziraela bakalobgwa nge bayendisi be nshingo ba Faro, bakabhuzwiwa kuyi, “Ini nasi musaligila tjilizanyo tje zwitina tjamagala muligila?”

¹⁵Bashingisi be Baiziraela ipapo bakayenda kuna Faro bakanlilila beti, “Ini mubhata balanda benyu nge zila yakajali?

¹⁶Atitjapiwa mashanga, koga koyi, ‘Thamani zwitina.’ Bonani, tolobgwa koga ngono nlandu umu bathu benyu.”

¹⁷Mambo kadabila eti, “Mokhekheleza, mu simbe ndizo muti, ‘Mutiletje tiyende tinopisila Yahwe tjibhayilo.’

¹⁸Yendani sakuno wali munoshinga, akuna mashanga amunowopiwa, koga muligile tjilizanyo tja kale tje zwitina.”

¹⁹Bashingisi be Baiziraela bakabona kuti bamu tjimo tjakabipa ha bedwiwa kuyi, “Musitongo tapudza tjilizanyo tje zwitina tje zhuba ne zhuba.”

²⁰Bakati bedwa kuna Faro bakashangana na Mushe na Aroni bakabe bakabalindila.

²¹Ngono bakabadwa bakati, “Yahwe bamubone! Babone tjabangashinga ndimwe! Ngoti mathama kuti tishimike mu mesho a Faro ne balanda babe. Malonga thumo mu maboko abo kuti batibulaye.”

²²Ipapo Mushe kayenda kuna Yahwe kati, “She, ini mathama zwinogwadza ku bathu ibaba kene? Makabe manditumilani iko?

²³Ngoti kudwila pandakalebeleka na Faro mu zina lenyu, wakathamila bathu ibaba mbipo, koga amuzosunungula bathu benyu ndodwa.”