Read Kalanga Kufuluka 6 Bible Online

Kufuluka 6 - Kalanga bible

Kufuluka 6

¹Koga Yahwe bakadwa Mushe bakati, “Ngwenu utjawobona tjandinowoshinga Faro, nge simba langu ndowokombeledza Faro kuti aduse bathu bangu mu shango iye.”

²Ndzimu ukadwa Mushe ukati, “Ndimi Yahwe.

³Ndakazwilakidza kuna Abhurahama ne kuna Isaki ne kuna Jakubo nditi ndimi Ndzimu Masimbawose, koga andizothama kuti bandizibe nge zina langu Yahwe.

⁴Ndakati athama tjidumano tjangu nabo, kubapa shango ye Kanana, shango yabakagala bali bataya.

⁵Pezhugwi kwa ikoku, ndakahwa kutshinda kwe Baiziraela bakathamwa balanda nge Baegipiti, ndizo wali ndakumbula tjidumano tjangu.

⁶Ndizo wali budza Baiziraela uti, ‘Ndimi Yahwe ngono ndowomutula mitolo yamakasengeswa nge Baegipiti abuya amudusa mu bulanda gwabakamulonga muguli. Ndowomudzutunula nge masimba nenge shamu dzinogwadza.

⁷Ndowomutola mukabe bathu bangu, imi ndowobe Ndzimu wenyu, ngono mowoziba kuti ndimi Yahwe Ndzimu wenyu iwo wakamutula mitolo yamakasengeswa nge Baegipiti.

⁸Ndowomuyisa ku shango yandakatuna kuipa Abhurahama na Isaki na Jakubo. Ndowomupa iyo kube yenyu. Ndimi Yahwe.’ ”

⁹Mushe kabudza Baiziraela ikoku ngono bakasiteedze Mushe beikhwa nge kunyala moyo nenge bulanda gwabo gunogwadza.

¹⁰Yahwe bakadwa Mushe bakati,

¹¹“Yenda kuna Faro Mambo we Egipiti undwe aletje Baiziraela babhude mu shango iye.”

¹²Mushe iye kadabila Yahwe eti, “Bonani Baiziraela abazonditeedza, Faro iye ngono unowonditeedza tjini, imi ndisi nyambi ye leba?”

¹³Koga Yahwe bakalebeleka na Mushe na Aroni kuti babudze Baiziraela na Faro Mambo we Egipiti kuti ibo batumwa kudusa Baiziraela mu shango ye Egipiti.

¹⁴Aba ndibo bakololo ba Rubheni mbano ya Iziraela: Hanoki na Phalu na Hezironi na Khami, ibo bali misholo ye misha yabo.

¹⁵Bakololo ba Simiyoni ndi Jemuyele na Jamini na Ohadi na Jakini na Zohari na Shaulo mwana we nkadzi we Nkanana. Ndigo ludzi gwa Simiyoni igogu.

¹⁶Awa mazina e bakololo ba Levi kuyenda nge zwizekugwana zwabo: Geshoni na Kohati na Merari. Levi wakatjila makole ali zana lina makole ali makumi ali matatu ne makole ali kutendeka (137).

¹⁷Bakololo ba Geshoni ndi Libini na Shimeyi nge misha yabo.

¹⁸Bakololo ba Kohati ndi Amuramu na Izha na Heburoni na Uziele. Kohati wakatjila makole ali zana lina makole ali makumi ali matatu ne makole ali matatu (133).

¹⁹Bakololo ba Merari ndi Mahili na Mushi. Ibaba i bana be bana ba Levi kuyenda ngozwagwa kwabo.

²⁰Amuramu kalobola maahadzi babe Jokebedi ngono bakazwala Aroni na Mushe. Amuramu katjila makole ali zana lina makole ali makumi matatu ne makole ali kutendeka (137).

²¹Izha wakabe ana bakololo batatu: Kora na Nephegi na Zikiri.

²²Bakololo ba Uziele ndi Mishayele na Elizafani na Sitiri.

²³Aroni kalobola Elishebha nkololokadzi wa Aminadabhu hazwadzi ya Nashoni ngono bakazwala Nadabhu na Abihu na Eleazari na Ithamari.

²⁴Bakololo ba Kora ndi Asiri na Elikana na Abiyasafu. Iyeyi ndiyo misha ye Bakora.

²⁵Eleazari nkololo wa Aroni kalobola mmwe we bakololokadzi ba Putiele ngono bakazwala Finihasi. Aba ndibo misholo ye misha ye bana ba Levi.

²⁶Aroni na Mushe ndibo bakati bakadwiwa ndi Yahwe bakati, “Dusani Baiziraela nge njudzi dzabo mu shango ye Egipiti.”

²⁷Mushe iwoyu na Aroni, ndibo bakalebeleka na Faro ngekwe kudusiwa kwe Baiziraela mu shango ye Egipiti.

²⁸Zhuba lakati Yahwe bakalebeleka na Mushe mu shango ye Egipiti,

²⁹Yahwe bakadwa Mushe bakati, “Ndimi Yahwe, budza Faro Mambo we Egipiti tjimwe ne tjimwe tjandinokubudza.”

³⁰Koga Mushe kabe eti kuna Yahwe, “Bonani, imi anditotubula kulebeleka, Faro unowonditeedza tjini kene?”