Read Kalanga Kufuluka 8 Bible Online

Kufuluka 8 - Kalanga bible

Kufuluka 8

¹Ipapo Yahwe bakati kuna Mushe, “Yenda kuna Faro undwe uti, ‘Yahwe bakati, “Letja bathu bangu bayende kuti banondinamata.

²Koga ha ulamba kubaletja kuti bayende, bona, ndowoloba shango iyo yose nge mazhula.

³Gwizi gwe Naili gowozhala mazhula anowoti kazhala ne mu ng'umba iyo ye bumambo, anowongina mu ng'umba ye bulalo gugo katatha pa bulawo gugo. Anowongina mu ng'umba dze makombgwa awo ne muna dze bathu babo, anowongina mu mabhikilo enyu ne mu ndilo dzinovangigwa zwiwunga.

⁴Mazhula iyawo anowokutatha kabuya katatha bathu babo ne makombgwa awo.” ’ ”

⁵Yahwe bakadwa Mushe bakati, “Idwa Aroni uti, ‘Tambunudza luboko gugo umilidzile ludozo gugo pezhugwi kwe njizi ne ngolo dze vula na pezhugwi kwe madziba e vula uthame kuti mazhula azhe mu shango ye Egipiti.’ ”

⁶Ndizo Aroni katambunudzila luboko gugwe pezhugwi kwe vula dze Egipiti ngono mazhula akazha kazhala shango ye Egipiti.

⁷Koga ng'anga dzikathamabo saikoko nge masalamusi adzo dzikazhisa mazhula mu shango ye Egipiti.

⁸Ipapo Faro kadana Mushe na Aroni ebe ebadwa eti, “Kumbilani Yahwe batidusile mazhula iyawa, imi ne bathu bangu, ngono ndowoletja bathu ibaba bakayenda kunodusila Yahwe zwibhayilo.”

⁹Mushe kabe eti kuna Faro, “Imwi mundibudze kuti ndimutembezelele lini imwi ne makombgwa enyu ne bathu benyu kuti mazhula abulawe mu ng'umba dzenyu asale mu gwizi gwe Naili koga.”

¹⁰Iye kabe eti, “Mangwana.” Mushe kabe eti, “Ngakube sekwa munoleba kuti ndizo muzibe kuti akuna unonga Yahwe Ndzimu wedu.

¹¹Mazhula anowodwa mukuli ne mu ng'umba dzenyu ne makombgwa enyu ne bathu benyu, anowosala mu Naili koga.”

¹²Kukati Mushe na Aroni basinodwa pana Faro Mushe kakumbila Yahwe ngekwe mazhula se kwaakabe adumana na Faro.

¹³Yahwe bakathama tjakabe tjakumbigwa ndi Mushe, mazhula kafa mu dzing'umba ne mu mapakasa ne mu shangobo.

¹⁴Baegipiti bakaakubunganya mimbumba ne mimbumba, shango inuhwa itiphuu.

¹⁵Koga Faro kati ebona kuti kwatiphee kakukutadza moyo uwe ngono kasibateedze sekwa kaleba Yahwe.

¹⁶Ipapo Yahwe bakati kuna Mushe, “Idwa Aroni atole ludozo gugwe alobe pasi kuti hwuluba ibe nyunyu mu shango yose ye Egipiti.”

¹⁷Bakathama saikoko; Aroni kamilidza ludozo gugwe kaloba pasi ngono kukabe ne nyunyu mu bathu ne mu phuka. Hwuluba yose ye shango ye Egipiti ikabe nyunyu.

¹⁸Ng'anga dzikagwisa nge masalamusi adzo kuzhisa nyunyu koga dzikakongwa. Nyunyu dzikabe mu bathu ne mu phuka.

¹⁹Ng'anga dzikadwa Faro dzikati, “Ikoku mishingo ye Ndzimu.” Koga Faro kakukutadza moyo uwe kasitongo bateedza se kwakaleba Yahwe.

²⁰Ipapo Yahwe bakadwa Mushe bakati, “Umuke mangwanana unoshanganidza Faro, unowobe eyenda ku gwizi ngono undwe uti, ‘Yahwe bakati, “Letja bathu bangu bayende kuti banondinamata.

²¹Ha ungasaletja bathu bangu bakayenda, bona, ndowotumila milunda ye thuzi ku kuli neku makombgwa awo ne ku bathu babo. Ng'umba dzidzo ne dze Baegipiti dzowozhala milunda ye thuzi ne pamwe ne pamwe padziyapo.

²²Koga mu zhuba ilelo ndowothama n'gathu unosiyila kuzhe shango ye Gosheni kugele bathu bangu, akutowoboneka milunda ye thuzi kuyita kuti uzibe kuti ndimi Yahwe mu shango.

²³Ndowobiga n'gathu pakati kwe bathu bangu ne bathu babo saikoko. Mangwana tjilakidzo itjetji tjowoboneka.” ’ ”

²⁴Yahwe bakathama saikoko; kukazha milunda mikulu ye thuzi mu ng'umba ya Faro ne mu ng'umba dze makombgwa awe ne mu shango ye Egipiti ngono shango ikatjinyika ngekwe thuzi.

²⁵Faro kadana Mushe na Aroni kabadwa kati, “Yendani munodusila Ndzimu wenyu tjibhayilo koga muli mu shango iyeyino.”

²⁶Koga Mushe kabe eti, “Kowobe kusakalulwama kuthama saikoko; ngoti ha tiijalo towobe tibhayila Yahwe Ndzimu wedu zwibhayilo zwinoshimisa Baegipiti. Apa ha tibhayila Yahwe zwibhayilo zwinoshimisa Baegipiti pa mesho abo, apa Baegipiti abanga tikikithidze nge mabgwe kene?

²⁷Iswi takafanila yenda gwendo gwe mazhuba matatu mu tjilambanyika tibe tibhayila Yahwe Ndzimu wedu sekwabanowotidwa.”

²⁸Faro kabe eti, “Ndowomuletja mukayenda kunobhayila Yahwe Ndzimu wenyu mu tjilambanyika, koga musiyendile kulekule. Mundikumbililebo.”

²⁹Ipapo Mushe kabe eti, “Ndobhuda ndoyenda ndodwa pamuli ngono ndowotembezela Yahwe kuti milunda ye thuzi idwe pa muli ne pa makombgwa enyu ne mu bathu, koga mangwana musitongo pitukana kakale mube musingaletje bathu kuti bayende kunobhayila Yahwe.”

³⁰Mushe kadwa pana Faro ngono katembezela Yahwe.

³¹Yahwe bakathama tjakumbigwa ndi Mushe bakadusa milunda ye thuzi pana Faro ne pa makombgwa awe ne mu bathu kukasheta ne ing'ompela yasala.

³²Koga Faro kakukutadza moyo uwe kakale kasiletje bathu kuti bayende.