Read Kalanga Kufuluka 9 Bible Online

Kufuluka 9 - Kalanga bible

Kufuluka 9

¹Ipapo Yahwe bakadwa Mushe bakati, “Yenda kuna Faro undwe uti, ‘Yahwe Ndzimu we Bahebheru bakati, “Letja bathu bangu bayende banondinamata.

²Ha ungadwilila ulamba kubaletja kuti bayende,

³bona, Yahwe banowozhisa tjigwele tjakabipa mu ng'ombe dzidzo dzose ne mu mbizi ne mu madonki ne kamela ne mu pkhwizi ne mbudzi.

⁴Koga Yahwe banowoshalaula zwithuwo zwe Iziraela muna zwe Egipiti kuyita kuti kusibe ne tjinofa tje bathu be Iziraela.” ’ ”

⁵Ngono Yahwe bakabiga tjibaka bakati, “Mangwana Yahwe banowokushinga ikoku kuthu mu shango.”

⁶Kwakati tjimuka Yahwe bakashinga tjabakaleba, zwithuwo zose zwe Egipiti zwikafa, koga muna zwe Iziraela akuna zwakafa.

⁷Faro katuma bathu bakanoshola, ngono bonani, bakawana kusina ne tjing'ompela tje zwithuwo zwe Baiziraela tjakafa. Nenguba kwakajalo, Faro kakukutadza moyo uwe kasiletje bathu bakayenda.

⁸Yahwe bakadwa Mushe na Aroni bakati, “Nokolani nlota mu tjibeso nge maboko enyu alizhele, Mushe auposele pezhugwi eupaladza mu phepo Faro akalinga.

⁹Ngono nlota unowobe hwuluba ye bgwisana mu shango yose ye Egipiti ube malonda anonyikishila mu bathu ne mu zwithuwo mu shango yose ye Egipiti.”

¹⁰Ndizo bakatola nlota mu tjibeso bakama mbeli kwa Yahwe ngono Mushe kauposela pezhugwi mu phepo ngono ukabe ube malonda anonyikishila mu bathu ne zwithuwo.

¹¹Ng'anga dzikasitubule kuboneka pana Mushe dziikhwa nge malonda ngoti malonda akabe ali mu ng'anga ne mu Baegipiti bose.

¹²Koga Yahwe bakakukutadza moyo wa Faro ngono kasibahwilile, koga Yahwe sekwa bakabudza Mushe.

¹³Ipapo Yahwe bakati kuna Mushe, “Umuke mangwanana uyende kuna Faro undwe uti, ‘Yahwe Ndzimu we Bahebheru bakati, “Letja bathu bangu bayende kuti banondinamata.

¹⁴Ngoti tjibaka tjino ndowokuloba shamu inowotuthula moyo uwo, iwe ne makombgwa awo ne bathu babo kuti uzibe kuti akuna unonga imi mu shango yose.

¹⁵Ngoti ngwenu wali ndingabe ndakatambunudza luboko gwangu akuloba nge bugwele iwe ne bathu babo, kungabe kujali makapela mu shango.

¹⁶Koga tjandakakuletjela kuti utjile hwuti ndikulakidze masimba angu, kuyita kuti zina langu lilebgwe mu shango yose.

¹⁷Koga iwe utjazwikudzazo nge bathu bangu, autobaletja bakayenda.

¹⁸Bona, mangwana nge tjibaka itjetji ndowothama kuti tjivulamabgwe tjakabangalala tjine, tjowobe tjili tjisathu tjikatongobepo mu Egipiti kudwa mu kubambiwa kwayo kudzina kuswikila sakuno.

¹⁹Ndizo sakuno wali, kubunganyani zwithuwo zwenyu zose zwimu shango na zose zwamunazo zwiyisiwe pakabakililika, ngoti tjivulamabgwe tjowowila nthu mmwe ne mmwe kose ne zwithuwo zwimu shango zwisazhisiwa mu nzi, ngono zowofa.

²⁰Ipapo mmwe ne mmwe we makombgwa a Faro unotja Yahwe kathama kuti balanda babe ne zwithuwo zwitizhile mu ng'umba.

²¹Koga mmwe ne mmwe wakashayila hanya Yahwe kaletja balanda babe ne zwithuwo mu shango.” ’ ”

²²Yahwe bakadwa Mushe bakati, “Milidza luboko gugo utendeke pezhugwi, kuti kube ne tjivulamabgwe mu shango yose ye Egipiti, mu bathu ne mu zwithuwo ne nti mmwe ne mmwe mu shango mu Egipiti.”

²³Mushe kati emilidza luboko gugwe etendeka pezhugwi Yahwe bakazhisa dutu gulu ne tjivulamabgwe, vula ikadadamula. Yahwe bakanisa tjivulamabgwe mu shango ye Egipiti.

²⁴Kwakabe ne tjivulamabgwe tjikulu ne vula idwilila ipenya kusakatongobepo mu shango ye Egipiti.

²⁵Tjivulamabgwe tjikaloba tjimwe ne tjimwe mu Egipiti, nthu ne phuka ne zwinomela tjiloba tjiligila pasi tjizazabula nti mmwe ne mmwe mu shango.

²⁶Ku Gosheni koga kwakabe kugala Baiziraela ndiko kwakabe kusina tjivulamabgwe.

²⁷Ipapo Faro katuma bathu bakanodana Mushe na Aroni, ngono kabadwa kati, “Ndimi ndatjinya dumbu tjibaka tjino, Yahwe bakatambunuka, imi ne bathu bangu ti batjinyi.

²⁸Mutikumbilile kuna Yahwe ngoti kwathamwa nge dutu ne tjivulamabgwe kwalizana, ndowomuletja mukayenda, anditjowobe nditjamudzibila.”

²⁹Mushe kanshandula kati, “Ndowoti koga ndibhuda mu nzi nkulu ndowotembezela Yahwe, dutu lowopela ne tjivulamabgwe atjitowobepo kuti uzibe kuti shango nge ya Yahwe.

³⁰Koga iwe ne makombgwa awo ndoziba kuti amuthu mukatja Yahwe Ndzimu.”

³¹“Minda ye maluba anothama jila neye mathunde anoyi bhali ikatjinyiwa nge tjivulamabgwe. Mathunde e bhali akabe aputjula ne maluba iwo akabe atjakafunda.

³²Koga mathunde e korong iwo aazotjinyiwa ngoti enonoka kukula.”

³³Mushe kadwa pana Faro kabhuda mu nzi nkulu ngono kamilidza maboko awe katembezela Yahwe ndizo dutu ne tjivulamabgwe zwikama ne vula ikakaamudza.

³⁴Koga Faro kati ebona kuti vula ne tjivulamabgwe ne dutu zwakaamudza, katjinya kakale kakukutadza moyo uwe, makombgwa awe na iwobo.

³⁵Ndizo moyo wa Faro ukakukutala kasiletje bathu be Iziraela bakayenda sekwakabe kwaleba Yahwe betuma Mushe.