Read Kalanga Jobe 1 Bible Online

Jobe 1 - Kalanga bible

Jobe 1

¹Kwakati kukabe ne nlume mu shango ye Uzi, zina lile kuyi Jobe, wakabe ali nthu usina nlandu, wakatambunuka, unotja Ndzimu kakale unoleya mbipo.

²Jobe wakabe ana bakololo bali kutendeka ne bakololokadzi bali batatu,

³wakabe ana pkhwizi dzili zwiwulu zwili kutendeka (7 000) ne kamela dzili zwiwulu zwili zwitatu (3 000) ne majokwi e ng'ombe ali mazana mashanu (500) ne madonki makadzi ali mazana mashanu (500) ne balanda bali banjinji kwazo. Ndizo wakabe ali nthu wakafuma kwazo mu bathu bose baku bhezhuba.

⁴Bakololo ba Jobe bakabe begala belabana kuthama nzano mu misha yabo, ngono bakabe bekoka hazwadzi dzabo kuti bawoja ne kung'wa nabo.

⁵Kwakabe kuti mazhuba e nzano awila Jobe wakabe etumila bathu kuti bana babe badang'we kuti abatjenapadze, wakabe ebinduka mangwanana edusila mmwe ne mmwe wabo tjibhayilo tjinopisiwa ngobe wakabe ekumbula kuti bangadwa bakathama tjibi kakale bakatuka Ndzimu mu mimoyo yabo. Jobe wakabe ethama sa ikoku zwibaka zose.

⁶Ngono kwakati limwe zhuba bakololo be Ndzimu[1] bakazha kuwozwilakidza mbeli kwa Yahwe, Satani kazhabo nabo.

⁷Yahwe bakabhuzwa Satani beti, “Unodwa ngayi?” Satani kadabila Yahwe eti, “Ndodwa kuyendayenda mu shango ne kupotelekapoteleka muili.”

⁸Ngono Yahwe bakabhuzwa Satani beti, “Apa wabe ne hanya ngekwe nlanda wangu Jobe kene? Akuna nthu unonga iye mu shango, nthu usina nlandu, wakatambunuka kakale unotja Ndzimu kakale unoleya mbipo.”

⁹Ipapo Satani kadabila eti, “Apa moti Jobe unomutjila suli kene?

¹⁰Apa amuzombakilila nge bhakasa iye nebe nsha uwe nenge tjimwe ne tjimwe tjaanatjo kene? Makakombolela tjimwe ne tjimwe tjaakashinga nge maboko awe kakale makampa zwithuwo zwinjinji zwizhele shango.

¹¹Koga tambunudzani luboko gwenyu mubulaye tjimwe ne tjimwe tjaanatjo, unowomutuka patjena!”

¹²Ngono Yahwe bakati kuna Satani, “Kwakalulwama, tjimwe ne tjimwe tjaanatjo ndotjilonga mu luboko gugo koga iye nge kukwe usitongobuya ukankutha nge tjinyala tjitjo!” Ndizo Satani kadwa mbeli kwa Yahwe kayenda.

¹³Kwakati limwe zhuba bakololo ne bakololokadzi ba Jobe bakabe bali mu nzano beja beng'wa nkumbi we zhambi ku nsha we hwola yabo,

¹⁴kukazha ntumwa kuna Jobe kabe eti, “Ng'ombe dzabe dzilima ngono madonki efula tjapejo,

¹⁵ngono bathu be Sheba bazha bakadzinginilila bakadzitakula bakayenda nadzo. Babulaya balanda bose nge thumo. Ndimi ndonga ndasiya kuwomuzibisa!”

¹⁶Ntumwa wakati asathu awidza matama awe mmwe ntumwa kazha kati, “Moto we Ndzimu waloba pkhwizi ne balisi bose. Ndimi ndoga ndapudzumuka kuzha ndiwomuzibisa.”

¹⁷Ntumwa wakati atjalebeleka mmwe ntumwa kazha eti, “Bakhaladiya bazha bakazwibumba makupo matatu bakanginilila dzikamela bakadzitola bakayenda nadzo. Babulaya balanda bose nge thumo ndimi ndoga ndasala kuwomuzibisa!”

¹⁸Nlanda wakati atjalebeleka mmwe nlanda kazha eti, “Bakololo ne bakololokadzi benyu babe beja beng'wa nkumbi we zhambi bali ku nsha we hwola yabo,

¹⁹tjinyolotjo kukazha dutu lidwa ku tjilambanyika likavuna phanda nna dze ng'umba, ngono ng'umba ikabawila ngono bafa bose, ndimi ndoga ndasala kuwomuzibisa.”

²⁰Ipapo Jobe kamilika kapalula zwiambalo zwizwe, katesela[2] nsholo uwe, kawila pasi kanamata.

²¹Ngono kati, “Ndakazwagwa ndili mbujo, ndowobgwilila ndili mbujo, Yahwe bakapa, Yahwe batola. Ngakukudziwe zina la Yahwe!”

²²Muna ikoku kose Jobe ha aazotjinya kene kuli kutendeka Ndzimu nge tjinyala.