Read Kalanga Jobe 10 Bible Online

Jobe 10 - Kalanga bible

Jobe 10

¹“Ndoshima butjilo gwangu, ndowodusa tjipa moyo ngekwe kung'ong'ola kwangu, ndowolebeleka ngogwadziwa kumukati kwangu.

²Ndowodwa Ndzimu nditi musindibone nlandu, koga mundibudze kuti ini tjamunondibonela nlandu.

³Apa komushathisa kundidziyidza, kulengudza nshingo we maboko enyu kene? Koga mushathila butjakwani gwe babi kene?

⁴Apa muna mesho e nyama kene? Apa mobona sekunobona nthu?

⁵Apa mazhuba enyu anofanana ne mazhuba e nthu wali? Ne makole enyu apa anofanana ne e nthu wali?

⁶Ini ngono mushakisisa kutjinya kwangu, ne kusala shule tjibi tjangu?

⁷Nenguba muziba zwenyu kuti andite ndili nlandu ne kuti akuna iye ungandiangula mu luboko gwenyu kene?

⁸“Nge maboko enyu makandisinyanga mukandibumba. Apa ngwenu mungashanduka mukandikolomola kene?

⁹Kumbulani kuti makandibumba nge ntapkhwi. Apa mowondishandula ndikabe hwuluba kakale kene?

¹⁰Apa amuzonditebula se nkaka kene? Apa amuzondikununga se tjatjile kene?

¹¹Apa amuzondiambadza ganda ne nyama, mukandiluka mubhatshanya mafupa angu ne makanyu kene?

¹²Makandipa butjilo ne ludo gusingazunguzike, makatjengeta meya yangu.

¹³“Koga zwithu izwezwi makazwisumbika mu moyo wenyu, ndoziba kuti ikoku kwagala kuli mu nkumbulo wenyu.

¹⁴Ha nditjinya mobe makandilinga, ngono amungandiletje ndisalobgwa shamu.

¹⁵Ha ndili nlandu, ndabangalaligwa wee! Ha ndili nlulwami, ndokongwa nge kumusa nsholo wangu ngobe ndibhakhwa nge shoni kwazo, andibona kudziyidzika kwangu.

¹⁶Ha nditi ndomusa nsholo mondivima se shumba, mothama matjenamiso mundili.

¹⁷Momusidzila batendeki benyu batshwa nge kwangu, mupapha bushongola gwenyu mu ndili, mogala muna zila tshwa kundiloba.

¹⁸“Makathamilani kuti ndizwagwe kene? Ndoyemula ndingabe ndakafa kusina zhisho lathu landibona,

¹⁹kuti kunge se ungati andizotongobepo, kene kunge se ungati ndakadwa mu ntumbu ndiyisiwa ku gomba.

²⁰Apa mazhuba angu e bupenyu ate ali mashomanana kene? Mundiletje nditongobe nge tjibaka tje shatho,

²¹ndisathu ndikayenda kwandisingawoshanduka, ku shango ye buyendasi ne zhalima lakati zwititi,

²²shango yakati zwititi ne kushangashangana shango ina tjedza tjinonga zhalima.”