Read Kalanga Jobe 11 Bible Online

Jobe 11 - Kalanga bible

Jobe 11

¹Ipapo Zofa we N'namathi kadabila eti,

²“Apa matama wose mangapa aatodabigwa kene? Apa nthu unoleba matama manjinji ungashayiwa nlandu kene?

³Apa matama awo e ludado anonyaladza balume kene? Apa audada akuna unowokutjemela kene?

⁴Unoti, ‘Kudiya kwangu kwakatjena, kakale ndi mbuyanana mu mesho enyu.’

⁵Koga ungati Ndzimu ungalebeleka, ukakuzhulila nlomo wawo ukakubudza,

⁶ukakubudza zwikohwa zwe butjenjedu, ngobe butjenjedu gwe lebeswa gukabili. Ziba woku, Ndzimu unokuloba shamwana isakalizana zwibi zwizo.

⁷“Apa ungashaka ukabona zwithu zwikulu zwe Ndzimu? Apa ungashaka ukabona bhelelo le simba la Masimbawose kene?

⁸Lopinda zhuzhugwi dumbu, ungathamani wali? Lopinda kungina kwe bugalo gwe bafi, ungazibani wali?

⁹Tjilizanyo tjalo tjopinda shango nge bulefu, bupabi gwalo gopinda gungwa.

¹⁰Ha Ndzimu uti upinda ukakulonga mu ng'umba ye busungwa, ukadanila kusumikilisiwa, apa ndiani ungaudziba kene?

¹¹Nge malebeswa unoziba bathu basi betjimwe, apa aubona bubi autobe ne hanya nge kwangu kene?

¹²Tjilengwe tjingatjenjela, koga ha donki ye shango inga zwagwa ili nthu.

¹³“Ngono koga ha ungaupa moyo uwo, ukamilidzila maboko awo kuuli,

¹⁴ha ungalashila kutjena jinyo limu luboko gugo, ukasiletjedzele bubi gukagala mu nshasha uwo,

¹⁵ipapo ndiko unowomilidza buso gugo usina shoni, unowoma wakasima usingatje.

¹⁶Ngelebeswa unowokangang'wa mang'oni awo ukaakumbula se vula yakatongowunga.

¹⁷Butjilo gugo gowopenya kupinda masikati makulu, zhalima lago likanga mangwanana.

¹⁸Unowonyaladzika ngoti kuna kugalabgwe, unowobakililika ngono ukanyaluluka wakabakililika.

¹⁹Unowolala kusina unokutjisa, banji banowoyemula kushathisiwa ndiwe.

²⁰Koga mesho e babi anowokong'wa, bakasibone pabangapudzumuka ndipo. Kugalabgwe kwabo kowobe kuti bangafa.”