Read Kalanga Jobe 12 Bible Online

Jobe 12 - Kalanga bible

Jobe 12

¹Ipapo Jobe kashandula eti,

²“Nge malebeswa ndimwi bathu dumbu, butjenjedu gowofa namwi!

³Koga ndina hwisiso koga samwi, andite ndili ntukununu mu muli. Ndiani usinga zibe zwithu izwezwi zwakajali kene?

⁴Ndatjibe tjiseko ku bakwinya bangu, imi ndakabe ndidana Ndzimu ukandidabila, nlulwami kakale usina nlandu watjibe itjo tjiseko.

⁵Iwoyu wakaliga makumbo una kulingila pasi kusheta phazha, beti kuwigwa nge mang'oni koshingikalila ibabo banodengadenga.

⁶Koga mishasha ye batoleli imile nge kunyalala, na ibabo banotanga Ndzimu bakabakililika, ibo banosenga ndzimu wabo nge maboko abo.

⁷“Koga bhuzwa phuka ngono dzowokudiya, kene nyuni ngono dzowokubudza,

⁸kene lebeleka ne shango ngono inowokudiya, kene hwobe dze gungwa dzowokubudza.

⁹Ndizwipi zwe zwithu izwezwi zwisingazibe kuti luboko gwa Yahwe gwakathama ikoku kene?

¹⁰Ibo mu luboko gwabo kuna butjilo gwe zwitjili zose, ne meya ye bathu bose.

¹¹Apa zebe aitoshakisisa matama kene, koga se bgwasha guhwa kuzipa kwe zojiwa?

¹²Apa butjenjedu ate guli mu sholotjena kene, ne kuhwisisa akutozha nge mazhuba manji kene?

¹³“Ku Ndzimu kuna butjenjedu ne simba ndiwo una gumbuludzo ne hwisiso.

¹⁴Bona, aukolomola akuna ungamusa, auzhalilila nthu akuna ungazhula.

¹⁵Bona, ha udzibila vula kuna kobe ne bhamba, ha uiletjedza kobe ne nkubila ngono zokulila shango.

¹⁶Ku uli kuna simba ne butjenjedu batjebeli ne banotjebegwa nge bawo.

¹⁷Unotatila kutjena bakumbuludzi basakasungila, basumikilisi ukabathama zwilengwe.

¹⁸Unosungunula misungo ya bomambo, ukasunga thunji dza bomambo nge mwandabula we jila.

¹⁹Unotatila kutjena bapirisiti basakasungila, ukakudubhula bakasima.

²⁰Unonyaladza milomo ye banogalikabgwe, katola butjenjedu gwe sholotjena.

²¹Unolonga kulingigwa pasi mu bakololo ba bomambo, ukanyebesa mwandabula we balume bakasima.

²²Unozumbunula masazibgwe mu zhalima, ukadusila zwimu zhalima gulu mu tjedza.

²³Unothama zwitjaba zwikabe zwikulu ngono ukabuya ukazwikolomodza, unothama zwitjaba kuti zwiwande ngono ukazwipaladzila kutjena.

²⁴Unotolela batungamili be shango mikumbulo, ukabamaamisa bakalashika pasina zila.

²⁵Banoambaamba mu zhalima kusina tjedza, ukabathama kuti batshatsharike se bakalaladza.