Read Kalanga Jobe 13 Bible Online

Jobe 13 - Kalanga bible

Jobe 13

¹“Ngayi? Mesho angu akabona kose ikoku ne zebe dzangu dzakahwa dzikakuhwisisa.

²Tjamunoziba ndotjizibabo, anditendili ntukununu mu muli.

³Koga ndowolebeleka ndakazwilingisanya na Masimbawose, Ndoshaka kunyanyayidzana ne Ndzimu mu ndebo yangu.

⁴Ngono imwi mondidzinganyidza nge manyepkhwa, mu ng'anga dzisidza tjimwe mose!

⁵Koga ha mabe munganyalala, ndiko kungabe butjenjedu gwenyu!

⁶“Tjiteedzani ndebo yangu ndomukumbila, tjibhulutanani tjinodwa mu nlomo wangu.

⁷Apa mowolebelekela Ndzimu zwisi izo? Apa mungaulebelekela nge matama e butjebeli kene?

⁸Apa munga umilila kene? Apa mungalebeleka ndebo ye Ndzimu muulebelekela kene?

⁹Apa kunga mululwamila wali ha unga mushakisisa kene? Kene munga utjebela se munotjebela nthu wali?

¹⁰Nge malebeswa ungamutjemela, ha muumilila nge kusakatambunuka.

¹¹Apa bukulu gwawo agutomutjisa kene? Apa kutjisa kwawo akutomuwila kene?

¹²Ndebeleko dzenyu makungulupeswa e hwuluba koga, mbakililo dzenyu adzina mongo.

¹³“Nyalalani, nditongolebeleka, andina hanya ne tjinga ndishingikalila.

¹⁴Ndozwilonga mu mbatsha, alonga butjilo gwangu mu maboko angu.

¹⁵Bonani, nenguba ungandibulaya, anditjina kugalabgwe, koga ndowozwilebelekela mbeli kwawo.

¹⁶Ikoku kowobe ilo jidzo langu, ngoti akuna nthu we mbipo ungazha mbeli kukwe.

¹⁷Bhulutanani matama angu, tjandinoleba ngatjingine mu zebe dzenyu.

¹⁸Bonani, ndalulwamisa ndebo yangu, ndoziba kuti anditowobong'wa nlandu.

¹⁹Apa ndiani unga nyanyaidzana nami kene? Ngoti aaliyapo ndowonyalala ngono ndikafa.

²⁰“Mundithamile zwithu zwibili koga, Ndizo anditowomubgwatila.

²¹Dusilani kutjena nami luboko gwenyu, kutjisa kwenyu kusindipaluse moyo.

²²Ndizo danani ndowodabila, kene mundiletje ndilebeleke imwi mudabile.

²³Ndakathama milandu mingana ne zwibi zwingana? Mundizibise jinyo langu ne tjibi tjangu.

²⁴“Ini mundisumbikila buso gwenyu? Ini munditola se tjita tjenyu kene?

²⁵Apa monditjisilani ndili zhani linotogwa nge phepo kene? Apa mungashwa makatatana ne bunye gwakawoma kene?

²⁶Mokwala zwithu zwakabipa nge kwangu, mothama kuti ndimililane ne jinyo le butjetjana gwangu!

²⁷Makasungilila makumbo angu mu mapangwana, mogala makalingilila zila dzandinotola, mukalonga lutjwayo mu zwitshitshino zwe matshambo angu.

²⁸Ndoshashamuka se tjimwe tjakabola se gandana lakajiwa ne ntjenje.