Read Kalanga Jobe 14 Bible Online

Jobe 14 - Kalanga bible

Jobe 14

¹“Nthu wakazwagwa nge nkadzi una mazhuba mashomanana, kakale uzhele mang'oni.

²Unopasula se luba linoti tjinyolotjo likabuna, unopinda se ntutshi, aatogalila tjose.

³Apa nenguba akajalo, mon'sundila mesho kene? Mukan'zhisa mbeli kwenyu kun'sumikilisa kene?

⁴Apa ndiani ungadusa tjibuyanana muna tjisi tjibuyanana kene? Akuna ne ung'ompela!

⁵Mazhuba e nthu e bupenyu akalizanyidziwa ne mbalo ye mimwedzi iye moyiziba, makanthamila n'gathu waasingake katjuluka.

⁶Musinlinge ndizo anyaluluke, kuti ashathe se ntapiwa eshathila mazhuba awe.

⁷“Kuna kugalabgwe mu nti, ha wathubugwa unothinila kakale thabi dzawo dze nsunilila adzitofa.

⁸Midzi yawo inokwegula mu mavu bhato lawo ilo lofila mu mavu,

⁹ne kwakajalo ha uhwa doba koga unothinila se nti ntjetjana.

¹⁰Koga nthu ha efa ndilo bhelelo lile unofema gwe bupelo kobe kwapela nge kukwe.

¹¹Se vula ipkhwa mu gakhwa ne njizi dzopkhwa dzikawomelela,

¹²ha zhuzhugwi kutjiyapo, nthu unoizela ngono kasitjamuke kakale, aatomusiwa mu hwope.

¹³Ungati munga ndisumbika mu bugalo gwe bafi mundisumbike kudzina bushongola gwapela, ngekwa itjetjo mowondikumbula!

¹⁴Apa nthu ha efa unosomuka kakale wali? Mazhuba wose mazhuba anolema e nshingo ndowolindila kuswikila mang'oni apela.

¹⁵Ha mundidana ndowomudabila, ndizo mowoshuba nshingo wamakathama nge maboko enyu.

¹⁶Ngelebeswa mowobala thambo dzangu, ngono mukasitja londolodze jinyo langu.

¹⁷Kutjinya kwangu kwakasungigwa mu saka, mowovukidzila jinyo langu.

¹⁸“Koga dombo lowa likwamukana, ne shongwe inotshedugwa mu magalo ayo,

¹⁹se vula dzikwegudza mabgwe, vula ye midumbi inokukula mavu e shango, ndiko sekwa munokolomodza kugalabgwe kwe nthu.

²⁰Mokulila nthu mukantatila kutjena tjatjose, mukaliga tjiso tjitje kafila kutjena.

²¹Bakololo babe banokudziwa koga iye atoziba, ne belengudziwa aatobona.

²²Iye ngekukwe unoteedzela zwibhayo zwimunli, ne buyendasi gumu nli!”