Read Kalanga Jobe 15 Bible Online

Jobe 15 - Kalanga bible

Jobe 15

¹Ipapo Elifazi we N'temani kashandula eti,

²“Apa nthu wakatjenjela ungadabila nge matama asina mongo kene? Kene ezhadza ntumbu uwe ne phepo ye bhezhuba kene?

³Apa ungazwilebelekela nge matama asina nshingo, kene nge ndebo dzisinga mbhatshe nge tjimwe kene?

⁴Koga auna hanya nge kutja Ndzimu, unoyisa pasi kunamata mbeli kwe Ndzimu.

⁵Ngoti jinyo lilo ndilo linodiya nlomo tjawakafanila kutjileba ngono ube ushalula lulimi guzhele butjebeli.

⁶Nlomo uwo ndiwo unokusumikilisa, kusi imi, milomo iyo ndiyo inopa butendeki gunonyanyayidzana nawe.

⁷“Apa ndiwe nthu wekutanga kuzwagwa kene? Kene wakabambiwa kutangila matuthu kene?

⁸Apa wakatongo teedza gumbuludzo le Ndzimu kene? Apa wakazwibigila butjenjedu woga kene?

⁹Apa ini tjaunoziba tjatisinga zibe kene? Una hwisiso ipi yatisinayo kene?

¹⁰Tina sholotjena na bokwegu pakati gwedu, bahwola pana tate babo dumbu.

¹¹Apa nyaladzo ye Ndzimu ishomanana mukuli, matama mabuya aunobudziwa kene?

¹²Ini udzipiwa nge moyo zwingapa kene, ne mesho awo ashanduka kabe mashaba zwingapa?

¹³Uthama kuti bushongola gugo ugulingisanye ne Ndzimu, uletja matama akajali kabhuda mu nlomo uwo wali?

¹⁴“Dumbu nthu ini kwaangabe akatjenapala kene? Iye wakazwagwa nge nkadzi ungabe nlulwami kene?

¹⁵Bonani! Ndzimu autogalabgwe bayengemali bawo, ne kudzimu dumbu akuzotjenapala mu mesho awo.

¹⁶Bukulu seni iye kee, unoshimisa, wakabola nkumbulo, iye unogungila bubi se vula kene?

¹⁷“Unditeedze ndikutjenesele, ima ndikubudze tjandakabona,

¹⁸tjakalebgwa ne bathu bakatjenjela, itjo bobatategulu babo tjabasakasumbika,

¹⁹ibo boga bakapiwa shango, kusakatongobe ne madeluka akapinda pakati kwabo.

²⁰Mazhuba awe wose mbiimbi unodziyidzika, bukukutu gose mu makole wose wakagubigigwa.

²¹Misindo inopalusa moyo inohwika mu zebe dzidze, mu kubhudilila ntoleli unowozha kan'wila.

²²Aatoduma kuti ungapudzumuka mu zhalima, wakalulwamisigwa thumo.

²³Unoyenda yeno na yeno eshaka zojiwa, eti, ‘Zwingayi?’ Unoziba dumbu kuti zhuba le zhalima labe pejo zubuyanana mu luboko gugwe,

²⁴mang'oni ne zogwadza zowondziyidza, zonkulila sa mambo akazwilulwamisila kugwa!

²⁵Ngobe wakamilidzila Ndzimu luboko kalobela Masimbawose ifuba,

²⁶etshambila Ndzimu nge bukomba akabhata zwivikisi zwikodu zwakasima,

²⁷ngobe wakazwimba buso gugwe nge mafuta awe wakatjibhuda mitumbu ngo kola,

²⁸unowogala mu matongo e mizi mikulu ne ng'umba dzisina banogala mudzile, ng'umba dzakamisigwa kube matuluthulu e magwada.

²⁹Aatowofuma, fumwa iye aitowobhatilila, ne thundu iye aitowowanda mu shango.

³⁰Aanga pudzumuke mu zhalima nthuto unowowomesa thabi dzidze, nge mafemo e Ndzimu unowotolegwa kutjena.

³¹Ngaasizwitjengedze nge kugalabgwe tjisi tje tjimwe, ngobe akuna tjinowombuyila.

³²Kowoti tjibaka tjitje tjisathu tjaswika, unowobe alipiwa mbhayilo uwo nge buzhalo, ne lutabi gugwe agutowopasula.

³³Unowoshashamuka mitjelo se nzhambi ushashamuka zhambi dzisakabidwa unonga nti we zhambi washashamuka mitjelo.

³⁴Ngobe goko le basingagalebgwe lowoshaya bana, moto unowoja mishasha ya ibabo banoda tjizwimba nlomo.

³⁵Banozwisenga mang'oni, bakazwala bubi, mitumbu yabo inolulwamisila butjebeli.”