Read Kalanga Jobe 16 Bible Online

Jobe 16 - Kalanga bible

Jobe 16

¹Jobe kashandula eti,

²“Ndakahwa zwithu zwinjinji zwinonga izwezwi, mose banyaladzi ndimwi motjenamisa!

³Apa matama e phepo sa iyawa anowopela kene? Kene ini tjinomusendedzela kuti mulebeleke?

⁴Namibo ndabe ndingatubula kulebeleka, ha mabe muli mu tjimo tjangu. Ndabe ndowomulukila matama zubuyanana, ndimu zunguzila nsholo.

⁵Ndingabe ndimusimisa nge nlomo wangu, nyaladzo yangu yabe yozhisa kutebama mu muli.

⁶“Nenguba ndilebeleka kugwadziwa kwangu akutotapudzika, kakale ne ndinganyalala naiko akutotapudza zogwadza zwangu.

⁷Nge malebeswa wakanditolela matatabuko, wakalobesa nsha wangu wose.

⁸Wakandisunga, zogwadza zwangu butendeki, ndatjibe mafupa woga, kwatjibe igo butendeki guno nyanyaidzana nami.

⁹Wakandipalulanya nge bushongola gwawo, nge mesho mashaba, wakandilinga nge lubengo kundilumanya nge meno, tjita tjangu tjakandilinga ne mesho anopitsha.

¹⁰Bathu bakandiashamila, banondipkhwaula mu lushaya, bendiseka mahanya banozwishanganya kuti bandigwise.

¹¹Ndzimu wakandilashila mu maboko e bakabipa meya, kandiposela mu maboko e babi.

¹²Ndakabe ndili gele ndakaliga makumbo, ukandibhata ne ntshibha, ukandipkhwanya, asala ndili zwitibhutibhu. Wakandithama tjilipo tjawo,

¹³Baposi bawo be misebe bakandipoteleka, unondipubulanya so dzangu asina ngoni, kapubula ndulu kaitebulila pasi.

¹⁴Unondipubula pubula ubgwilulula, unondiwila se mbhayani.

¹⁵Ndatjithumila saka pezhugwi kwe ganda langu, ndatjibe gele mu hwuluba ndisina matatabuko.

¹⁶Buso gwangu gwazwimba ngolila hwope dzangu dzotjindilemela ngolila.

¹⁷Nenguba ndisina butjinyi mu maboko angu, ne ntembezelo wangu mbuyanana.

¹⁸“Shango wee, usizwimbe malopa angu! Usitongo wanila tjililo tjangu magalo ekunyaluluka.

¹⁹Na ngwenu kose ntendeki wangu ukudzimu, ne mmilili wangu uku zhuzhugwi.

²⁰Bakwinya bangu banondiseka, mesho angu anotebulila mishodzi ku Ndzimu,

²¹kuti abhatilile ndulamo pakati kwe nthu ne Ndzimu, se nthu ali n'gadzanyi egadzanya bakwinya babe.

²²Ngoti mu makole asimuni anozha ndowoyenda kwandisowoshanduka!