Read Kalanga Jobe 17 Bible Online

Jobe 17 - Kalanga bible

Jobe 17

¹Meya yangu inopela, mazhuba angu wopela gomba lakandimilila.

²Nge malebeswa badadi bakandipoteleka, ndogala ndakabalonga zhisho nge sekwa banobhayana nami.

³“Ndomukumbila, mundibigile tjamunoshaka, ndiani ungabe mbakilili wangu kene?

⁴Ngoti makabazwina mikumbulo yabo kuhwisisa, ndizo amutobaletjedza bakakunda.

⁵Iye unoshaka gobe nge kuwonga bakwinya babe, bana babe ndibo banowopelela bedziyidzika nge kwako.

⁶“Wakandithama sumo ku bathu, ndatjibe unothwigwa mate mu buso.

⁷Mesho angu aatjabonesesa nge tjililo, ndungululo dzangu dzabe mafupa koga.

⁸Balulwami bakatjenamila kose ikoko, usina nlandu unomukila usina bundzimu.

⁹Koga nlulwami wakadzikila mu zila dzidze, be maboko mabuyanana banowodwilila ngo sima.

¹⁰Koga imwi, shandukilani kundili, imwi mose, akuna ne nng'ompela wandingawana akatjenjela mu muli.

¹¹“Mazhuba angu akapinda, mikumbulo yangu yakashangashangana, kose ne njemulo dze moyo wangu.

¹²Busiku banoguthama masikati, ‘Tjedza’ banoti, ‘tjipejo ne zhalima.’

¹³Ha ndilinga bugalo gwe bafi ndoti i ng'umba yangu, mu zhalima ndolulwamisa bulawo gwangu.

¹⁴Ndodwa ikumbu nditi, ‘U tate bangu,’ ku gonye ndoti, ‘Mme bangu’ kene ‘Hazwadzi yangu.’

¹⁵Kugalabgwe kwangu kungayi ngono? Ndiani unobona kugalabgwe kwangu kene?

¹⁶Apa kowodelukila ku phanda dze bugalo gwe bafi? Apa towodelukila tose ku hwuluba kene?”