Read Kalanga Jobe 18 Bible Online

Jobe 18 - Kalanga bible

Jobe 18

¹Ipapo Bhilidadi we N'shuhi kashandula eti,

²“Apa unowomisa lini kulebanya kene? Kumbula, ndiko tikolebeleka.

³Apa ini titogwa se ng'ombe koga kene? Apa ini titogwa se zwilengwe mbeli kwenyu kene?

⁴Iwe unozwipalula nge kugwadzamoyo kuko, shango inowolamwiwa nge kuko kene? Kene shongwe dzotshedugwa mu magalo adzo kene?

⁵“Ndodwa, tjedza tje mbiimbi tjowodzimiwa, nthuto we moto uwe unowotundubala.

⁶Tjedza tjabe zhalima mu nshasha uwe, ne luvone gugwe pezhugwi gowodzimiwa.

⁷Thambo dzidze dzakasima dzatapudziwa, Ndongoloso iye inonlasha.

⁸Ngoti unobhatshigwa nge gwanga laateya iye, unoyenda engina mu gomba.

⁹Silaha inon'bhatshila mu itshitshino, dati likan'bhatshila.

¹⁰Wakasumbikigwa nsungo pasi, wakabigigwa bhuzhu mu zila.

¹¹Zwinotjisa zowompalusamoyo kumwe ne kumwe, zwakansala shule pamwe ne pamwe.

¹²Mbatsha dzina zhala nge kukwe, dziyidzika kwakan'lalila kuti akuthiwe,

¹³koja ndungululo dze mbili uwe, mbano ye lufu inoja ndungululo dzidze.

¹⁴Unowodzikunugwa mu nshasha waanogalabgwe, akazhisiwa kuna mambo we zwinotjisa.

¹⁵Mu nshasha uwe kogala bose basi babe, sibaboli tjakapaladzigwa mu magalo awe.

¹⁶Midzi iye inowomelela kusi, ne matabi awe anobuna.

¹⁷Aatja kumbugwa mu shango, aatjina zina mu shango.

¹⁸Unotatiwa mu tjedza etatigwa ku zhalima, unotatiwa mu shango.

¹⁹Aana mwana kene tjizekugwana pakati kwe bathu bakanyi kukwe, akuna limbelimbe lakasala kwaakabe egala.

²⁰Mu zhuba laawigwa, bakazha shule bakatjenama, baku bhezhuba ne baku golombedzo banotetema ngotja.

²¹Nge malebeswa izwezwi magalo e babiibi, gwakajalo bugalo gwe usingazibe Ndzimu.”