Read Kalanga Jobe 19 Bible Online

Jobe 19 - Kalanga bible

Jobe 19

¹Jobe kashandula eti,

²“Apa kowodza kukabe lini mundigongobola kene, kakale mundikowobedza nge matama kene?

³Kwabe ka gumi makabhata mundituka, apa amutobhakhwa nge shoni kunditanga kene?

⁴Ngono nenguba pamwe kuli lebeswa ndakatjinya, nlandu wangu umu ndili ndoga.

⁵Ha nge malebeswa muzwikudza, mushingisa kulengudzika kwangu kundibona nlandu,

⁶zibani ngono kuti Ndzimu ndiwo wanditanga, wandibhatshila nge gwanga gwawo.

⁷Bonani, ndomimila nditi, ‘Ndatangiwa kaa!’ Akuna unonditeedza! Ndolila ndishaka bhatsho koga akuna ndulamo.

⁸Wakazhalila zila yangu kuti ndisipinde, ukabiga zhalima mu zila dzangu.

⁹Wakanditolela gudzo langu, ukandiambula tjiala mu nsholo wangu.

¹⁰Unondipalulanya mbizho dzose, ndatjipelela, ukadzikunula kugalabgwe kwangu se nti.

¹¹Unothutidza bushongola gwawo mundili, unonditola se tjita tjawo.

¹²Babhayani bawo banozwibumba bakabaka matuluthulu kundipoteleka, bakakomba nshasha wangu.

¹³“Wakandithubukanya ne zwikamu zwangu, bandakawolobelana nabo banozwithama basingandizibe.

¹⁴Makamu angu bamile kule nami bakwinya bangu batjindikangang'wa,

¹⁵bezi mu nzi wangu batjindikangang'wa, balandakadzi bangu banonditola se nzhi, ndatjibe ntaya ku bali.

¹⁶Nenguba ndidana nlanda wangu aatondidabila, ne ndinkumbila dumbu nge wangu nlomo.

¹⁷Meya yangu inonuhwila nkadzi wangu, bana ba mmeyangu bakati ndonuhwa.

¹⁸Ne bana batukununu banondilengudza, anditi ndomilika banondiseka.

¹⁹Bose bakwinya bangu bakulu banondishima, ibabo bandakabe ndida kwazo bakandifupatila.

²⁰Mafupa angu akanamatilana ne ganda, ndabuya pa tukununu koga.

²¹“Mundihwile zogwadza, mundihwile zogwadza kaa bakwinya bangu! Ngobe luboko gwe Ndzimu gwandiloba!

²²Ini mundidziyidza se Ndzimu kene? Apa kudziyidza nyama yangu kwenyu akuzogala kene?

²³“Ekee, ungati matama angu angakwagwa! Ekee, ungati angakwagwa mu bhuka!

²⁴Ekee, ungati angakwagwa nge peni ye butale ne mu bgwe, kuti akobolegwe mu bgwe ndizo agalile tjose!

²⁵Ngobe ndoziba kuti Ndzutunuli wangu unotjila, kowoti ku bupelo kama mu shango,

²⁶nenguba ganda langu lapela sa ikoku, koga mu mbili wangu iwoyu ndowobona Ndzimu.

²⁷Ndiwo wandinowobona ku lubizho gwangu, nge mesho angu ndowoubona kusi upoga. Moyo wangu unoyemula ikoku.

²⁸“Amuti, ‘Towon'sala shule kuti!’ Kakale kuti, ‘Budwilo gwe mang'oni ini ne nlandu waakathama ndiupi?’

²⁹Itjani thumo, imwi nge kwenyu, ngobe bushongola gozhisa kulobgwa shamu nge thumo, kuti muzibe kuti kuna kusumikilisa.”