Read Kalanga Jobe 20 Bible Online

Jobe 20 - Kalanga bible

Jobe 20

¹Ipapo Zofa we N'namathi kashandula eti,

²“Njalakang'wa dzangu dzothama kuti ndidabile, ngoti ndidziyidzika mu nkumbulo.

³Ndohwa kutjemela kusina kuteta, ngono mu kuhwisisa kwangu kondisendedzela kuti ndidabile.

⁴Atenditi unoziba kudwa tjose ntolo, kudwa tjibaka tje nthu tjaakabigwa mu shango,

⁵kuti kudziwa kwe babi ndekwe tjibakana koga, ne kuti shatho ye ntjinyi ngeye tjibaka tjifupi koga?

⁶Nenguba mazwikudzo awe eswika ku zhuzhugwi, nenguba nsholo uwe ukutha ku makole,

⁷unowolobela tjose se ndobe iye, ibabo bakatongo mbona banowoti, ‘Ungayi?’

⁸Se mawoloto unokanganika kasitjabongwe, unowotatiwa se mbono ye busiku.

⁹Zhisho lakambona alitjowombona kakale, ne paakatongo gala akutjowombona kakale.

¹⁰Bana babe banowolipa bashayi ngono maboko awe anobgwiliza fumwa iye.

¹¹Nenguba mafupa awe ali zhele masimba e butjetjana, anonolala naye mu hwuluba.

¹²“Nenguba bubi guzipa mu nlomo uwe, nenguba egusumbika kusi kwe lulimi gugwe,

¹³nenguba asingashake kuguletja, egubhatilila mu nlomo uwe,

¹⁴koga zojiwa zwizwe zowoshababa mu ntumbu uwe, zowoshanduka zwikabe bushungu gwe nyoka munli.

¹⁵Fumwa dzaakamidza unowodzithwa Ndzimu unowodzidusa mu ntumbu uwe.

¹⁶Unowong'wa bushungu gwe nyoka, bushungu gwe thumbi gowombulaya.

¹⁷Aatobona njizi dzinowunga kene wobana dzinowunga butji gwe nyutji ne lubomba.

¹⁸Zwaakashingila unozwibgwiliza zwisakajiwa, aatoshathila mimwiso ye zwaashaba.

¹⁹Ngobe wakatshambilidza bashayi kabafupatila, katola ng'umba yaasakabaka.

²⁰“Ngoti asingamise bugovu gugwe, akuna tje zwithu zwaaanoda zwinowonsalila.

²¹Akuna tjakasala shule kwe aja ndizo kubhudilila kukwe akungabhatilile.

²²Mukubhudilila kukwe kwakawanda, dziyidzika kowon'pinda mu zila, simba lose le buyendasi lowowila pezhugwi kukwe.

²³Ha asinozhadza ntumbu uwe, Ndzimu unowodelusila bushongola gwawo guno thuta, ukagunisa munli kube zojiwa zwizwe.

²⁴Unowotizha mu thumo le butale, nsebe we phangula unowonbhaya.

²⁵Nsebe unopubula mbili uwe, ukanophutula ndulo iye unowigwa nge lutjo lukulu.

²⁶Zhalima lakati zwii lakalulwamisigwa thundu iye, moto usina unouthutidza unowonlotesa ne tjasala mu nshasha uwe tjowotshwa.

²⁷Kudzimu kowozumbunula jinyo lile, ngono shango inowon'mukila.

²⁸Thundu iye yose inowotapiwa, inowotutiwa mu zhuba le bushongola gwe Ndzimu.

²⁹Iwoyu ndiwo mbayilo we nthu mbiimbi kudwa ku Ndzimu, lukata gwaakapiwa ne Ndzimu.”