Read Kalanga Jobe 21 Bible Online

Jobe 21 - Kalanga bible

Jobe 21

¹Ipapo Jobe kashandula eti,

²“Teedzani mu bhulutane matama angu, etjo nditjo koga tjingabe nyaladzo yangu.

³Musindinyalile moyo, ima ndowolebeleka, shule kwe ndalebeleka ukowondidadila zo.

⁴Apa imi, kung'on'gola kwangu ndokulingisa ku nthu kene? Ini ndakafanila kuti ndisipele meya?

⁵Mundilinge, mutjename, mubhate milomo.

⁶Andikumbula nge kwako, ndotetema, anditjina gwangu mbili wangu unotetema koga.

⁷Ini babi betjila, bedzina bekwegula, masimba abo epaphidzika kene?

⁸Bana babo bagele baligedzikane mbeli kwabo, bana be bana babo banokulila mu mesho abo.

⁹Ng'umba dzabo dzakabakililika akuna tjinobatjisa, shamu ye Ndzimu aitobaloba.

¹⁰Nkono uwe unokwiila usina mang'oni ng'ombe mayi ina luzwalo aitosodza.

¹¹Banozhulila bana babo se pkhwizi, ngono bana babo bakatamba tamba.

¹²Banomba belidza dzithamborini ne matende beshathila milidzo ye zwilidzo.

¹³Banotjila zwinozipa mazhuba wose, nge mbakiso banoyenda ku bugalo gwe bafi.

¹⁴Banoti ku Ndzimu, ‘Idwani patili, atitoyemula kuziba zila dzenyu.

¹⁵Masimbawose ndiani, watingashwa tishingila kene? Kakale towobuyigwa ngeni atintembezela?’

¹⁶Bonani, kubhudilila kwabo ate kuli mu maboko abo kene? Gumbuludzo le babi ndomila kule nalo.

¹⁷“Apa ndikangana luvone gwe babi godzimiwa kene? Apa mbatsha dzabo dzobawila kangana kene? Apa Ndzimu unosodelusila bushong'ola gwawo mu bali kangana kene?

¹⁸Apa ndikangana betutudziwa se lushanga nge phepo kene, se bunye gunosengwa nge matutu kene?

¹⁹Moti, ‘Ndzimu unobigila mwana shamu ye nlandu wa tate babe.’ Ndzimu ngaulobe shamu iye wakafanigwa ne lobgwa, ngauthame uijalo kuti azibe kuti unolobegwa zwibi zwizwe.

²⁰Ngaabone golomodzo lile nge mesho awe, ngaang'we bushongola gwa Masimbawose.

²¹Ngobe dumbu ini tje nsha uwe tjingan'dziyidza asinokufa, ha mimwedzi ye bupenyu gugwe ithubugwa kene?

²²Apa nthu ungadiya Ndzimu luzibo kene, iwo unosumikilisa bamu magalo a pezhugwi kene?

²³Mmwe unofila mukubhudilila kukwe, aligele akaliga makumbo akabakililika,

²⁴mbili uwe unokwidzima, mafupa awe azhele mongo.

²⁵Mmwe nthu unofa ali mu kuhwa zogwadza, asatongo labila nzipo we butjilo.

²⁶Bose banoizedziwa panofanana mu hwuluba, bejiwa nge hwonyana ngofanana.

²⁷“Bonani, ndoziba njalakang'wa dzenyu, ne mikumbulo yenyu kunditanga.

²⁸Mobhuzwa muti, ‘Ng'umba ye nkololo we bushe ingayi, nshasha wakabe ugagwa nge babiibi ungayi?’

²⁹Apa makatongo bhuzwa bapindi be zila kene? Apa amutoduma zwabanoleba kene?

³⁰Kuti mbi unotjidziwa mu zhuba le mbatsha ne kuti unotjidziwa mu zhuba le bushong'ola kene?

³¹Ndiani ungambudzilila mbeli kukwe, kene unontjemelela zwaakathama kene?

³²Ha eyisiwa ku ikumbu, kobigwa nlindi mu ikumbu tjitje,

³³ne mavu e nkuku anon'zipila, bathu bose banon'sala shule, ne bakantungamila abana mbalo.

³⁴Apa ngono mungandinyaladza nge zwithu zwisina nshingo? Mu dabilo dzenyu akuna tjamusalila kuzhe kwe kusagalikabgwe koga!”