Read Kalanga Jobe 22 Bible Online

Jobe 22 - Kalanga bible

Jobe 22

¹Ipapo Elifazi we N'temani kadabila eti,

²“Apa nthu ungabhatsha Ndzimu ngeni? Apa naiye unoyi ntjenjedu ungaubhatsha kene?

³Apa kuna tjinoshathisa Masimbawose ha uli nlulwami, kene kuna tjinoubuyila ha ululwamisa zila dzidzo kene?

⁴Apa ndi ngekwe kutja Ndzimu kuko kunothama kuti ukutjemele, kwaunodza ukakusumikilisa kene?

⁵Atenditi ndi ngekwe bubi gugo bukulu kene? Akuna bhelelo mu milandu iyo.

⁶Ngoti wakalipisa bana ba tate babo basina nlandu, ukabaambula zwiambalo zwabo bakasala bali mbujo.

⁷Wakanyima wakanyala vula kuti ang'we, ukanyima una zhala zojiwa.

⁸Shango ngeye nlume una masimba! Unokudziwa unogala muili.

⁹Wakatatila tjilikadzi kutjena dzakalembedza maboko, ukapkhwapkhwata siyang'wa maboko.

¹⁰Ndizo ngwenu mapuzhu akakupoteleka, tjinyolotjo unowigwa ngekutja kukulu.

¹¹Tjedza tjitjo tjatjiti zwititi autjabona ne bona, nkubila we vula unokukulila.

¹²“Apa Ndzimu autogala pezhugwizhugwi kene? Bona nyenyedzi kuti dzizhuzhugwi tjini!

¹³Ngono iwe ukati, ‘Apa Ndzimu unozibani wali? Apa ungasumikila uli yeno kwe makole tjini wali?

¹⁴Makole matema akaufukidza kuti ndizo usibone, unoyenda yenda mu tjilungwane tje zhuzhugwi.’

¹⁵Apa unowobhatilila mu zila dza ntolo, dzakabe dzitobegwa nge babi kene?

¹⁶Bakadzamugwa tjibaka tjabo tjisathu tjaswika, thiwa dzabo dzikasengwa nge nkubila.

¹⁷Bakadwa Ndzimu bakati, ‘Idwani patili. Masimbawose ungatithamani wali?’

¹⁸Nenguba uli iwo wakazhadza ng'umba dzabo nge zwithu zwakanaka, dumbu, gumbuludzo le babi ngalibe kutjena nami!

¹⁹Balulwami banokubona ngono bakashatha, basina nlandu banoseka bakadada beti,

²⁰‘Nge malebeswa zwita zwedu zwalobesiwa, ne thundu dzabo dzakasala dzajiwa nge moto.’

²¹“Ndizoke uzwigadzanye ne Ndzimu, ube ne mbakiso nawo, ngekujalo unowozhigwa ne makombolelo.

²²Amutjila tjaunolayiwa kaa, tjinodwa mu nlomo wawo, ubiganye matama awo mu moyo uwo.

²³Ha ubgwilila kuna Masimbawose, unowokubgwiliza mu tjimo tjitjo ha udusila kutjena kushaya ndulamo mu nshasha uwo,

²⁴ha ulashila kutjena golide ku hwuluba, ne golide ye Ofiri mu mabgwana amu mikuku,

²⁵ipapo Masimbawose banowobe golide iyo, ne siliva iyo yakanaka,

²⁶ipapo unowoshatha muna Masimbawose, ukalingisana nabo usina shoni.

²⁷Unowobatembezela bakakuteedza, ndizo unowoshingikadza kutuna kuko.

²⁸Muna tjaunozwimisila thama tjowoshingikala, ne tjedza tjowopenya mu zila dzidzo.

²⁹Ha bathu bedelusigwa pasi iwe unowoti, ‘Ngabamilidziwe’ unowotjidza banozwiyisa pasi.

³⁰Unowosunungula na iye usina nlandu, iye unowosunungugwa nge bubuyanana gwe maboko awo.”