Read Kalanga Jobe 23 Bible Online

Jobe 23 - Kalanga bible

Jobe 23

¹Ipapo Jobe kashandula eti,

²“Nanasi kose nditjang'ong'ola kwazo luboko gwawo gondilemela nenguba ndatjipelegwa.

³Ha ndingabe ndiziba kwandingaubona, pamwe azha pa bugalo gwawo!

⁴Ndabe ndowozhisa ndebo yangu mbeli kwawo, ngono azwilebelekela.

⁵Ndabe ndowoziba matama aunondishandula ndiwo, ne kuhwisisa zwaunondidwa.

⁶Apa unowonyanyaidzana nami nge bukulu gwawo kene? Ndodwa, nge malebeswa unowonditeedza.

⁷Ikoko nlulwami unowozwilebelekela nawo asunungugwa tjatjose mu nsumikilisi wangu.

⁸“Bonani, ha ndibhudila kunobhuda zhuba aupo ko, ha ndibhudila kunomila zhuba anditouwana ko.

⁹Ngono apa uli mu nshingo ku bunadzwa, anditoubona apa ushandukila ku burwa naiko anditoubona.

¹⁰Koga unoziba zila imwe ne imwe yandinotola ausina kundilika, ndowobhuda ndinga golide.

¹¹Ndakatshamba mu thambo dzawo, ndakalondolodza zila dzawo ndisingapambukile ntome.

¹²Andizotongo letja sala shule ndaulo dzawo dzawakaleba, Ndakabiganya matama awo awakaleba.

¹³Koga iwo autoshandukila nkumbulo wawo, ndiani ungaunyanyaidza? Tjaunoyemula unotjithama.

¹⁴Unowopeleledza tjawakalongolosa nge kwangu, ngono ndongoloso dzakajali dzinji mu nkumbulo wawo.

¹⁵Ndizo wali ndina kutja kukulu mbeli kwawo andikumbula kose ikoko, ndoutja dumbu.

¹⁶Ndzimu wathama kuti nditjekeke bula, Masimbawose unonditjisa.

¹⁷Koga ate lili zhalima linonditjisa, nenguba zwako zhalima lakandizwimba mesho.