Read Kalanga Jobe 24 Bible Online

Jobe 24 - Kalanga bible

Jobe 24

¹“Ini Masimbawose basingabige zwibaka zwe kusumikilisa kene, ini ibabo banobaziba basingatongobona zhuba le ndulamo kene?

²Bathu banofulusa migathu, bakatapa zwithuwo ngono bakazwifudza.

³Banotapa madonki e siyang'wa bakatola ngabe ye tjilikadzi bakaibigilidza.

⁴Banopinganyidza bashayi mu zila basheti be shango bose banobgwata.

⁵Bonani banonga madonki e shango ali mu tjilambanyika, banoyenda yenda beshinga, beshaka tjingajiwa, mu shango beshakila bana zojiwa.

⁶Banovuna mu minda dzisi dzabo banotjela mu minda dze zhambi dze babiibi.

⁷Banoizela basakasungila abana zwiambalo, abana naiyo ngubo yabangafuka akupota.

⁸Banonigwa nge vula dze matombo, ngono bakatizhila hwunde ye shongwe kusina pabangatizhila.

⁹Banodzamula siyang'wa dzitjamwa muna bomayi, bakatola shabana dze bashayi kulipa zwikoloto.

¹⁰Banoyenda yenda basina zwiambalo bana zhala, besenga zwiyako zwe mathunde.

¹¹Banokuna mafuta mu mitjelo ye mitoba ne nkumbi mu zhambi, koga ibo be bulawa nge nyota.

¹²Kugomela kwe banofa kohwika mu nzi nkulu ne be mimoyo yakafubala banolila bekumbila bhatsho koga nenguba kwakajalo Ndzimu autobateedza.

¹³“Bathu ibaba ndibo banofupatila tjedza, abatozibisisa zila dzatjo kene kuli kutjitobela.

¹⁴Mabamba kuyedza mbulayi unomilika, kanobulaya ndziyili ne nsheti, mu busiku kabhuda se mbava.

¹⁵Zhisho le phombgwe lomilila kuti kubhate, ibe izwidwa iti, ‘Akuna unondibona,’ ngono ikazwifukidza buso nge jila.

¹⁶Mulima mbava dzopkhwanya ng'umba akuyedza dzozwizhalilila mu ng'umba, adzitoshaka tjedza pa dzili.

¹⁷Zhalima lakati zwii mangwanana ku bali bose, ngobe bazwalani be zwinotjisa zwe zhalima.

¹⁸“Unoti, ‘Mbimbi unosengwa nge nkubila, gobe le shango iye lakalongwa bhiso, kuti ndizo kushaye unoyenda ku minda dzabo dze mizhambi.

¹⁹Zhuba ne pisa konyawusa kapuku ndizo bugalo gwe bafi gothamila ibabo bakatjinya saikoku.

²⁰Mme be ntjinyi ngaban'kangang'we, ngaazipile hwonyana, babi basitongotjakumbugwa ndodwa. Bubi gowokolomogwa se nti watemiwa!’

²¹“Banovima balumbila, bakasilakidze lubu ku tjilikadzi.

²²Koga Ndzimu unowatsha butjilo gwe bakasima nge simba lawo, banomilika bakasima ha bapelegwa mu butjilo.

²³Unobapa mbakililiko bakakulumbidziwa, wakabiga zhisho zila dzabo nge njele.

²⁴Banokudziwa kwe tjibaka tjitukununu, kudwapo abatjipo, koga banowoyisiwa pasi bakanga mmwe ne mmwe, bakabuna se zwiyako zwe mathunde.

²⁵Akuzojalo kene? Ndiani unganyanyaidza kene? Kalakidza ha matama angu asitjimwe kene?”