Read Kalanga Jobe 26 Bible Online

Jobe 26 - Kalanga bible

Jobe 26

¹Ipapo Jobe kashandula eti,

²“Wambhatsha seni iye usina matatabuko! Wambhatsha seni iye una maboko asakasima!

³Wakumbuludza seni usina butjenjedu! Naiko hwu zibisisa kungapani kwawalakidza kene!

⁴Apa ndiani wakubhatsha kuti ulebe matama iyawa kene? Apa i meya yaani inolebeleka idwa mukuli kene?

⁵Bafi banotetema bali kusi kwe vula ne zose zwinogala muili.

⁶Bugalo gwe bafi gwakaambuka mbeli kwe Ndzimu ne Golomodzo alizozwimbiwa.

⁷Unotalabudza zhuzhugwi liku bunandzwa kusina tjimwe, ukalembeledza shango mu phepo kusina tjimwe.

⁸Unopetela vula mu makole awo, ngono koga makole atophutukana ngolema kwayo.

⁹Unozwimba kuboneka kwe mwedzi uzhele, nge kuukwididza nge gole lawo.

¹⁰Unotala n'gathu pezhugwi kwe vula, kuthama n'gathu unothubukanya tjedza ne zhalima.

¹¹Phanda dze kudzimu dzotengenyeka dzotjenamisiwa ngotjemela kwawo.

¹²Nge simba lawo unodzikamisa gungwa, nge hwisiso yawo unotemelela zhithu le gungwa linoyi Rahabu.

¹³Nge meya yawo zhuzhugwi kwakaambuka, nge luboko gwawo unobhaya nyoka imu kutizha.

¹⁴Bonani, yezwi butukununu koga gwe zila dzawo, tohwa kutukununu seni zwinyebezegwa nge kwawo! Ndiani ungahwisisa nsindo we simba lawo kene?”