Read Kalanga Jobe 27 Bible Online

Jobe 27 - Kalanga bible

Jobe 27

¹Ngono Jobe kadwilila nge ndebeleko iye eti,

²“Se Ndzimu unotjila, iwo wakadusila kutjena fanilo dzangu, Masimbawose bakathama kuti ndilabile kugwadzika kwangu,

³ha meya yangu itjimundili, ne meya ye Ndzimu ili mu zwimilo zwangu,

⁴nlomo wangu aungafe waleba bubi, kakale lulimi gwangu agungafe gwaleba butjebeli.

⁵Ngakube kutjena nami kuti nditi molebesa kudzina ndifa andingazane nge kube ne ntutshi kwangu.

⁶Ndowobhatilila mu ndulamo yangu, andingafe ndaletja ikayenda, hana yangu i mbuyanana, moyo wangu aungandisole.

⁷“Tjita tjangu ngatjifanane ne nthu mbi, unondimukila ngaafanane ne nthu usina ndulamo.

⁸Ngobe kugalabgwe kwe usina Ndzimu ini, ha Ndzimu utola butjilo gugwe kene?

⁹Apa Ndzimu unoteedza tjililo tjitje ha kudziyidzika kwazha munli kene?

¹⁰Apa unowowana kushatha muna Masimbawose? Apa unowodana Ndzimu misi yose kene?

¹¹“Ndowomudiya ngekwe simba le Ndzimu, zwimuna Masimbawose andingazwisumbike.

¹²Bonani, mose imwi makazwibonela nge mesho enyu, ini ngono ndebo dzenyu dzili madatha koga kene?

¹³“Ileli ndilo gobe le nthu mbi ku Ndzimu ne lukata gwe wakabipa moyo gwaanoamutjila kudwa muna Masimbawose.

¹⁴Ha bana babe bangawanda, banowandila thumo koga, bana babe abatofa baja zojiwa bakaguta.

¹⁵Malimbelimbe awe anobulawa nge bugwele, tjilikadzi dzabo adzitobalilila.

¹⁶Nenguba ekubunganya siliva se hwuluba, ezwitjekela zwiambalo zwinjinji se duluthulu le vu,

¹⁷unowozwitjekela izo koga zowoambagwa ne nlulwami, usina nlandu unowokoba siliva.

¹⁸Ng'umba yaanobaka inonga ludandi gwe tjibubi inonga nshasha wathamwa ne nlindi.

¹⁹Unonoizela akafuma, koga kowopela unoti ezhula mesho awe kawana fungwa iye isipo.

²⁰Lutjo gon'wila gukankulila se nkubila mu busiku unolala asengwa nge tjampupudze.

²¹Phepo ye bhezhuba inontutudzila kutjena kasibepo, inontutudzila kutjena ne nzi uwe,

²²inontutudza isina ngoni, akabhata egwisa kwazo kutizha.

²³Phepo inonlobela phande, inonsumila kudwa mu bugalo gwayo.