Read Kalanga Jobe 28 Bible Online

Jobe 28 - Kalanga bible

Jobe 28

¹“Nge lebeswa kuna kunotshiwa siliva, ne kunokuyungiwako golide.

²Butali gotshiwa mu mavu, khopa inokuyungiwa kudwa mu mabgwe.

³Nthu unopeleledza zhalima, eshaka phangula kule kule kwakanginilila, mu mabgwe akusi kusi.

⁴Unotsha mukatikati kusingagale bathu, kusina ndodwa ne nthu wakatongo tshambako, unoshinga ali mu bushoma akanganika, akalembelekela yeno na yeno ali misungo ye migodi.

⁵Shango iyo inomela zojiwa kusi kwayo kotshindunugwa nge moto.

⁶Mabgwe ayo bugalo gwe mabgwe e safire[9] ne hwuluba yayo ina golide.

⁷“Dzu alitoziba zila inoyenda ko ne luphangu aguthu kuka ibona.

⁸Akuna tjibandana tjakatongo yenda muili, ne shumba ayithu ikatongo yenda muili bo.

⁹“Luboko gwe nthu goswika ku mabgwe akasima, gutshindinula matombo nge midzi yawo.

¹⁰Unozhula ngolo mu mabgwe, mesho awe anobona zose zwakanaka.

¹¹Unoshakisisa misenya kuti vula isiunge ne tjakasumbikala unotjidusila pa tjena.

¹²“Ngono kanti butjenjedu gobong'wa ngayi, ne bugalo gwe hwisiso gobong'wa ngayi kene?

¹³Nthu aatoziba zila[10] inoyenda kuguli, agutowang'wa mu shango ye batjili.

¹⁴Kwakangina kukati, ‘Agupo mundili,’ gungwa naigobo gukati, ‘Agupo mundili.’

¹⁵Agutotengwa nge golide mbuyanana, ne themba yago aingalizanyiwe ne siliva.

¹⁶Agungatengwe ne themba ye golide ye Ofi, nanga ili Onikisi ye safire iyo i pezhugwi kwazo.

¹⁷Golide ne halasi azwingafanidzanyiwe nago, kene kuli kugutenganya nge jegwa le golide.

¹⁸Apa kuli mabgwe e khorala[11] ne safire akuna tjingalebgwa nge kwawo, themba ye butjenjedu ipezhugwi kwazo kupinda ndalama.

¹⁹Topazi ye Khushi[12] aingafanidzanyiwe nayo, ne golide mbuyanana aingagutenge.

²⁰“Dumbu ngono bhalule le butjenjedu ini? Hwisiso yakabaka ngayi ngono?

²¹Gwakasumbikala mu mesho e zwitjili zose, gwakasumbikala ne mu nyuni dzinowuluka dumbu.

²²Golomodzo ne lufu zoti, ‘Takahwa makwayi koga nge zebe dzedu.’

²³“Ndzimu ndiwo unoziba zila inoyenda kuguli, ndiwo woga unoziba kwagunogala.

²⁴Ngoti ndiwo unobona kunoti ku phelelo dze shango, unobona zose zwipasi kwe zhuzhugwi.

²⁵Wakati upa phepo simba, ukakala vula, udzipa tjilizanyo,

²⁶ukadusila vula nlayo, ukathamila lupenyo gwe vula zila,

²⁷ndipo kee, pawakagubona ukaleba nge kwago, ukagusisithila, ukagulika.

²⁸Ngono Ndzimu ukadwa nthu uti, ‘Bona, kutja She ndigo butjenjedu, kuleya mbipo ndiko hwisiso.’ ”